ව්යාපාරිකයෙකුගෙන් රුපියල් 50,000ක මුදලක් අල්ලස් ලෙස ලබාගැනීමේ චෝදනාවකට අදාළව දේශීය ආදායම් දෙපාර්තමේන්තුවේ නිලධාරීවරයෙකු අත්අඩංගුවට ගෙන ඇති බව වාර්තා වේ.
දේශීය ආදායම් දෙපාර්තමේන්තු කාර්යාලයේදී අද (07) පස්වරුවේ අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු අත්අඩංගුවට ගෙන ඇත.
පිළියන්දල ප්රදේශයේ ව්යාපාරිකයෙකු විසින් සිදු කරන ලද පැමිණිල්ලකට අනුව, පැමිණිලිකරු විසින් දෙමටගොඩ, කොළොන්නාව පාරේ පවත්වාගෙන යනු ලබන ආයතනයක 2025 වර්ෂයට අදාළ බදු නිශ්කාෂන වාර්තාව ලබාගැනීමට කටයුතු කිරීමේ දී පසුගිය වර්ෂයන් සඳහා රුපියල් 1,100,000ක හිඟ බදු මුදලක් ගෙවීමට ඇති බව දන්වා, එය ඉවත් කර, 2025 වර්ෂයට අදාළව නිශ්කාෂණ වාර්තාව ලබා දීම වෙනුවෙන් රුලියල් 100,000 මුදලක් අල්ලස් ලෙස ඉල්ලා ඇත.
එම මුදල රුලියල් 50,000 දක්වා අඩුකර, එකී අඩු කළ මුදලින් රුපියල් 42,000ක මුදලක් පසුගිය 03 වන දින ද, ඉතිරි රු.8,000ක මුදල 2025.07.07 වන දින අල්ලස් ලෙස ඉල්ලා ලබාගැනීමේ දී අදාළ නිලධාරීයා අත්අඩංගුවට ගෙන ඇත.
අත්අඩංගුවට ගන්නා ලද සැකකරු කොළඹ මහෙස්ත්රාත් අධිකරණයට ඉදිරිපත් කිරීමට නියමිතව ඇත.
