සීගිරි චිත්‍ර විනාශ වී යාමේ අවදානමක් !

සීගිරි චිත්‍ර විනාශ වී යාමේ අවදානමට ලක්ව ඇති බව පෙනෙන්නට තිබේ.

ශ්‍රී ලංකාවේ ඇති වටිනාම චිත්‍ර ලෙස අවිවාදයෙන් හැඳින්විය හැකි සීගිරි සිතුවම් නැරඹීම සඳහා විදේශිකයකු ගෙවිය යුතු මුදල ඇමෙරිකානු ඩොලර් 30කි. ශ්‍රී ලංකාවට පැමිණෙන විදේශීය සංචාරකයන්ගෙන් අති බහුතරයක් අනිවාර්යයෙන්ම සීගිරි චිත්‍ර නැරඹීමට පැමිණෙන බැවින් මෙරට වැඩිම ආදායම් ලබන පුරාවිද්‍යා ස්ථානය වන්නේ සීගිරියයි.

සූර්යාලෝකය සෘජුව මේ චිත්‍ර මත පතිතවීමෙන් චිත්‍ර විනාශ වී යා හැකි බැවින් ඒ සඳහා වසර ගණනාවක සිට විශේෂ ආවරණයක් සවිකර ඇති අතර එම චිත්‍ර මත කෘතිම ආලෝකය පතිතවීමෙන් පවා හානියක් සිදුවිය හැකි බැවින් ඡායාරූප ගැනීම ද තහනම් කර තිබේ.

නමුත්, සීගිරි චිත්‍ර සඳහා යොදා ඇති ආවරණය තැන තැන ඉරී ගොස් කෑලි එල්ලා වැටෙන අතර ස්ථාන කිහිපයකින්ම සිදුරු සෑදී සූර්යාලෝකය සීගිරි චිත්‍ර මත සෘජුව පතිතවන ආකාරය නිරීක්ෂණය කළ හැකිය.

පුරාවිද්‍යා දෙපාර්තමේන්තුව සහ මධ්‍යම සංස්කෘතික අරමුදලේ සංරක්ෂණ විශේෂඥයන්ට අනුව සීගිරි චිත්‍ර මත සූර්යාලෝකය හෝ කෘතිම ආලෝක කදම්භ පතීතවීම චිත්‍ර විනාශ වී යාමට හේතුවක් වුව ද දැන් එහි ඇති තත්වය ගැන ඔවුන්ගේ කිසිදු තැකීමක් ඇති බවක් පෙනෙන්නට නැත.

වසරකට ලක්ෂ ගණනක් විදේශීය සංචාරකයන් පැමිණ මුදල් ගෙවා නරඹන සීගිරි චිත්‍ර සඳහා යොදා ඇති මේ විශේෂ ආවරණය තැන තැන ඉරී කඩමාලු බවට පත්ව ඇති ආකාරය ද ලජ්ජා සහගතය. මේ සිතුවම් වෙනත් රටක් සතුවූයේ නම් මේවාට මීට වඩා ආරක්ෂාවක් සහ වටිනාකමක් ලැබෙනු ඇත. එහි පැමිණෙන විදේශිකයන්ට මේ කඩමාළු දකිනවිට ශ්‍රී ලංකියන් මෙවැනි පුරාවිද්‍යාත්මක ස්ථානවලට දෙන වටිනාකම ගැන ඔවුන් යම් තක්සේරුවක්ට එළඹෙනු ඇත.

සීගිරිය පාලනය වන්නේ මධ්‍යම සංස්කෘතික අරමුදල යටතේ වුව ද සීගිරි චිත්‍රවල භාරකාරත්වය ඇත්තේ පුරාවිද්‍යා දෙපාර්තමේන්තුව සතුවය. එබැවින් අපි පුරාවිද්‍යා දෙපාර්තමේන්තුවේ අධ්‍යක්ෂ ජනරාල් මහාචාර්ය අනුර මනතුංගගෙන් මේ පිළිබඳ විමසූ විට හෙතෙම මෙසේ කීවේය.

“ සීගිරි චිත්‍ර ආවරණය කරලා තියෙන්නේ හිරු එළියෙන් එම චිත්‍රවලට ආරක්ෂාවක් ලැබිය යුතු නිසා. ඒ ආවරණය සිදුරුවෙලා ද කියා ඇත්තටම මා පුද්ගලිකව නම් දැනගෙන සිටියේ නැහැ. අදම ඒ ගැන සොයා බලා අවශ්‍ය පියවර හැකි ඉක්මණින් ගන්නම්. ස්තූතියි ඒ ගැන දැනුම්වත් කළාට”

අප ඔහු ඇමතුවේ මිට දින කිහිපයකට පෙර දී ය. පසුගිය 09වැනිදා වනවිට පුරාවිද්‍යා අධ්‍යක්ෂ ජනරාල්වරයා අප සමඟ පැවසූ පරිදිම ඊට පිළියම් යෙදීම සඳහා අවශ්‍ය පියවර ගනිමින් සිටින බව අප වෙත වාර්තා වේ. චිත්‍ර පිහිටි ස්ථානයේ නව ආවරණයක් සැකසීමට මේ වනවිට පියවර ගනිමින් සිටියි.