මහනුවර ප්‍රධාන පාසලක ගුටි කෙළියක් – විකට් පොලුවලින් පහර කෑ සාමාන්‍ය පෙළ සිසුවෙකු රෝහලේ !

මහනුවර, කටුගස්තොට ප්‍ර්‍රධාන පෙලේ පාසලක ඇති වූ ගැටුමකදී සිසුන් පිරිසක් විසින් තවත් සිසුවෙකුට විකට් පොලුවලින් පහර දී තිබෙනවා.

එම පහරදීමෙන් තුවාල ලැබූ සිසුවා ප්‍රතිකාර සඳහා ඇතුළත් කර ඇත්තේ මහනුවර ජාතික රෝහලටයි.

මෙලෙස පහර කෑමට ලක්ව ඇත්තේ මෙවර අපොස සාමාන්‍ය පෙළ විභාගයට පෙනී සිටින සිසුවෙකු වන අතර, පහරකෑම හේතුවෙන් අදාළ සිසුවාට ඊයේ ලබාදුන් ගණිතය දෙවන ප්‍ර්‍රශ්න පත්‍රයට පෙනී සිටීමේ අවස්ථාව ද මග හැරී තිබෙනවා.

මහනුවර ජාතික රෝහලේ අධ්‍යක්ෂ වෛද්‍ය ඉරේෂා ප්‍රනාන්දු මහත්මිය සඳහන් කළේ, මෙම සිසුවාට පාසල වෙත ගොස් විභාගයේ ඉදිරි විෂයයන් සඳහා පෙනී සිටීමට අපහසු නම් ඔහුට රෝහලේ සිට විභාගයට පෙනී සිටීම සඳහා තම අවසරය ලබා දුන් බවයි.

සිසුවා ගණිතය පළමු ප්‍රශ්න පත්‍රයට පිළිතුරු ලියා සිසුන් පිරිසක් සමඟ විදුහලේ ආපනශාලාව වෙත ගොස් දෙවන ප්‍රශ්න පත්‍රයට පෙනී සිටීමට යමින් සිටිය දී, එම සිසුවා ඉගෙනුම ලබන පන්තියේම තවත් සිසුන් පිරිසක් ඔහුට විභාගයට පෙනී සිටීමට අවස්ථාව ලබා නොදෙන බව පවසමින් පහරදීම සිදු කර ඇති බවයි වාර්තා වන්නේ.

සිසුවාට පහර දුන් සිසුන් පිරිස කිසියම් අධ්‍යාපනික හේතුවක් මත ඔහු සමග අමනාපයෙන් සිටි බව ද වාර්තා වනවා.