ශ්‍රී ලාංකිකයන් සැමට, බදු ලිපිගොනුවක් විවෘත වෙන්නේ මෙහෙමයි !

වසය අවුරුදු 18 සම්පූර්ණ කරන සියලු ශ්‍රී ලාංකික පුරවැසියන්ට බදු ගොනුවක් විවෘත කරන බවත්, එසේ වුව ද සියලු දෙනා බදු ගෙවීම අවශ්‍ය නැති බවත් මුදල් රාජ්‍ය අමාත්‍ය රංජිත් සියඹලාපිටිය පවසයි.

බදු ගොනු අංකය අනුව ඉදිරි සුබසාධක කටයුතු සිදුකරන බවත් ලබන 2024 ජනවාරි 01 වැනි දා සිට මෙම ක්‍රමය ක්‍රියාත්මක කරන බවත් හෙතෙම වැඩිදුරටත් කියා සිටියේය.

විවිධ වෘත්තීන් 14කට අයත් වෘත්තිකයන් ඊයේ (01) සිට දේශීය ආදායම් දෙපාර්තමේන්තුවේ ලියාපදිංචි වීම අනිවාර්ය කරමින් අතිවිශේෂ ගැසට් නිවේදනයක්ද රජය විසින් නිකුත් කර තිබේ.

සේව්‍ය සේවක දෙපාර්ශවය ම එක්ව යම් පුද්ගලයකුට මාසිකව රුපියල් 20,000.00කට වැඩි දායකත්වයක් අර්ථ සාධකඅරමුදලට සපයන්නේ නම් ඔවුන් ද දේශීය ආදායම් දෙපාර්තමේන්තුවේ ලියාපදිංචිවීම අනිවාර්ය වෙයි.

දේශීය අදායම් දෙපාර්තමේන්තුවේ ලියාපදිංචි වීම අනිවාර්ය කර ඇති වෘත්තීන් සහ පුද්ගලයන් පහත දක්වා ඇත.

• ශ්‍රී ලංකා වෛද්‍ය සභාවේ ලියාපදිංචි වෛද්‍යවරුන්. ශ්‍රී ලංකා වරලත් ගණකාධිකාරී ආයතනයේ සාමාජිකයන්.
• ශ්‍රී ලංකා සහතිකලත් කළමනාකරණ ගණකාධිකාරී ආයතනයේ සාමාජිකයන්.
• ශ්‍රී ලංකා ඉංජිනේරු ආයතනයේ සාමාජිකයන්.
• ශ්‍රී ලංකා බැංකුකරුවන්ගේ සංගමයේ සාමාජිකයන්.
• ශ්‍රී ලංකා වාස්තු විද්‍යාඥයින්ගේ සංගමයේ සාමාජිකයන්.
• ශ්‍රී ලංකා ප්‍රමාණ සමීක්ෂකයින්ගේ ආයතනයේ සාමාජිකයන්.
• ශ්‍රේෂ්ඨාධිකරණ නීතීඥවරුන්
• ප්‍රාදේශීය ලේකම් කාර්යාලවල ව්‍යාපාර ලියාපදිංචි කර ඇති පුද්ගලයන්.
• මෝටර් රථ දෙපාර්තමේන්තුවේ වාහන ලියාපදිංචි කර ඇති පුද්ගලයන් (ත්‍රී රෝද රථ, මෝටර් බයිසිකල් සහ අත් ට්‍රැක්ටර් හැර).
• 2018 අප්‍රේල් 01 දින හෝ ඊට පසු ශ්‍රී ලංකාවේ ඕනෑම නිශ්චල දේපලක් ඔප්පු පැවරීම මගින් මිලදී ගෙන ඇති හෝ උරුමය මගින් අත්පත් කරගත් පුද්ගලයන්.
• ඕනෑම අර්ථසාධක අරමුදලට මාසිකව සේව්‍ය සේවක දෙපාර්ශවයෙන්ම එක්ව රු. 20,000ට වැඩි දායකත්ව ලබා දෙයි නම් එම සේවකයන්.
• පළාත් පාලන ආයතනයකින් ගොඩනැගිලි සැලැස්මක් සඳහා අනුමැතිය ලබා ගත් ඕනෑම පුද්ගලයෙක්.
• ශ්‍රී ලංකාව තුළ මාසිකව රු. 100,000.00 ක් හෝ වාර්ෂිකව රු. 1,200,000.00 ක ගෙවීමක් ලබන වෙනත් ඕනෑම අයෙකු

එම ගැසට් නිවේදනය අනුව 2024 ජනවාරි 01 වැනිදා සිට බලපැවැත්වෙන පරිදි වයස අවුරුදු 18ට වැඩි සියලු පුරවැසියන් දේශීය අදායම් දෙපාර්තමේන්තුව ලියාපදිංචි වීම අනිවාර්ය වෙයි.