සූර්යකුමාර් යාදව්ගේ පිතිහරඹය ඉන්දියාවට ජය ගෙනෙයි

අනුකම්පා විරහිත පිතිහරඹය මේ යයි ප්‍රදර්ශනය කළ සූර්යකුමාර් යාදව්ගේ ශතකය (නොදැවී 112) නිසා රාජ්කොට් නුවරදී අද (07 වැනිදා) පැවැති තුන්වැනි සහ අවසාන විස්සයි-20 තරගයේදී ඉන්දියානුවෝ ශ්‍රී ලංකාව පරාජය කරමින් ලකුණු 91 ක දැවැන්ත ජයක් ලබාගත්හ. ඒ සමගින් ඔව්හු තරග 3 කින් සමන්විත තරගාවලිය 2-1 ක් ලෙසින් ජයගත්හ.

ඉන්දියානුවෝ ශ්‍රී ලංකා පන්දු යවන්නන්ට සිත්සේ තලමින්, නියමිත ඕවර 20 අවසන් වන විට කඩුලු 5 ක් දැවී ලකුණු 228 ක් ලබාගත්හ. ඊට පිළිතුරු ලෙසින් ඕවර 16.4 කදී ශ්‍රී ලංකාවට සියලු දෙනා දැවී ලබාගත හැකිවූයේ ලකුණු 137 ක් පමණි.

ශ්‍රී ලංකා පිලේ කිසිම පිතිකරුවකුට ලකුණු 23 න් ඔබ්බට ලබාගත නොහැකි විය. ආරම්භක පිතිකරුවන් වූ කුසල් මෙන්ඩිස් සහ පැතුම් නිස්සංක ලකුණු 44 ක සම්බන්ධතාවක් ගොඩනැංවූ නමුත් පන්දු 8 ක් ඇතුළතදී ලකුණු 07 ක් පුවරුවට එක්වන අතරවාරයේදී මෙන්ඩිස්, නිස්සංක සහ අවිශ්ක ප්‍රනාන්දුත් දැවී ගියහ.

12 වැනි ඕවරයේදී ධනංජය ද සිල්වා දැවී යාමෙන් පසුව ලකුණු 41 ක් ඇතුළත අවසන් පිතිකරුවෝ පස් දෙනාම දැවීගියහ.

පිටියේ දෙපස තිබූ කෙටි හතරේ සීමාව තම දෙපතුල ළඟට ගෙන්වාගත් ඉන්දීය පිතිකරුවෝ හයේ පහර 14 කින් සහ හතරේ පහර 19 කින් තම ඉනිම අලංකාර කළහ.

තවත් භයංකාර පිතිකරුවකු වන ඉෂාන් කිෂන් පළමු ඕවරයේදීම දැවී ගිය නමුත් දෙවැනි කඩුල්ල වෙනුවෙන් ලකුණු 49 ක් එක් කිරීමට ෂුබ්මන් ගිල් (46) සහ රාහුල් ත්‍රිපාටි (35) දෙදෙනා වැය කළේ පන්දු 31 ක් පමණි.

ත්‍රිපාටි දැවී යාමෙන් පසුව ෂුබ්මන් ගිල්ට එක්වූ සූර්යකුමාර් යාදව්, අතිශය ප්‍රචණ්ඩකාරී පිතිහරඹයක නිරත වෙමින් පන්දු 45 කින් සිය ශතකය සම්පූරණ කළේය. ඔහුගේ පළමු ලකුණු 100 න් ලකුණු 72 ක්ම හතරේ සහ හයේ පහර විය. යාදව්ගේ පන්දු 51 ක ඉනිමේ ලකුණු 112 ට හයේ පහර 9 ක් සහ හතරේ පහර 7 ක් ඇතුළත් වී තිබිණ.

නායක හර්දික් පාණ්ඩ්‍යා (04) සහ දීපාක් හූඩා ((04) ලකුණු 15 ක් ඇතුළතදී දැවී ගියද ඒ වන විටත් ඉන්දියානුවෝ ශ්‍රී ලංකා පන්දු යවන්නන් සම්පූර්ණයෙන්ම මෙල්ල කරගෙන සිටියහ. ශ්‍රී ලංකාවේ පන්දු යැවීම අතිශය දුර්වල මට්ටමක පැවතිණ. ඉනිම ආරම්භයේදී ප්‍රහාරාත්මක ඕවර 6 න් ලකුණු 53 ක් උදුරාගත් ඉන්දීය පිතිකරුවෝ ඉනිම අග්ගිස්සේ අවසන් ඕවර 4 න් ලකුණු 51 ක් ලබාගත්හ.

දිගින් දිගටම අසාර්ථක වූ භානුක රාජපක්‍ෂගේ ස්ථානය වෙනුවෙන් අද තරගය සඳහා අවිශ්ක ප්‍රනාන්දු කණ්ඩායමට කැඳවා තිබිණ.

කාසියේ වාසිය දිනාගත් ඉන්දීය නායක හාර්දික් පාණ්ඩ්‍යා පළමුවෙන් පන්දුවට පහර දීම තෝරා ගත්තේය. ශ්‍රී ලංකා නායක දසුන් ශානක කීවේ කාසියේ වාසිය දිනාගත්තා නම් තමන් ද පළමුවෙන් පන්දුවට පහරදීම තෝරා ගන්නා බවයි.