බිත්තර සඳහා පනවා තිබූ උපරිම සිල්ලර මිල අත්හිටුවයි – රජය දැනුම් දුන් නව මිල මෙන්න !

පාරිභෝගික සේවා අධිකාරිය විසින් ඉදිරිපත් කරන ලද බිත්තර සඳහා වූ නව සංශෝධිත මිල ගණන් සම්බන්ධයෙන් එකඟ විය නොහැකි බව බිත්තර නිෂ්පාදකයන්ගේ සංගමය අද (15) අභියාචනාධිකරණය වෙත දැනුම් දුන්නා.

ඒ අදාළ නඩුව අද (15) ප්‍රසන්ත ද සිල්වා සහ ඛේමා ස්වර්ණාධිපති යන මහත්ම මහත්මීන්ගෙන් සමන්විත අභියාචනාධිකරණ විනිසුරු මඩුල්ල ඉදිරියේ කැඳවූ අවස්ථාවේදීයි.

පාරිභෝගික සේවා අධිකාරිය වෙනුවෙන් පෙනී සිටි නීතිඥවරිය අධිකරණය හමුවේ කියා සිටියේ ඊයේ (14) රැස්වූ පාරිභෝගික සේවා කවුන්සිලය විසින් සුදු බිත්තර සඳහා රුපියල් 42ක් සහ රතු බිත්තරක් සඳහා රුපියල් 44ක් උපරිම සිල්ලර මිලක් නියම කිරීමට තීරණය කළ බවයි.

එම මිල ගණන්වලට තම සේවාදායකයා එකඟ නොවූ බවයි බිත්තර නිෂ්පාදකයින්ගේ සංගමය වෙනුවෙන් පෙනී සිටි ජනාධිපති නීතිඥ කුවේර ද සොයියා මහතා අධිකරණය හමුවේ ප්‍රකාශ කළේ.

මීට පෙර නිකුත් කළ ගැසට් නිවේදනය තිබෙන පාලන මිල ගණන්වලට වඩා නව මිල ගණන් අඩු මට්ටමක පවතින බවත් එය කිසිසේත්ම සෑහීමකට පත්විය නොහැකි බව පෙන්වා දුන් ජනාධිපති නීතිඥවරයා එම පෙත්සම විභාගයට ගැනීමට නියම කරන ලෙස ඉල්ලා සිටියා.

එම ඉල්ලීම පිළිගනිමින් අභියාචනාධිකරණය එම නඩුව ලබන පෙබරවාරි මස 06 වනදා විභාගයට ගැනීමට තීරණය කළා.

ඊට අමතරව බිත්තර සඳහා පාලන මිලක් නියම කරමින් ඉකුත් අගෝස්තු 19 වනදා පාරිභෝගික සේවා අධිකාරිය විසින් නිකුත් කර තිබෙන ගැසට් නිවේදනය නඩු විභාගය අවසන් වන තෙක් අත්හිටුවමින් අතුරු නියෝගයක් ද අධිකරණය විසින් නිකුත් කරනු ලැබුවා.