අතිවිශේෂ ගැසට් පත්‍රයක් නිකුත් කරමින් ජනාධිපතිවරයා තවත් බලතල පවරා ගනී !

අමාත්‍යාංශ කිහිපයක විෂය පථ වෙනස් කරමින් ජනාධිපති රනිල් වික්‍රමසිංහ මහතා විසින් අතිවිශේෂ ගැසට් පත්‍රයක් නිකුත් කර තිබෙනවා.

ඒ, ජනාධිපතිවරයා වෙත ආණ්ඩුක්‍රම ව්‍යවස්ථාවේ 44 වැනි ව්‍යවස්ථාවේ (1) අනු ව්‍යවස්ථාව යටතේ පැවැරී ඇති බලතල ප්‍රකාරවයි. ඒ අනුව මුදල්, ආර්ථික ස්ථායිකරණ සහ ජාතික ප්‍රතිපත්ති, නාගරික සංවර්ධන හා නිවාස, ප්‍රවාහන හා මහාමාර්ග, වැවිලි කර්මාන්ත, කෘෂිකර්ම, අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ, බුද්ධ ශාසන, ආගමික කටයුතු සහ සංස්කෘතික කටයුතු යන අමාත්‍යාංශවල විෂය පථ සංශෝධනය කෙරෙනු ඇති.

මුදල්, ආර්ථික ස්ථායිකරණ සහ ජාතික ප්‍රතිපත්ති අමාත්‍යාංශය යටතට ජාතික යන්ත්‍රෝපකරණ ආයතන සහ සහස්යා ඉන්වෙස්මන්ට් ලිමිටඩ් ගෙන තිබෙනවා.

ජාතික යන්ත්‍රෝපකරණ ආයතන මීට පෙර නාගරික සංවර්ධන හා නිවාස අමාත්‍යාංශය යටතේ පැවැති අතර සහස්යා ඉන්වෙස්මන්ට් ලිමිටඩ් විෂය හිමිව තිබුණේ, ප්‍රවාහන හා මහාමාර්ග අමාත්‍යාංශටයි.

ත්‍රිපෝෂ සහ සත්ත්ව ආහාර සඳහා අවශ්‍ය බඩඉරිඟු රට තුළ වගා කිරීම සඳහා කටයුතු කිරීම යන අයිතමය කෘෂිකර්ම අමාත්‍යාංශය යටතට පැවරීමටයි කටයුතු කර ඇත්තේ.

එය මීට පෙර වැවිලි කර්මාන්ත අමාත්‍යාංශයේ ශීර්ෂයට ඇතුළත් කර තිබුණා. අධිකරණ, බන්ධනාගාර කටයුතු හා ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍යාංශයේ විෂය පථයට පුනරුත්ථාපන කාර්යාංශය පනත ඇතුළත් කර තිබීමත් විශේෂත්වයක්.

උචිත තාක්ෂණය උපයෝගි කර ගනිමින් දුෂ්කර ග්‍රාමීය ප්‍රදේශවල මූලික යටිතල පහසුකම් සංවර්ධනය කිරීම නාගරික සංවර්ධන හා නිවාස අමාත්‍යාංශයෙන් ඉවත් කර ඇති බවට ගැසට් නිවේදනයේ සඳහන්.

කෙසේ වෙතත් එම අමාත්‍යාංශයේ විෂය පථයට පුද්ගල නාශක බිම් බෝම්බ තහනම් කිරීමේ පනත සහ වෙරළ සංරක්ෂණ පනත ඇතුළත් කර තිබෙනවා.

බුද්ධ ශාසන, ආගමික කටයුතු සහ සංස්කෘතික කටයුතු අමාත්‍යාංශයේ විෂය පථයට අමරදේව සෞන්දර්ය හා පර්යේෂණ කේන්ද්‍රය, අමරදේව සෞන්දර්ය හා පර්යේෂණ කේන්ද්‍රය පනත සහ ගාලු උරුමය පනත ඇතුළත් කිරීමටයි ජනාධිපතිවරයා කටයුතු කර ඇත්තේ.