ආන්දෝලනාත්මක ප්රකාශ සිදුකළ ජෙරොම් ප්රනාන්දු, ඔහු සම්බන්ධයෙන් සිදුකෙරෙන මුදල් විශුද්ධිකරණය ඇතුළු චෝදනා කිහිපයකට අදාළව මෙරට පරීක්ෂණ පැවැත්වෙමින් තිබියදී සිංගප්පූරුවෙන් එක්සත් රාජධානියට පැන ගොස් තිබෙනවා.
ජෙරොම් ප්රනාන්දුගේ ඉන්ස්ටග්රෑම් පිටුවේ පළ කර ඇති සටහනකට අනුව, ඔහු ඊයේ දිනයේ (06) එක්සත් රාජධානියේ දේව මෙහෙයක් පවත්වා ඇති බවයි පෙනී යන්නේ. “ජෙරොම් ප්රනාන්දු දේවගැතිතුමා ජුලි 06 සිට බ්රහස්පතින්දා දින තුනක එක්සත් රාජධානියේ දේව සේවයේ යෙදෙනු ඇත” යනුවෙන් එම පෝස්ටුවේ දැක්වුණා.
බුද්ධාගම, ඉස්ලාම් සහ හින්දු ආගම සම්බන්ධයෙන් ඔහු විසින් කරන ලද ආන්දෝලනාත්මක ප්රකාශ සම්බන්ධයෙන් අපරාධ පරීක්ෂණ දෙපාර්තමේන්තුව පරීක්ෂණයක් ආරම්භ කිරීමට සමගාමීව ඔහු පසුගිය මැයි 16 වන දින සිංගප්පූරුවට පළාගියා.
ඒ් අනුව ඔහු එක්සත් රාජධානියට ගොස් ඇත්තේ සිංගප්පූරුවේ සිටයි. ඉන්පසුව, ජෙරොම් ප්රනාන්දු මැයි 21 වන දින සජීවී වීඩියෝවක් හරහා තමන්ගේ ප්රකාශ හරහා බෞද්ධ, හින්දු සහ ඉස්ලාම් ආගමට යම් හානියක් සිදුවී නම් ඊට සමාව වන්නැයි කියා සිටියා.
ඉන් අනතුරුව ඔහු ශ්රී ලංකාවට නොපැමිණි නමුත්, ඔහුගේ බිරිඳ සහ දරුවෝ සිංගප්පූරුවේ සිට ජුනි 02 වැනිදා ශ්රී ලංකාවට පැමිණි බව වාර්තා වුණා.
ජෙරොම් ප්රනාන්දුට සම්බන්ධයෙන් සිදුවීම එසේ වුවද, කරන ලද ප්රහසන වැඩසටහනක් නිසා බුදු දහමට අපහාසයක් වූ බවට ලැබුණු පැමිණිල්ලකට අනුව අපරාධ පරීක්ෂණ දෙපාර්තමේන්තුව විසින් අත්අඩංගුවට ගෙන ICCPR පනත අනුව රිමාන්ඩ් බාරයේ සිටි නතාශා එදිරිසූරිය, දින 39ට පසුව පසුගියදා ඇප මත නිදහස් වුණා.
