වනිඳු හසරංගට ICCයෙන් දඩ – තරඟ තහනම් වීමේ අවදානමක් !

නෙදර්ලන්තයට එරෙහිව බුලවායෝහිදී පැවති ලෝක කුසලාන ක්‍රිකට් තරගාවලියට සුදුසුකම් ලැබීමේ තරගයේ දි වනිඳු හසරංගට නිල තරවටු කිරීමක් සිදුකර තිබෙනවා.

ඒ ICC චර්‍යාධර්ම පද්ධතියේ පළවෙනි මට්ටම කඩ කිරීම සම්බන්ධයෙන්.

එමෙන් ම තරග ගාස්තුවෙන් සියයට 50ක දඩ මුදලක් වනිදු හසරංගට හිමි වූ බවයි වාර්තා වෙන්නේ.

නෙදර්ලන්තය සමඟ පැවති තරඟයේ දැවී ගිය වනිඳු හසරංග නැවත ක්‍රීඩා මණ්ඩපයට පැමිණි පසු පිත්තෙන් හතරේ සීමාවට පහර දෙමින් ආක්‍රමණශීලී හැසිරීමක් පෙන්නුම් කළේය.

එහිදී ඔහු ක්‍රීඩක විනය නීති සංග්‍රහයේ 2.2 වගන්තිය උල්ලංඝනය කර ඇති බැවින් ඔහුගේ විනය වාර්තාවට දඩුවම් ලකුණක් ඇතුළත් කිරීමට පියවර ගෙන තිබෙනවා.

එමෙන්ම නිල අනතුරු ඇගවීමක් ද ඔහුට එරෙහිව ලබා දීමටයි පියවර ගෙන ඇත්තේ. මාස 24 ක කාලයක් ඇතුළත ඔහුගේ විනය වාර්තාවට ඇතුළත් කෙරුණු දෙවැනි දඩුවම් ලකුණ මෙයයි. සිය වරද හා තරග තීරක Shaid Wadvalla විසින් ලබා දුන් දඩුවම වනිදු විසින් පිළිගෙන ඇති බැවින් මෙම සිද්ධිය පිළිබද වැඩිදුර විභාගයක් සිදු නොකරන බව අයි.සී.සීය සදහන් කළා.

ක්‍රීඩකයෙකුගේ විනය වාර්තාවේ මාස 24 ක කාලයක් තුළ දී දඩුවම් ලකුණු ප්‍රමාණය 4 ක් හෝ ඊට වැඩි වුවහොත් එම ක්‍රීඩකයා තරග තහනමකට ලක් කෙරෙනවා.

පළමු මට්ටමක වරදක් සිදු කිරීමේ දී ක්‍රීඩකයෙකුට එරෙහිව අවම වශයෙන් නිල අනතුරු ඇගවීමක් සිදු කිරීම හෝ උපරිම වශයෙන් තරග ගාස්තුවෙන් 50% ක දඩ මුදලක් නියම කිරීමට හැකියාව පවතින අතර, දඩුවම් ලකුණු එකක් හෝ 2ක් ද පනවනු ලබනවා.