මෙරට එකම ළමා විකිරණවේදය පිළිබඳ විශේෂඥ වෛද්‍යවරයාත් රට හැරයයි !

ළමා විකිරණවේදය පිළිබඳ ශ්‍රී ලංකාවේ එකම විශේෂඥ වෛද්‍යවරයා රට හැර ගොස් ඇති බව Specialist doctorsන්ගේ සංගමයේ වෛද්‍ය අශෝක ගුණරත්න මහතා පවසනවා.

මාධ්‍ය අමතමින් ඔහු කියා සිටියේ, 2024 සහ 2025 වන විට සෞඛ්‍ය ක්ෂේත්‍රයට අවම වශයෙන් විශේෂඥ වෛද්‍යවරුන් 4,000ක් අවශ්‍ය වනු ඇති බවට මීට පෙර ගණන් බලා තිබූ බවයි.

නමුත් මේ වනවිට සිටින්නේ ඉන් 50%ක් (වෛද්‍යවරුන් 2,000) පමණක් බවයි වාර්තා වන්නේ.

මීට අමතරව හදිසි ප්‍රතිකාර ඒකකවලට අනුයුක්තව සිටි වෛද්‍යවරුන් 30 දෙනෙකු පුහුණු කර විශේෂඥ වෛද්‍යවරුන් ලෙස පත් කළ නමුත් ඔවුන්ගෙන් 20 දෙනෙකු සංක්‍රමණය වී ඇති බව සඳහන්.

එමෙන්ම 2024 සහ 2025 වන විට නිර්වින්දන වෛද්‍යවරුන් 289 ක් සිටින බවට ඇස්තමේන්තු කර තිබුණා.

නමුත් මේ වනවිට ඉතිරිව ඇත්තේ නිර්වින්දන වෛද්‍යවරුන් 155 ක් පමණක් බවත් ඔවුන්ගෙන් 30 ක් සංක්‍රමණය වී ඇති බවත් සඳහන්.

ඉතිරි නිර්වින්දන වෛද්‍යවරුන් වයස අවුරුදු 60 දී විශ්‍රාම ගියහොත් සෞඛ්‍ය අංශයට තවත් නිර්වින්දන වෛද්‍යවරුන් 20 ක් අහිමි වන බවද ඔහු සඳහන් කළා.

එමෙන්ම මේ වසර අවසන් වනවිට සංක්‍රමණය නොවූ විශේෂඥ වෛද්‍යවරුන් සහ නිර්වින්දන වෛද්‍යවරුන් 100ක් පමණක් ඉතිරිවන බවයි ඔහු පැවසුවේ.

තවද වෛද්‍යවරයා සඳහන් කළේ, මෙරටට ළමා විකිරණවේදය පිළිබඳ එක් විශේෂඥ වෛද්‍යවරයෙක් සිටි බවත් ඔහු මේ වනවිට විදේශගතව ඇති බවයි.

මීට අමතරව බොහෝ විශේෂඥ වෛද්‍යවරු සංක්‍රමණය වීමට හේතු ලෙස සඳහන් කර ඇත්තේ.,
1) නිල නිවාස නොමැතිකම මෙන්ම ඉතාමත් සුළු පහසුකම් ලබාදීම.
2) දරුවන් පාසල්වලට ඇතුළත් කර ගැනීමට ක්‍රමයක් නොමැතිකම.

එබැවින් වෛද්‍යවරුන් සංක්‍රමණය වීම නැවැත්වීමට අවශ්‍ය නම් රජය මෙම ප්‍රශ්න දෙස බැලිය යුතු බවයි වෛද්‍ය ගුණරත්න මහතා පැවසුවේ.