චීනයේ කොවිඩ් නැවතත් හිස ඔසවයි

නැගෙනහිර චීනයේ නැංජිං නුවර ජියැංෂු ප්‍රාන්තයේ මහා පරිමාණයේ PCR පරීක්ෂණ මාලාවක් ආරම්භ කිරීමට චීන රජය නියෝග කර තිබෙන බව අල් ජසීරා පුවත් සේවය වාර්තා කරනවා.

චීන රජය මේ පියවර ගෙන ඇත්තේ අඛණ්ඩව දෙවැනි දිනයටත් කොවිඩ් ආසාදිතයන් විශාල ප්‍රමාණයක් වාර්තා වීම හේතුවෙන්.

මීට වසර දෙකකට පෙර කොවිඩ් වසංගතයේ ව්‍යාප්තියෙන් පසු චීනයෙන් වාර්තා වූ දෛනික කොවිඩ් ආසාදිතයන්ගේ සංඛ්‍යාව පෙරේදා 31,527ක් ලෙස වාර්තා වූ අතර, ඊයේ දිනයට ගත වූ පැය විසිහතර තුළ නව ආසාදිතයන් 33,000ක් වාර්තා වී තිබෙනවා.

එය මෙතෙක් චීනයෙන් වාර්තා වූ වැඩිම දෛනික කොවිඩ් ආසාදිතයන් සංඛ්‍යාව බව එරට කොවිඩ් දත්ත සංඛ්‍යාලේඛන වාර්තා පෙන්වා දෙනවා.

හඳුනාගත් බොහෝ කොවිඩ් ආසාදිතයන්ට මූලික රෝග ලක්ෂණ නැති බැවින් ඉදිරියේදී ආසාදිතයන්ගේ ප්‍රමාණය දෙගුණ තෙගුණ වනු ඇති බවයි එරට සෞඛ්‍ය අංශ අනතුරු අඟවා ඇත්තේ.

චීනයේ නව කොවිඩ් වසංගතය හිස ඔසවා ඇත්තේ කොවිඩ් ශුන්‍ය කිරීමේ ප්‍රතිපත්තිය අකුරටම ක්‍රියාත්මක කරමින් චීනයේ කොවිඩි මර්දනයට එරට රජය දැඩි ක්‍රියාමාර්ග ගත් පසුබිමකදී වීම විශේෂත්වයක්.