කොළඹ ප්‍රසිද්ධ කාන්තා විදුහලක දස හැවිරිදි දැරියක් කාමාතුරයින්ට බිලි වෙයි !

කොළඹ ප්‍රසිද්ධ කාන්තා විදුහලක ඉගෙනුම ලබන 10 හැවිරිදි සිසුවියක් ව අවස්ථා 8කදී බරපතළ අන්දමින් දූෂණය කර ඇති බව කියන සිද්ධියක් වාර්තා වී තිබේ.

දැරියගේ සිරුරේ ඇතැම් ප්‍රදේශ දුම්වැටිවලින් පුළුස්සා ඇති අතර සිද්ධියට සම්බන්ධ සැකකරුවන් සොයා විමර්ශන පවත්වන බව පොලීසිය අධිකරණයට ඊයේ (22) දැනුම්දී තිබුණි.

සිද්ධියට මුහුණදී ඇත්තේ මෙවර ශිෂ්‍යත්ව විභාගය සඳහා පෙනීසිටීමට නියමිත දැරියකි.

කොළඹ ප්‍රධාන මහෙස්ත්‍රාත් අධිකරණය නියෝග කළේ, කොළඹ රිජ්වේ ආර්යා ළමා රෝහලට ඇතුළත් කර දැරියට ප්‍රතිකාර ලබාදෙන ලෙසටය.

වැල්ලම්පිටිය පොලීසිය මගින් දැරිය සම්බන්ධයෙන් ලබාගත් අධිකරණ වෛද්‍ය වාර්තා අධිකරණය හමුවේ ඉදිරිපත් කර තිබුණි.

එම වෛද්‍ය වාර්තා සැලකිල්ලට ගෙන දැරිය මව භාරයේ රෝහල්ගත කරන ලෙස අධිකරණය වැඩිදුරටත් නියම කළේය.

දූෂණයට ලක්වී ඇති සිසුවියගේ හැසිරීමේ වෙනසක් දුටු පන්තිභාර ගුරුවරිය දැරියව වැල්ලම්පිටිය පොලීසිය වෙත රැගෙන ගොස් තිබුණි.

ඒ අනුව දැරිය අධිකරණ වෛද්‍ය නිලධාරීවරයා හමුවට ඉදිරිපත් කර තිබෙන අතර, එහිදී දැරිය අවස්ථා 8 කදී පමණ බරපතළ අන්දමින් දූෂණයට ලක්වී ඇතැයි අනාවරණය වූ බව පොලීසිය අධිකරණයට දන්වා සිටියේය.

දැරිය ප්‍රකාශ කළ අන්දමට කොළඹ පිහිටි පාසලක සිසුවෙකුගේ නමක් සඳහන් කර තිබෙන අතර, ඒ අනුව එම පාසලේ අදාළ නම සඳහන් සියලු සිසුන් පොලීසිය වෙත කැඳවා දැරියට පෙන්වා තිබෙන නමුත් දැරිය විසින් අදාළ සිසුවා හඳුනානොගත් බවද පොලීසිය සඳහන් කරයි.

ඒ අනුව මෙම දැරිය දූෂණය කරන ලද පුද්ගලයින් වහාම අත්අඩංගුවට ගන්නා ලෙස අධිකරණය පොලීසියට නියම කළේය.