අධික සීතල නිසා කුඩා දරුවන් දෙදෙනෙක් මෙලොව හැර ගිහින් ! – “කුඩා දරුවන් අධික සීතල තත්ත්වයෙන් මුදාගැනීමට අවශ්‍ය ක්‍රියාමාර්ග ගන්න”විශේෂඥ වෛද්‍යවරු ඉල්ලති.

දිවයිනට බලපා ඇති ශීත කාලගුණික තත්ත්වය හමුවේ සෙම් රෝගී තත්ත්වය උත්සන්නවීම හේතුවෙන් කන්තලේ ප්‍රදේශයේ කුඩා දරුවන් දෙදෙනෙකු මියගොස් ඇති බව සෞඛ්‍ය අංශ සඳහන් කර තිබේ.

මින් එක් දරුවෙකු කන්තලේ රජ ඇළ ප්‍රදේශයේ වයස මාස දෙකහමාරක බිලිඳියක වන අතර අනෙක් දරුවා කන්තලේ පේරාරු ප්‍රදේශයේ තුන් හැවිරිදි පිරිමි දරුවෙකි.

මෙම දරුවන් දෙදෙනාම ඊයේ (09) අලුයම මියගොස් ඇති අතර ඉන් එක් දරුවෙකු පෙනහලු ආබාධයකින් පෙළී ඇති බව ද සෞඛ්‍ය අංශ අනාවරණය කරයි.

තුන් හැවිරිදි පිරිමි දරුවා අධික සීතල දරාගැනීමට නොහැකිවීම හේතුවෙන් හුස්ම ගැනීමේ අපහසුතා මත මියගොස් ඇති බව වාර්තා වෙයි.

කෙසේවෙතත් මෙම දිනවල පවතින අධික ශීත කාලගුණය හේතුවෙන් කුඩා දරුවන්ට ශ්වසන අපහසුතා ඇතුළු රෝගී තත්ත්වයන් හටගැනීමේ අවදානමක් පවතින බව කොළඹ රිජ්වේ ආර්යා ළමා රෝහලේ ළමා රෝග විශේෂඥ වෛද්‍ය දීපාල් පෙරේරා මහතා සඳහන් කළේය.

එම නිසා කුඩා දරුවන් අධික සීතල තත්ත්වයෙන් මුදාගැනීමට අවශ්‍ය ක්‍රියාමාර්ග ගන්නා ලෙස විශේෂඥ වෛද්‍යවරයා දෙමව්පියන්ගෙන් ඉල්ලා සිටියේය.