කථිකාචාර්යවරයෙක් මරන්න විස වායුවක් දැම්මැයි රුහුණේ උපකුලපතිට චෝදනා !

විශ්වවිද්‍යාල ආචාර්යවරුන්ගේ සමිති සම්මේලනයේ ලේකම් රොහාන් ලක්සිරිගේ කථිකාචාර්යවරයාගේ කාර්යාලයට විෂ වායුවක් ඇතුළු කර ඔහුගේ ජීවිතයට හානි කිරීමට තැත් කළ බවට චෝදනා එල්ලවී ඇති රුහුණ විශ්වවිද්‍යාලයේ උපකුලපති විශේෂඥ වෛද්‍ය ජ්‍යෙෂ්ඨ මහාචාර්ය සුජීව අමරසේන එම ධූරයෙන් ඉවත් කරන ලෙස ඉල්ලා ලබන බදාදා (පෙබ. 15) සංකේත වැඩ වර්ජනයක් ක්‍රියාත්මක කිරීමට විශ්වවිද්‍යාල ආචාර්යවරුන්ගේ සමිති සම්මේලනය තීරණය කර තිබේ.

මෙම සිද්ධිය සම්බන්ධයෙන් කෙරෙන විමර්ශනවලදී උපකුලපතිවරයා හැසිරුණු ආකාරය පිළිබඳව සෑහීමකට පත්නොවීම හා සිද්ධියට අදාළව කෙරෙන විමර්ශන විධිමත් අයුරින් පැවැත්විය යුතු බවට බලකරමින් මෙම සංකේත වැඩ වර්ජනය ක්‍රියාත්මක කිරීමට නියමිත ය.

සෙසු විශ්වවිද්‍යාල ආචාර්යවරුන් හා ආචාර්යවරියන් මෙදින රුහුණ විශ්වවිද්‍යාල පරිශ්‍රයට පැමිණ මෙම සංකේත වැඩ වර්ජනය ක්‍රියාත්මක කරන බව එම ආචාර්යවරුන්ගේ සමිති සම්මේලනයේ සභාපති මහාචාර්ය ශ්‍යාම බන්නැහැක පැවසීය.

වැඩ වර්ජනයෙන් අනතුරුව මේ සම්බන්ධයෙන් කරුණු පැහැදිලි කිරීම සඳහා මාධ්‍ය හමුවක් පැවැත්වීමට කටයුතු යොදා ඇති බව ද ඔහු පැවසීය.

කථිකාචාර්ය රොහාන් ලක්සිරිගේ ඉකුත් සෙනසුරාදා (පෙබ. 11) රාත්‍රි කාලයේ විශ්වවිද්‍යාලයේ පිහිටි ඔහුගේ කාර්යාලය තුළ වෘත්තීය සමිතිවලට අදාළ කටයුතුවල නිරතවෙමින් සිට නිවස වෙත ගොස් පසු දා කාර්යාලය වෙත පැමිණි පසු එහි දුර්ගන්ධයක් ඇති බව පවසමින් නැවත නිවස වෙත ගොස් ඇති බව ද උපකුලපතිවරයා පැවසීය.

එසේ ගිය කථිකාචාර්යවරයා එදින දහවල් 1.40ට පමණ නිවසේ සිට එම සිද්ධිය පිළිබඳව තමා දැනුවත් කළ බව ද පසුව තමන් කථිකාචාර්යවරයා සිටි කාර්යාලයේ දොර විවෘත කර සිද්ධිය පිළිබඳව සොයා බැලූ නමුත් එහි එවැනි දුර්ගන්ධයක් නොදැනුණු නිසා තවදුරටත් විමර්ශනය කරන බව පවසමින් ආපසු ගිය බව ද උපකුලපතිවරයා පැවසීය.

ඉන් අනතුරුව මෙම සිද්ධිය සම්බන්ධයෙන් අදාළ කථිකාචාර්යවරයා පොලිසියට පැමිණිල්ලක් කර ඇති බව දැනගන්නට ලැබුණු බව ද කථිකාචාර්යවරයාගේ ජීවිතයට හානි කිරීමට කටයුතු කළ බවට තමාට එරෙහිව නැගෙන චෝදනාව සම්පූර්ණයෙන් ම ප්‍රතික්ෂේප කරන බව ද උපකුලපතිවරයා ප්‍රකාශ කළේ ය.

සේවය පැහැර හරින ඇතැම් කථිකාචාර්යවරුන්ගේ ක්‍රියා කලාපයන්ට එරෙහිව තමන් විනය ක්‍රියාමාර්ග ගැනීම මෙසේ තමන්ට චෝදනා එල්ල කිරීමට හේතු වී ඇති බව ද ඔහු පැවසීය.