පොල් හිඟයක් ඉදිරියේදී ?

මෙම වසරේ පොල් ඵලදාව සියයට තිහකින් අඩු වන බව පොල් පර්‌යේෂණ ආයතනය අනතුරු අඟවයි. ඊට හේතු වී ඇත්තේ පොල් වගාවට නිර්දේශ කර ඇති පොහොර නිසි පරිදි නොලැබීමයි.

මේ හේතුවෙන් ඉදිරි කාලයේදී වෙළෙඳපොළට පැමිණෙන පොල ගෙඩි ප්‍රමාණයද අඩු විය හැකි බව එම ආයතනය සඳහන් කරයි. 2019 වර්ෂයේ පොල් සංවර්ධන අධිකාරියේ සංඛ්‍යා ලේඛනවලට අනුව වාර්ෂික පොල් අවශ්‍යතාව ගෙඩි බිලියන 4.9කි. ඒ අතරින් ගෘහස්ථ පරිභෝජනයට අවශ්‍ය පොල් ගෙඩි සංඛ්‍යාව ගෙඩි බිලියන 1.8ක් වන අතර මෙරට පොල් තෙල් නිෂ්පාදනය සඳහා අවශ්‍ය පොල් ගෙඩි ප්‍රමාණය ගෙඩි බිලියන 1.8කි. එමෙන්ම අපනයනය ආශ්‍රිත නිෂ්පාදන සඳහා අවශ්‍ය පොල් ගෙඩි සංඛ්‍යාව ගෙඩි බිලියන 1.3ක් වේ.

නමුත් මෙරට වාර්ෂික පොල් අස්වැන්න වන්නේ ගෙඩි බිලියන 3.1කි. මෙම සංඛ්‍යා ලේඛන අනුව වාර්ෂික පොල් හිඟය ගෙඩි බිලියන 1.8කි. පසුගිය දිනක පැවැති කෝප් කමිටු හමුවකදී හෙළි වූයේ පොල් වගා කිරීමේ මණ්ඩලයට අයත් ඉඩම්වලට පවා අවසන් වරට පොහොර යොදා ඇත්තේ මීට වසර හතකට පෙර බවයි. නමුත් සාර්ථක වගාවක් පවත්වාගෙන යාමට නම් වගාව වෙත වාර්ෂිකව පොහොර යෙදිය යුතු වුවත් මෙරට බහුතරයක් පොල් වගා බිම් සඳහා අඛණ්ඩව වසර කිහිපයක සිට පොහොර යොදා නොමැත.

මේ හේතුවෙන් ගස් සතුව පවතින රෝග හා පළිබෝධ සඳහා ඔරොත්තු දීමේ හැකියාව වියැකෙන බවත් එහි බලපෑමක් ලෙස මේ වන විටත් වගාබිම් ආශ්‍රිතව ​රෝග පැතිර යමින් ඇති බැවින් මෙම තත්ත්වය සෘජුවම පොල් අස්වැන්න වෙත දරුණු බලපෑම් එල්ල කරන බව කෝප් කමිටුවේදී අනාවරණය විය. මේ සම්බන්ධව අප කළ විමසීමකදී පොල් පර්යේෂණ ආයතනයේ ප්‍රකාශකයකු සඳහන් කළේ පොහොර නොමැතිකමින් මේ වනවිට වර්ධනය බාල වී ඇති පොල් ගස් සඳහා කඩිනමින් පොහොර යෙදීම ආරම්භ කළද නැවත පොල් වගාව යථා තත්ත්වයට පත් වී පෙර පරිදි අස්වනු ලබා ගැනීමට නම් අවම වසර තුනක් පමණ ගත වන බවයි.