බැටළු හිස් 2,000ක් ඊජිප්තුවෙන් මතුවේ (PHOTOS)

ටොලමියානු යුගයට අයත් මමීකෘත බැටළු හිස් 2,000ක් සහ ඉපැරණි මාලිගාවකට අයත් ව්‍යුහයක් සොයා ගන්නට නිව් යෝර්ක් විශ්වවිද්‍යාලයේ පුරාණ ලෝකය පිළිබඳ අධ්‍යයනය සඳහා වූ ආයතනයේ පර්යේෂකයන් පිරිසකට හැකි වූ බව රොයිටර්ස් පුවත් සේවය වාර්තා කරනවා.

ඒ දකුණු ඊජිප්තුවේ පුරාණ නගරයක් වන ඇබිඩෝස් හි II වන රැම්සෙස්ට අයත් ඉපැරණි පූජාභූමියකින් බවයි පර්යේෂකයන් අනාවරණය කළේ.

දෙවන රැම්සෙස්ගේ මරණයෙන් වසර 1,000කට පසුවත් ඔහු කෙරේ ගෞරව බහුමානයෙන් පැවැත් වූ දිව්‍ය පූජාවක පූජා අංග ලෙස මෙම සත්ත්ව හිස් සැලකිය හැකි බවයි එම පර්යේෂකයන් පැවසුවේ.

මේවා අතර මමීකෘත බැටළුවන්, බල්ලන්, වල් එළුවන්, එළදෙනුන්, ගවයින් සහ මැංගුස් බැටළු හිස් ද වූ බවයි ඊජිප්තු සංචාරක හා පුරාවස්තු අමාත්‍යාංශය සඳහන් කරන්නේ.

මෙම සොයාගැනීම් මගින් ක්‍රිස්තු පූර්ව 30දී සිදු වූ රෝම ආක්‍රමණය තෙක් සියවස් තුනක් පමණ පැවති ටොලමියානු යුගය දක්වා
වන පුරාවිද්‍යාත්මක දැනුම පුළුක් කරන බවයි පර්යේෂක කණ්ඩායම සඳහන් කරන්නේ.

මෙම පුරාවස්තු හමු වූ ඇබිඩෝස්හි (Abydos) නම් පුරාවිද්‍යාත්මක භූමිය; කයිරෝ අගනුවරට දකුණින් 270 සැතපුම් (435 km) පමණ දුරින් පිහිටි සොහාග් නම් ප්‍රදේශයේ පිහිටා ඇති ඊජිප්තුවේ ප්‍රධානත ම පුරාවිද්‍යාත්මක ස්ථානවලින් එකක්.

පුරාණයේ නෙක්‍රොපොලිස් ලෙස හැඳින් වූ වත්මන් ඇබිඩෝස් (Abydos) පූජා භූමිය ඔසිරිස් දෙවියන්ට නමස්කාර කිරීම සඳහා ඉදි වූ වන්දනා මධ්‍යස්ථානයක්.

නිව් යෝර්ක් විශ්වවිද්‍යාලයේ පුරාණ ලෝකය පිළිබඳ අධ්‍යයනය සඳහා වූ ආයතනයේ මෙහෙයුමක් මගින් කැණීම් සිදු කරන ලද මෙම කැණීමේ දී මමීකෘත සත්ව නටබුන් සමඟින්, හයවන රාජවංශයේ පැරණි රාජධානියට අයත් මීටර් පහක් පමණ ඝන බිත්ති සහිත විශාල මාලිගාවේ ව්‍යුහයක් සහ ප්‍රතිමා කිහිපයකට අමතරව, පැපිරස් පත්‍ර, පැරණි ගස් අවශේෂ, සම් ඇඳුම් සහ සපත්තු ද සොයා ගෙන තිබෙනවා.

කෙසේ නමුත් සොයා ගන්නා ලද මෙම ව්‍යුහය “රැම්සෙස් II දේවාලය ඉදිකිරීමට පෙර ඇබිඩෝස්හි පුරාණ භූ දර්ශනය පිළිබඳ හැඟීම නැවත ස්ථාපිත කිරීමට” උපකාර විය හැකි බවයි පර්යේෂණ මෙහෙයුමේ ප්‍රධානී සමේ ඉස්කැන්ඩර් පවසන්නේ.