බණ්ඩාරගම අඹුසැමි යුවළක් බූරූ මුණාට රැකවරණය දීලා !

හංවැල්ල ආපනශාලාවකට පැමිණ එහි හිමිකරු ඝාතනය කිරීම ඇතුළු ඝාතන 13කට සම්බන්ධ මේ වනවිට පළාගොස් සිටින “බූරූ මූණා” නම් සැකකරුට රැකවරණය දුන් බණ්ඩාරගම ප්‍රදේශයේ පදිංචි අඹුසැමි යුවළක් අත්අඩංගුවට පත්ව තිබේ.

පොලිස් විශේෂ කාර්ය බළලකාය සඳහන් කළේ, අත්අඩංගුවට පත් අඹුසැමි යුවලේ පිරිමි පුද්ගලයා ශ්‍රී ලංකා නාවික හමුදාවේ සක්‍රීය සේවයේ නියුතු සාමාජිකයෙකු බවය.

2022 වසරේ දෙසැම්බර් 18 වැනිදා හංවැල්ල ආපනශාලාවකට පැමිණ එහි හිමිකරු ඝාතනය කිරීම ඇතුළු ඝාතන 13කට සම්බන්ධ බව පැවසෙන “බූරූ මූණා” නම් සැකකරු ව්‍යාජ ගමන් බලපත්‍රයක් යොදාගෙන ඩුබායි බලා යාමට කටුනායක ගුවන් තොටුපොළ වෙත පැමිණ තිබුණේ පසුගිය පෙබරවාරි 24 වැනිදාය.

ආගමන විගමන නිලධාරීන් ඒ පිළිබඳ පොලීසිය දැනුවත් කිරීමෙන් අනතුරුව සැකකරු ගුවන් තොටුපොළ පොලීසිය විසින් අත්අඩංගුවට ගනු ලැබීය.

පසුව සැකකරුගේ සුවදුක් විමසීමට භික්ෂූන් වහන්සේ තුන්නමක් පැමිණ තිබූ අතර ඒ අතරවාරයේ “බූරු මූණා” මෝටර් රථයකින් පළාගොස් තිබුණි.

කෙසේවෙතත් අත්අඩංගුවේ පසුවන අවස්ථාවේදී සැකකරු පාපෝච්ඡාරණය කර තිබුණේ, හංවැල්ල ආපනශාලාවේ හිමිකරු ඝාතනයෙන් පසු බණ්ඩාරගම, මිල්ලනිය මල්වත්ත පාරේ පිහිටි නිවසක සැඟව සිටි බවය.

ඒ අනුව පොලීසිය විමර්ශන දියත් කළ අතර එහිදී අනාවරණය වූයේ “බූරූ මූණා”ට රැකවරණය දුන් නිවසේ අඹුසැමි යුවළ ප්‍රදේශයෙන් පළාගොස් ඇති බවය.

වැඩිදුරටත් සිදුකළ පොලිස් විමර්ශනවල ප්‍රතිඵලයක් ලෙස පළාගිය සැකකාර අඹුසැමි යුවළ ඊයේ (05)නුවරඑළිය ප්‍රදේශයේදී පොලිස් විශේෂ කාර්ය බළකායේ අත්අඩංගුවට පත්වුණි.

එහිදී අනාවරණ වූයේ 35 හැවිරිදි සැකකාර පිරිමි පුද්ගලයා ශ්‍රී ලංකා නාවික හමුදාවේ සාමාජිකයෙකු බවය.

නාවික හමුදාවේ සක්‍රීය සේවයේ නියුතු එම සැකකරු අදාළ සිද්ධියෙන් පසු සේවයට වාර්තා කර තිබුණේ නැහැ.

සැකකාර “බූරූ මූණා” පළායාමේ සිද්ධිය සම්බන්ධයෙන් හිමිවරුන් දෙදෙනෙක් අත්අඩංගුවට පත්වූ අතර කටුනායක ගුවන් තොටුපොළ පොලීසියේ සැරයන්වරයාද රක්ෂිත බන්ධානාගාර ගත කෙරුණි.