ආසියානු කුසලානයේ තරග කාලසටහන සහ තරගාවලියේ ආකෘතිය නිවේදනය කෙරේ !

2023 ආසියානු කුසලාන ක්‍රිකට් තරගාවලියේ තරග කාලසටහන ආසියානු ක්‍රිකට් කවුන්සලය විසින් අද (19) නිවේදනය කළා.

පාකිස්තානයේ හා ශ්‍රී ලංකාවේ සත්කාරකත්වය යටතේ මෙවර පැවැත්වෙන තරගාවලියට තරග 13 ක් ඇතුළත්.

තරගාවලිය අගෝස්තු 30 වැනිදා සිට සැප්තැම්බර් 17 වැනිදා දක්වා පැවැත්වීමට නියමිතයි. මීට පෙර තරගාවලිය අගෝස්තු 31 වැනිදා ආරම්භ වීමටයි නියමිතව තිබුණේ.

තරගාවලියේ සමාරම්භක තරගය පාකිස්තානය හා නේපාලය අතර මුල්තාන් හී දී පැවැත්වීමට නියමිතයි.

තරගාවලිය යටතේ ශ්‍රී ලංකාව ක්‍රීඩා කරන පළමු තරගය බංග්ලාදේශයට එරෙහිව අගෝස්තු 31 වැනිදා මහනුවර දී පැවැත්වීමට නියමිතව තිබෙනවා.

පාකිස්තානය හා ඉන්දියාව අතර තරගය සැප්තැම්බර් දෙවැනිදා මහනුවර දී පැවැත්වීමට නියමිතයි.

මූලික වටයේ තරග දෙකක් වන බංග්ලාදේශ – ඇෆ්ඝනිස්තාන තරගය හා ශ්‍රී ලංකා – ඇෆ්ඝනිස්තාන තරගය ලාහෝර් හී දී පැවැත්වීමට නියමිත අතර, සුපිරි 4 වටයේ පළමු තරගය ද ලාහෝර් හී දී පැවැත්වීමටයි නියමිතව ඇත්තේ.

සුපිරි 4 වටයේ සෙසු සියලු තරග කොළඹ දී පැවැත්වීමට නියමිත බවයි ආසියානු ක්‍රිකට් කවුන්සලය සදහන් කළේ.

වත්මන් ආසියානු ශූර ශ්‍රී ලංකාව, ඉන්දියාව, පාකිස්තානය, බංග්ලාදේශය, ඇෆ්ඝනිස්තානය හා නේපාලය ක්‍රීඩා කරන තරගාවලියේ මූලික වටයේ තරග කාණ්ඩ දෙකක් යටතේ පැවැත්වීමට නියමිතයි.

පාකිස්තානය, ඉන්දියාව හා නේපාලය A කාණ්ඩයෙන් ද, ශ්‍රී ලංකාව, බංග්ලාදේශය හා ඇෆ්ඝනිස්තානය B කාණ්ඩයෙන් ද තරග වැදීමට නියමිතව තිබෙනවා.

එක් එක් කාණ්ඩයෙන් ප්‍රසාද ලකුණු සටහනේ ඉදිරියෙන් පසුවන රටවල් දෙක බැගින් සුපිරි 4 වටයට සුදුසුකම් ලබන අතර, සුපිරි 4 වටයේ දී ප්‍රසාද ලකුණු සටහනේ ඉදිරියෙන් පසුවන රටවල් දෙක අවසන් මහා තරගය සදහා ක්‍රීඩා කිරීමට නියමිතයි.

ඒ ඒ කණ්ඩායම් මූලික වටයේ දී කුමන ස්ථානයක් හිමි කර ගත්ත ද, පාකිස්තානය A1 ලෙසත්, ඉන්දියාව A2 ලෙසත් සුපිරි 4 වටයේ දී සැලකීමට නියමිතයි.

ශ්‍රී ලංකාව B1 ලෙසත්, බංග්ලාදේශය B2 ලෙසත් සලකනවා. පාකිස්ථානය හෝ ඉන්දියාව වෙනුවට A කාණ්ඩයෙන් නේපාලය සුපිරි 4 වටයට සුදුසුකම් ලබා ගතහොත් සුපිරි 4 වටයට සුදුසුකම් නොලබන රටට හිමි අංකය ( A1 හෝ A2) නේපාලයට හිමි වනු ඇති.

B කාණ්ඩයට ද එය එලෙසම වලංගු වනවා. ඉන්දියාව සහ පාකිස්ථානය යන රටවල් දෙකම සුපිරි හතර වටයට සුදුසුකම් ලබා ගතහොත් එම කණ්ඩායම් දෙක සැප්තැම්බර් 10 වැනිදා කොළඹ දී යළි තරග වැදීමට නියමිතයි.

තරග කාලසටහන –