මාධ්‍ය විසින් නිර්මාණය කලා යැයි පැවසෙන අසත්‍ය පුවතක් සම්බන්ධයෙන් ශ්‍රී ලංකා ක්‍රිකට් ආයතනයෙන් විශේෂ නිවේදනයක් !

නැගී එන කණ්ඩායම් අතර ආසියානු කුසලාන ක්‍රිකට් තරගාවලිය සඳහා සහභාගි වන ශ්‍රී ලංකා ‘ඒ’ කණ්ඩායමේ ක්‍රීඩකයෙකු සාදයකට සහභාගි වීම සඳහා කණ්ඩායම් ප්‍රොටෝකෝලය කඩ කර ඇති බවට හිරු TV විසින් ප්‍රචාරය කරන ලද පුවතකට අදාළව ශ්‍රී ලංකා ක්‍රිකට් ආයතනය ප්‍රකාශයක් නිකුත් කර තිබෙනවා.

‘නැගී එන කණ්ඩායම් අතර ආසියානු කුසලාන’ තරඟාවලියට සහභාගී වන ශ්‍රී ලංකා ‘ඒ’ කණ්ඩායමේ ක්‍රීඩකයෙකු සාදයකට සහභාගී වීම සඳහා කණ්ඩායම් ප්‍රොටෝකෝල උල්ලංඝනය කර ඇති බවට උපුටා දක්වමින් 2023 ජූලි 16 වන දින හිරු TV හි පළ වූ පුවතක් මුළුමනින්ම අසත්‍ය, ගොතන ලද, සහ ද්වේෂ සහගත පුවතක් බව නිවේදනයක් නිකුත් කරමින් ශ්‍රී ලංකා ක්‍රිකට් ආයතනය පවසනවා.

අදාළ ක්‍රීඩකයා ජුලි 15 වැනිදා සවස ඔහුගේ මිතුරෙකුගේ උපන්දින සාදයට සහභාගි වූයේ ඔහුට කළ ආරාධනයකට අනුව බව සඳහන් කරන බවයි එම නිවේදනයෙන් දක්වා ඇත්තේ.

උපන්දින සාදයට සහභාගි වීමට පෙර එම ක්‍රීඩකයා එම ආරාධනාව කණ්ඩායම් කළමණාකරුට දන්වා උත්සවයට සහභාගි වීමට අනුමැතිය ලබාගෙන තිබෙන බව ද එහි සඳහන්.

සාදයට සහභාගී වීමෙන් අනතුරුව, ක්‍රීඩකයා නියමිත පරිදි හෝටලයට පැමිණ ඇති අතර, එය ක්‍රීඩකයින්ට සහ කණ්ඩායම් නිලධාරීන්ට ඔවුන්ගේ හෝටල් කාමරයට පැමිණීමට කණ්ඩායම් කළමනාකාරීත්වය විසින් නියම කරන ලද වේලාවයි.

එබැවින් කළමනාකාරීත්වය විසින් නියම කර ඇති කණ්ඩායම් නීතිය පිළිබඳ කිසිදු දැනුමක් නොමැතිව සහ ශ්‍රී ලංකා ක්‍රිකට් ආයතනය සමඟ ස්වාධීනව කරුණු තහවුරු නොකර පළ කර ඇති මෙම අසත්‍ය වාර්තාව නිවැරදි කිරීමට සුදුසු පියවර ගන්නා ලෙස ශ්‍රී ලංකා ක්‍රිකට් හිරු TV වෙතින් දැඩි ලෙස ඉල්ලා සිටින බව ද එම නිවේදනයේ දැක්වෙනවා.

වැදගත් ජාත්‍යන්තර ක්‍රිකට් තරඟාවලියකට මැදිව සිටින බැවින් නියමිත නිවැරදි කිරීමක් කණ්ඩායමේ සහ එහි ක්‍රීඩකයින්ගේ කීර්ති නාමය සුරැකීමට සහ ඔවුන් ක්‍රීඩාව කෙරෙහි අවධානය යොමු කිරීමට උපකාරී වනු ඇති බව ශ්‍රී ලංකා ක්‍රිකට් ආයතනයේ අදහස බව ද එහි දක්වා තිබෙනවා.