සංචාරක බස් රථ හතරක් රියදුරන්ට පහර දී පැහැර ගනී !

සංචාරකයන් ප්‍රවාහනය කරන සුඛෝපභෝගී බස් රථ 04ක් එහි රියදුරන්ට සහ සේවකයින්ට පහර දී පැහැරගෙන ගොස් ඇති බව ශ්‍රී ලංකා සංචාරක බස් රථ හිමියන්ගේ සංගමය පවසනවා.

ලීසිං ආයතන විසින් මෙහෙයවනු ලබන සීසර්වරුන් විසින් මෙලෙස බස් රථ පැහැරගෙන ගොස් ඇති බවයි එම සංගමයේ සභාපති නීල් ජයතිස්ස ප්‍රකාශ කළේ.

පහර දීමෙන් රියදුරන් කීපදෙනෙකු තුවාල ලබා රෝහල් ගතකර ඇති බවද, ඔහු වැඩිදුරටත් කියා සිටියා.

කෙසේ වෙතත් පොලිස්පතිවරයා සියළුම පොලිස් ස්ථාන වෙත පසුගිය දා දැනුම් දුන්නේ කල් බදු හෝ මූල්‍ය සමාගම් මඟින් වාහන අත්පත්කර ගැනීමේදී එහි හිමිකරු විරෝධය දක්වන්නේ නම් අදාළ සමාගම් දිසා අධිකරණයේ නඩු පවරා වාහන අත්පත් කර ගැනීමට නෛතිකව පියවර ගත යුතු බවටයි.

එවන් පසුබිමක ලීසිං හා ණයවාරික ගෙවන්නන්ගේ සංගමය අද අපරාධ පරීක්ෂණ දෙපාර්තමේන්තුවට පැමිණිල්ලක් ඉදිරිපත් කළා.

ඒ එම සංගමයේ සභාපතිවරයා ඇතුළු නියෝජිතයන්ට මරණ තර්ජන එල්ලකරන බවට පවසමින්.

පැමිණිල්ල ගොනු කිරීමෙන් අනතුරුව, ලීසිං හා ණයවාරික ගෙවන්නන්ගේ සංගමයේ සභාපති අසංක රුවන් පොතුපිටිය මාධ්‍ය වෙත අදහස් දක්වා සිටියා.