සල්ලිවලට මන්ත්‍රීවරු මිලදී ගන්න හදන අයට එරෙහිව අධිකරණයෙන් ඓතිහාසික තීන්දුවක් !

හිටපු නියෝජ්‍ය අමාත්‍ය මයෝන් මුස්තාපා ට කොළඹ මහාධිකරණය මාස 06ක සිරදඬුවම් නියම කර තිබේ.

2010 වසරේ ජනාධිපතිවරණයට ඉදිරිපත් වූ ෆීල්ඩ් මාර්ෂල් සරත් ෆොන්සේකා මහතාට සහාය දැක්වීම සඳහා පාර්ලිමේන්තු මන්ත්‍රී මොහොමඩ් මුසම්මිල් මහතාට රුපියල් ලක්ෂ 42ක මුදලක් ලබාදීමේ චෝදනාවට ඔහු වරදකරු බවට කොළඹ මහාධිකරණය නියෝග කර තිබුණි.

එම දඬුවමට අමතරව විත්තිකරුට රුපියල් පන්සීයක දඩයක් ද නියම කෙරුණු අතර එම දඩ මුදල ගෙවීම පැහැර හරිනු ලැබෙන්නේ නම් අමතරව තවත් මාසයක සිර දඬුවමක් නියම කරන බවත් තීන්දුවේ සඳහන් වේ.

වසර හතක කාලයක් සඳහා විත්තිකරුගේ ප්‍රජා අයිතිය ද අහිමි කරන බව එම තීන්දුවේ සඳහන් වේ.

දීර්ඝ නඩු විභාගයකින් අනතුරුව කොළඹ මහාධිකරණ විනිසුරු ආදිත්‍ය පටබැඳිගේ මහතා විසින් මෙම තීන්දුව ලබාදුනි.

තීන්දුව දෙමින් විනිසුරුවරයා සඳහන් කළේ මෙම නඩුවේ විත්තිකරු පැමිණිලිකාර මුසම්මිල් මන්ත්‍රීවරයාගේ අදහස් වෙනස් කිරීමේ අරමුණින් මුදල් ලබාදී ඇති බව පැමිණිල්ල විසින් සාධාරණ සැකයකින් තොරව ඔප්පු කර ඇති බවය.

පැමිණිලිකාර මුසම්මිල් මන්ත්‍රීවරයාට විදේශගතවීම සඳහා විත්තිකරු විසින් එම මුදල ලබාදුන් බව ඔහුගේ විත්තිවාචකයේ සඳහන්වේ.

එහෙත් එම කටයුත්ත සඳහා මුදල් ලබාදුන් බව ඔප්පු කිරීමට විත්තිය අසමත්වූ බව විනිසුරුවරයා සඳහන් කළේය.

ඒ අනුව විත්තිකරුට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පුකර ඇතැයි කී මහාධිකරණ විනිසුරුවරයා ජනාධිපතිවරයා තෝරා පත්කර ගැනීමේ පනතේ 80 (1)අ වගන්තියේ සඳහන් වරද විත්තිකරු විසින් සිදුකර ඇතැයි තීන්දු කරමින් මෙම නියෝගය ලබා දී ඇත.