චාමර සම්පත්ගේ ගැටුමට මැදිවූ පොස්පේට් සමාගමේ සැපයුම් නිලධාරීගේ රාජකාරී වැටුප් රහිතව තහනම් කරයි !

රාජ්‍ය අමාත්‍ය චාමර සම්පත් දසනායකගේ ලංකා රාජ්‍යය පොස්පේට් සමාගමේ නිරීක්ෂණ චාරිකාවක් අතරතුර ඇති වූ උණුසුම් තත්වයක් මත එහි සැපයුම් නිළධාරීවරයාගේ සේවය තහනම් කිරීමට එහි පාලන අධිකාරිය කටයුතු කර තිබෙනවා.

එදින රාජ්‍ය අමාත්‍යය චාමර සම්පත් දසනායකගේ සංචාරය අවස්ථාවේදීද අමාත්‍යයවරයා විසින් එම නිළධාරියාගේ සේවය තහනම් කරන ලෙසට සභාපතිවරියට උපදෙස් ලබා දුන්නා.

ඊයේ (18) දින සිට සේවය තහනම් කළ බවට සැපයුම් නිළධාරී එස්.ඒ අබේසිරිට ලංකා රාජ්‍ය පොස්පේට් ආයතනයේ සාමාන්‍යාධිකාරීවරයා විසින් ලිපියක් මගින් දැනුම් දී තිබෙනවා.

උපුටා ගැනීම

ලංකා පොස්පේට් ලිමිටඩ් ආයතනයේ සැපයුම් නිළධාරී ලෙස කණිෂ්ඨ සේවා ගණයේ තනතුරක සේවය කරනු ලබන ඔබගේ සේවය. ලංකා පොස්පේට් ලිමිටඩ් (රාජ්‍යය සමාගමේ) විනය පාලන නීතී රීතී 2006 (අ) සඳහන් නියමයන්ට අනුව ශ්‍රී ලංකා ප්‍රජාතාන්ත්‍රික සමාජවාදී ජනරජයේ ආයතන සංග්‍රහයේ II වැනි කාණ්ඩ හි XLVIII වැනි පරිච්ජේදයේ 31:1, 31:1:7, 31:1:8 හා 31:5:1 උප වගන්තීන් යටතේ පැවරී ඇති බලතල අනුව වහාම ක්‍රියාත්මක වන පරිදී වැටුප් රහිතව මෙයින් තහනම් කරනු ලැබේ. ඒ අනුව රාජකාරී කටයුතු සඳහා ඔබ භාරයේ ඇති ආයතනය සතු සියළුම ලියකියවිලි/ උපකරණ/ බඩු බාහිරාදිය/ ද්‍රව්‍ය හා ලිපිලේඛන ගණකාධිකාරී වෙත හෝ එම මහතා විසින් නම් කරනු ලබන අයෙකු වෙත විධිමත්ව භාර දී සේවා ස්ථානයෙන් ඉවත් විය යුතුය. වැඩතහනමට ලක්ව සිටින කාළය තුළ මාගේ විධිමත් අවසරයකින් තොරව ඔබට මෙම ආයතන භූමියට ඇතුළු වීමට අවසර නොමැත. වැඩ තහනමට ලක්ව සිටින කාළය තුළ ලිපිගොනු ගනුදෙනු කිරීම සඳහා ඔබගේ ස්ථීර ලිනිය ලිඛිතව දැනුම් දෙන්න. මෙම මුල් පිටපත භාර ගත් බවට මේ සමඟ අමුණා ඇති අනුපිටපතේ අත්සන් කර එම පිටපත අප වෙත ලැබීමට සල්සවන්න.

යැයි වැඩිදුරටත් එම ලිපියෙහි සඳහන්ව

පසුගිය 17 වැනි දින එප්පාවල පිහිටි ලංකා රාජ්‍යය පොස්පේට් සමාගමේ නිරීක්ෂණ කටයුත්තක් සඳහා රාජ්‍යය අමාත්‍යය චාමර සම්පත් දසනායක මහතා පැමිණි අවස්ථාවේ එම ආයතනයේ වංචා දූෂණ කටයුතු සම්බන්ධයෙන් සේවකයින් පිරිසක් හෙළිදරව්වක් සිදු කරනු ලැබීය.

ලංකා රාජ්‍යය පොස්පේට් ආයතනයේ ඇඹරුම් යන්ත්‍රක් සඳහා අමතර කොටසක් (ගියර් බොක්ස් එකක්) ගෙන්වීමේදී අදාළ සැපයුම් නිළධාරීවරයා අවශ්‍ය අමතර කොටස වෙනුවට වෙනත් වර්ගයේ එකක් ගෙන්වා ඇති බවත්, එය ගෙන්වා මාස ගණනක් ගත වී ඇතත් එය තවමත් ආපසු යවා , මාරු කර, අවශ්‍යය අමතර කොටස ගෙන්වා නැති බවත් සේවකයින් එහිදී පැවසීය.

ඒ මගින් ආයතනයට රුපියල් ලක්ෂ ගණනක පාඩුවක් සිදුව ඇති බවයි.

අදාළ අමතර කොටස ඇණවුම් කල නිළධාරියා වන සැපයුම් නිළධාරියා එම ස්ථානයට ගෙන්වන ලෙස එහිදී අමාත්‍යයවරයා පැවසීය.

ඒ ස්ථානයට පැමිණි සැපයුම් නිළධාරීවරයට අමාත්‍යයවරයා මෙන්ම සේවකයින් පිරිසක්ද චෝදනාවන් සිදු කරනු ලැබීය.

ඒ අතරතුර එක් සේවකයකු විසින් එක්වරම සැපයුම් නිළධාරීවරයාගේ කමිසයෙන් ඇද පහරදීමක් සිදු කරනු ලැබීය.