බොලිවුඩයේ සියලු පළමු දින වාර්තා නැවත තමන් සතු කරගැනීමට ශාරුක් ඛාන් සමත් වෙයි !

ශාරුක් ඛාන්, ඊයේ නිකුත් වූ Pathaan සිනමාපටය සමග, බොලිවුඩ් ඉතිහාසයේ ඉහළම පළමු දින ආදායමට හිමි වාර්තාව තමා සතු කරගන්නට සමත් වුණා.

පළමු දින ආදායම්

Pathaan – කෝටි 54/55 (සියලු භාශා – කෝටි 56)
KGF 2 හින්දි පිටපත – කෝටි 53.95
War – කෝටි 53.35
Thugs of Hindostan – කෝටි 52.25

මීට අමතරව ශාරුක් ගේ ශක්තිමත්ම බල ප්‍රදේශයක් වන විදෙස් රටවලින් චිත්‍රපටය වෙත ලැබෙන ආදායම කෝටි 35 – 40 අතර ගණනක් වනු ඇති බව සඳහන්. ලංකාවේ ද ඊයේ අගනුවර පැවති සියලු දර්ශනයන් Housefull වූ අතර, අද, හෙට සහ සතියන්තයේ ද යොදා ඇති දර්ශනයන් මේ වනවිට Housefull වෙමින් පවතිනවා.

මේ අනුව සිනමාපටය පළමු දිනයේම කෝටි 100 කට ආසන්න ජාත්‍යන්තර ආදායමක් වාර්තා කරනු ඇති. ඒ අනුව වේගයෙන්ම ජාත්‍යන්තර ආදායම කෝටි 100 ඉක්මවූ පළමු චිත්‍රපටය බවට Pathaan පත් වීමට නියමිතයි.

අද දිනය ඉන්දියානු ජනරජ දිනය වන අතර, අද දිනය නිවාඩු දිනයක්. ඒ අනුව දැනටමත් ඊයේ දිනයට වඩා 25% ක පමණ ප්‍රේක්ෂක වැඩිවීමක් සිනමාශාලා වල දක්නට ලැබෙන බව පැවසෙනවා. ඒ අනුව අද දිනයේ ඉන්දියාවෙන් පතාන් ලබන ආදායම කෝටි 65 – 70 ක් වැනි ගණනක් වනු ඇති.

මේ අනුව අද දිනයේ ආදායම ද සමග ඉන්දියාව තුල ආදායම කෝටි 100 වේගයෙන්ම ඉක්මවූ හින්දි චිත්‍රපටය බවට පතාන් පත් වෙනවා. චිත්‍රපටය මේ සති අන්තය අවසන් වන විට ඉන්දියාව තුල පමණක් කෝටි 225 – 250 කට ආසන්න ආදායමක් උපයනු ඇති බවට අනාවැකි පළ වනවා. ඒ සතිඅන්තය අවසන් වන විට චිත්‍රපටය ඉපයූ ජාත්‍යන්තර ආදායම කෝටි 350 ත් 400 ත් අතර ගණනක් වනු ඇති.

Pathaan මේ සියලු ජයග්‍රහණ ලබා ගන්නේ Promotions සඳහා ඉතා අඩු වියදමක් වැය කරමින් වීම තවත් සුවිශේෂ කරුණක්. Audio Launch, Song Launch, Trailer Launch, Teaser Launch වැනි කිසිම වැඩසටහනක් චිත්‍රපටයට සමගාමීව සිදු නොවූ අතර, කිසිඳු නලුවෙකු හෝ නිලියක සිනමාපටය නිකුත්වීමට ප්‍රථම මාධ්‍යයට එම සිනමාපටය පිළිබඳ අදහස් පළකිරීමෙන් වැලැකී සිටියා. ඒ අයුරින් ක්‍රියා කරමින් Boycott Bollywood වැනි රැලි වලට උත්තේජනයන් ලබා නොදීමට ඔවුන්ට හැකියාව ලැබුණා.

කෙසේ වෙතත්, බොලිවුඩ් ප්‍රේක්ශකයන් මේ සිනමාපටය සමග නැවතත් සිනමාශාලාව කරා උනන්දුවෙන් ඇදී එන්නට පටන් ගෙන තිබෙනවා. ඉන්දියානුවන් සිනමා ශාලා තුල ද, මං මාවත් වල ද, සිනමා සංකීර්ණයන්හි එලිමහන් වල ද නර්තනයෙහි යෙදෙමින්, ජය ඝෝශා නගමින් ශාරුක් ඛාන්ගේ මේ යලි පැමිණීම සමරමින් සිටිනවා. සිනමා ක්ශේත්‍රයට සම්බන්ධ සියලු දෙනාම පාහේ “පතාන්” හි මේ සුවිශිෂ්ට ආගමනය පිළිබඳව සුබ වාදී ලෙස අදහස් පළ කොට තිබුණා.