ශ්‍රී ලාංකිකයින් 07දෙනෙකු INTERPOL රතු ලැයිස්තුවට ඇතුලත් කෙරේ !

ජාත්‍යන්තර පොලිසිය හෙවත් INTERPOL මගින් රතු නිවේදන ලැයිස්තුව යටතේ ලැයිස්තුගත කර ඇති පළා ගිය පුද්ගලයින් 6,872 අතරින් 07 දෙනෙකු ශ්‍රී ලාංකිකයින් බව වාර්තා වනවා.

එම හත් දෙනාගෙන්, හතර දෙනෙකු ශ්‍රී ලංකාවේ ‘අවශ්‍ය’ ලෙස ලැයිස්තුගත කර ඇති අතර අනෙක් ශ්‍රී ලාංකිකයින් තුන්දෙනාට ඔවුන්ගේ ප්‍රදේශ තුළ සිදු කළ අපරාධ සම්බන්ධයෙන් කරන ලද ඉල්ලීම් මත රතු නිවේදන නිකුත් කර ඇති බව සඳහන්.

ජාත්‍යන්තර පොලිසියේ රතු නිවේදනයක් යනු පිටුවහල් කිරීමට, යටත් වීමට හෝ ඒ හා සමාන නීතිමය ක්‍රියාමාර්ග ගැනීමට නියමිතව සිටින පුද්ගලයෙකු සොයා ගැනීම සහ තාවකාලිකව අත්අඩංගුවට ගැනීම සඳහා ලොව පුරා නීතිය ක්‍රියාත්මක කරන බලධාරීන්ගෙන් කරනු ලබන ඉල්ලීමක් වනවා.

ඉන්ටර්පෝල් සිය වෙබ් අඩවියේ පළ කර ඇති දත්තවලට අනුව, අවශ්‍ය බවට ලැයිස්තුගත කර ඇති හතර දෙනා අතර,

38 හැවිරිදි සොයිසා ජගමුනි සුජීව නොහොත් කොස්ගොඩ සුජී,
49 හැවිරිදි නඩරාජා සිවරාජා,
50 හැවිරිදි මුනිසාමි තර්මසීලන්,
35 හැවිරිදි වික්නරාසා සෙල්වන්තන්,
වවුනියාවේ කුමාරසාමි නවනීතාන,
61 හැවිරිදි මොහොමඩ් පව්මි,
41 හැවිරිදි මානික්කවාසගර් විජයරාජා

මිනීමැරුම් නඩුවක් සම්බන්ධයෙන් කොස්ගොඩ සුජීට සහ දිවංගත අමාත්‍ය ලක්ෂ්මන් කදිරගාමර් මහතා ඝාතනය කිරීමට ආධාර අනුබල දීම සම්බන්ධයෙන් නඩරාජා සිවරාජාට මෙම රතු නිවේදන නිකුත් කර ඇති බවයි එහි දැක්වෙන්නේ.

තර්මසීලන් අත්බෝම්බ දෙකක් සහ ජීව උණ්ඩ 200 ක් ළඟ තබා ගැනීම සම්බන්ධයෙන් අවශ්‍යව සිටින අතර සෙල්වන්තන්ට සොරකම් සහ මිනීමැරුම් සම්බන්ධයෙන් චෝදනා එල්ල වී තිබෙනවා.

මේ අතර, අනෙකුත් ශ්‍රී ලාංකිකයන් තුන් දෙනා පිළිබඳ තොරතුරු INTERPOL මගින් තොරතුරු අනාවරණ කරනවා. ඒ අනුව වවුනියාවේ කුමාරසාමි නවනීතාන මිනීමැරුමක් සම්බන්ධයෙන් රුමේනියාවට අවශ්‍යව සිටින අතර ඇලබොඩගම පදිංචි 61 හැවිරිදි මොහොමඩ් පව්මි ව්‍යාජ මුදල් නෝට්ටු සම්බන්ධයෙන් ඉන්දියාවට සහ යාපනයේ පදිංචි 41 හැවිරිදි මානික්කවාසගර් විජයරාජා කැනඩාවට අවශ්‍යව සිටිනවා.

මේ අතර, තවත් ශ්‍රී ලාංකිකයන් පස් දෙනෙකුට ජාත්‍යන්තර පොලිසිය කහ නිවේදන නිකුත් කර තිබෙනවා. කහ නිවේදන නිකුත් කරනු ලබන්නේ අතුරුදන්වූවන්, බොහෝ විට බාලවයස්කරුවන් සොයා ගැනීමට හෝ තමන්ව හඳුනා ගැනීමට නොහැකි පුද්ගලයින් හඳුනා ගැනීමට උපකාර කිරීමටයි.