ලංකාවට බහුලවම මත්ද්‍රව්‍ය එන තැන ගැන මල්වතු නා හිමියන්ගෙන් හෙළිදරව්වක් !

මෙරටට මත්ද්‍රව්‍ය බහුලව ඇදී එන්නේ මැදපෙරදිග හා ඇතැම් මුස්ලිම් රටවල් ඔස්සේ බැවින් ඒ සම්බන්ධව විශේෂ අවධානයක් අදාළ රටවල් යොමුකළ යුතුව තිබෙන බව මල්වතු මහ නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහ නාහිමියෝ පලස්තීන, ඊජිප්තු සහ එක්සත් අරාබි එමීර් රාජ්‍ය තානාපතිවරු හමුවේ පැවැසූවා.

මත්ද්‍රව්‍ය හේතුවෙන් මේ රටේ ජනතාව ජාති, ආගම් භේදයෙන් තොරව විශාල පීඩාවකට පත්ව සිටින බවත් පවුල් කැඩී බිඳී, ළමයින් අසරණභාවයට පත්ව ඇති බවත් මෙම මත්ද්‍රව්‍ය ජාවාරම්කරුවන්ට වැට බැඳීමට මුස්ලිම් රටවල් අත්වැල් බැඳගත යුතුව තිබෙන බවත් මත්ද්‍රව්‍ය පිටුදැකීමට මුළු ලෝකයම එක්විය යුතු බවත් උන්වහන්සේ සඳහන් කළා.

ශ්‍රී ලංකාවේ පලස්තීන තානාපති Zuhair M.H.Dar Zaid ඊජිප්තු තානාපති Maged Monieldin Nafei Mosleh, එක්සත් ආරාබි එමීර් රාජ්‍යයේ තානාපති Khaled Nasser Sulaiman AlAmeri යන මහත්වරු පෙරේදා (18) මල්වතු මහා විහාරයට ගොස් එම පාර්ශ්වයේ මහ නායක අතිපූජ්‍ය තිබ්බටුවාවේ ශ්‍රී සිද්ධාර්ථ සුමංගල මහ නාහිමියන් බැහැදැක අරාබි කවුන්සිලයේ රටවල් ශ්‍රී ලංකාවට දක්වන සහයෝගය සම්බන්ධව උන්වහන්සේ දැනුවත් කළා.

මෙම අවස්ථාවට මල්වතු පාර්ශ්වයේ කාරක සංඝ සභික මහවෙල රතනපාල නාහිමියෝද සහභාගි වූවා.

ශ්‍රී ලංකාවේ සිංහල හා මුස්ලිම් ජනතාව සමඟියෙන් හා සහජීවනයෙන් ජීවත්වන බවත් ඔවුන් අතර මතභේද නිර්මාණය කර බෙදීම් ඇති කරන්නේ පටු අරමුණු මුල් කරගත් ඇතැම් දේශපාලනඥයන් බවත් මහ නාහිමියෝ ප්‍රකාශ කර සිටියා.

බලය සඳහා ඇතැම් දේශපාලනඥයන් ජනතාව සිංහල, දෙමළ හා මුස්ලිම් ලෙස බෙදා වෙන් කරන බවත් මේ නිසා ශ්‍රී ලංකාවේ ජනතාව අතර ජාති හා ආගම් වශයෙන් බෙදීම් පවතින බවට ජාත්‍යන්තරයට වැරැදි පණිවුඩයක් යන බවත් උන්වහන්සේ සඳහන් කළා.

මෙරට සියලු ජන කොටස් බිම් මට්ටමේ ඉතා සාමයෙන් හා සහජීවනයෙන් ජීවත්වන බවත් මහනුවර මෙන්ම රිදියගම මුස්ලිම් පල්ලි ඉදිකර තිබෙන්නේ බෞද්ධ විහාරස්ථානවලට අයත් ඉඩම්වල බවත් මහ නාහිමියෝ ප්‍රකාශ කළා.

අරාබි කවුන්සිලයට අයත් රටවල් මඟින් ශ්‍රී ලංකාවට දක්වන සහයෝගය අගය කරන බවද මහ නාහිමියෝ අවධාරණය කර සිටියා.

ජාතියක්, ආගමක් හෝ ආගමික සිද්ධස්ථානයක් ඉලක්ක දියත් කරන ප්‍රචණ්ඩත්වය හෙළා දැකිය යුතු බවත් අරාබි කවුන්සිලයේ රටවල් ජාතික හා ආගමික සහජීවනය වෙනුවෙන් කටයුතු කරන බවත් ස්වෛරීත්වයට හානි නොවන පරිදි ශ්‍රී ලංකාවේ අභ්‍යන්තර ගැටලු නිරාකරණය කර ගැනීම සඳහා ගල්ෆ් කලාපීය රටවල සහයෝගය හිමිවන බවත් එම කලාපයේ තානාපතිවරු පැවැසූවා.

පාස්කු ප්‍රහාරය වැනි ම්ලේච්ඡ ක්‍රියා අරාබිකරයේ රටවල් අනුමත නොකරන බවද බුදු දහමේ අන්තර්ගතය මෙන්ම මුස්ලිම් ආගමද අවිහිංසාවාදය පිළිගන්නා බවද ජාතීන් අතර ගැටුම් දුරලීම සඳහා පාප් වහන්සේ සමඟ මුස්ලිම් ඉමාම්තුමා වර්ෂ 2019දී එකඟතාවකට පැමිණි බවද ඊජිප්තු තානාපතිවරයා කියා සිටියා.

මේ අයුරින් ශ්‍රී ලංකාවේ පවතින සහජීවනය තව දුරටත් ශක්තිමත් කිරීම අපේක්ෂා කරන බවත් ඒ වෙනුවෙන් මහ නායක හිමියන් ලබාදෙන සහයෝගයට කෘතවේදී වන බවද හෙතෙම සඳහන් කළා