අතුරුදහන්ව තිබූ සාගර විශ්ව විද්‍යාල සිසුවාගේ සිරුර ධීවරයෝ සොයාගනිති !

හලාවත මුහුදේ දිය නාමින් සිටියදී දිය රළකට හසුව අතුරුදහන්ව සිටි සාගර විශ්ව විද්‍යාල සිසුවාගේ සිරුර අද (13) අලුයම ඉරණවිල අඹකදවිල මුහුදේ පාවෙමින් තිබියදී ධීවරයින් විසින් ගොඩබිමට රැගෙන විත් තිබූ බව හලාවත මුලස්ථාන පොලිසිය පවසයි.

මෙසේ අවාසනාවන්ත අයුරින් මරණයට පත්ව ඇත්තේ, මට්ටක්කුලිය සාගර විශ්ව විද්‍යාලයේ ඉංජීනේරු පිඨයේ අවසන් වසර අධ්‍යයන කටයුතු වල නිතර වෙමින් සිටි රඹුක්කන වහව බණ්ඩාරවත්ත ප්‍රදේශයේ පදිංචිව සිටි මලිත් ධීමන්ත ජයලත් නැමති 25 හැවිරිදි සිසුවෙකි.

මෙම ඉංජීනේරු සිසුවා තම පවුලේ 60 කට ආසන්න පිරිසක් සමග 11 දින විනෝද චාරිකාවක නිරත වෙමින් සිටියදී හලාවත තානායම ඉදිරිපිට මුහුදේ දිය නාමින් සිටියදී මෙසේ දිය රළකට හසුව ගසාගෙන ගොස් අතුරුදහන්ව තිබුණි.

සිසුවාගේ සිරුර සොයා නාවික හමුදා කිමිදුම් ඒකකය දින දෙකක් පුරා මෙහෙයුම් කර තිබුණද සිරුර හමුවී නොතිබු බව කියයි.

කෙසේ වෙතත් 13 දින අලුයම ධීවර කටයුතු වල නිරත වෙමින් සිටි අඹකදවිල ධීවරයින් මුහුදේ මළ සිරුරක් පාවෙනු දැක ඒ බව හලාවත මුලස්ථාන පොලිසියට දැනුවත් කිරීමේන් පසු පොලිස් දැනුම් දීම මත සිරුර අඹකදවිල වෙරළර රැගෙන ඒමට කටයුතු කර තිබුණි.

මෙම සිසුවාගේ පශ්චාත් මරණ පරික්ෂණය හලාවත මහ රෝහලේදී 13 දින දහවල් පැවැත්විමට නියමිතව ඇති බව පොලිසිය පැවසීය.

හලාවත ජ්‍යෙෂ්ඨ පොලිස් අධිකාරි ලලිත් යු. ගමගේ මහතාගේ උපදෙස් මත හලාවත මූලස්ථාන ප්‍රධාන පොලිස් පරික්ෂක ඩබ්ලියු.ඩි.එස්.පත්මකුමාර මහතා ඇතුළු කණ්ඩායමක් පරික්ෂණ සදහා එක්වී සිටිති.