සුධර්මා නෙත්තිකුමාරගේ නිවසේ මෙහෙකාරිය පොලිස් අත්අඩංගුවේදී මිය යෑම ගැන පොලිස් නිළධාරීන් හතරකගේ වැඩ තහනම් !

සුධර්මා නෙත්තිකුමාරගේ නිවසේ මෙහෙකාරිය පොලිස් අත්අඩංගුවේදී මියයෑමේ සිද්ධිය සම්බන්ධයෙන් වැලිකඩ පොලිසියේ උප පොලිස් පරීක්ෂකවරයෙක් ඇතුළු නිලධාරීන් සිව් දෙනෙකුගේ වැඩ තහනම් කළ බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ නිහාල් තල්දුව මහතා පැවසීය

වැඩ තහනම් කර ඇත්තේ උප පොලිස් පරීක්ෂකවරයෙකු , පොලිස් සැරයන්වරුන් දෙදෙනකු සහ පොලිස් කොස්තාපල්වරයෙකු ගේය.

ඊට අමතරව පොලිස් කොස්තාපල්වරයෙක් සහ කාන්තා පොලිස් කොස්තාපල්වරියන් දෙදෙනෙක් කොළඹ උතුර කොළඹ මධ්‍යම හා කොළඹ දකුණු කොට්ඨාස වෙත මාරුකර යවා ඇත.

තවද වැලිකඩ පොලීසියේ ස්ථානාධිපතිවරයා ස්ථාන මාරු කරන ලෙස මහජන ආරක්ෂක අමාත්‍යාංශයේ ලේකම්වරයා වෙත පොලිස්පතිවරයා විසින් නිර්දේශ කර ඇතැයිද මාධ්‍ය ප්‍රකාශකවරයා කීය.

චිත්‍රපට හා ටෙලිනාට්‍ය නිෂ්පාදකවරියක ගේ රන් මුදුවක් සොරා ගැනීමක් සම්බන්ධයෙන් ඉකුත් එකොළොස් වැනි දින වැලිකඩ පොලීසිය මගින් අත්අඩංගුවට ගැනීමෙන් අනතුරුව ස්වසන අපහසුතාවයකින් පෙලුනු බදුල්ල මඩොල්සිම පදිංචිව සිටි ආර් රාජ් කුමාර් 42 තිදරු මව මියගොස් තිබිණි.

අදාළ මරණය සම්බන්ධයෙන් පොලිස්පතිවරයා විසින් විමර්ශනයක් සිදුකරන ලෙස විශේෂ විමර්ශන ඒකකය වෙත කරන ලද නියෝගය අනතුරුව විනය විරෝධී ක්‍රියාවක් සිදු වී ඇති බවට අනාවරණය වී තිබිණි

මෙම මරණය සම්බන්ධයෙන් වැඩිදුර විමර්ශන පොලිස්පති සි ඩි වික්‍රමරත්න මහතා විසින් අපරාධ පරීක්ෂණ දෙපාර්තමේන්තුව වෙත යොමු කර ඇත