LPL 2023 – චාමික සහ කුසල් මෙන්ඩිස්ගේ උණුසුම් වචන හුවමාරුව මැද Dambulla Aura දෙවන ජය ලබාගනී (VIDEO)

ලංකා ප්‍රීමියර් ලීග් ක්‍රිකට් තරගාවලියේ 8 වන තරඟය ලෙස පැවති (Dambulla Aura) දඹුල්ල අවුරා කණ්ඩායම සහ (Colombo Strikers) කලම්බූ ස්ට්‍රයිකර්ස් කණ්ඩායම අතර පැවැති තරගය ලකුණු 10කින් ජය ගැනීමට දඹුල්ල අවුරා කණ්ඩායම අද (05) සමත්වුණි.

මෙම ජය අවුරා කණ්ඩායම තරගාවලියේ ලබාගත් දෙවන ජයග්‍රහණය වන අතර, කලම්බූ ස්ට්‍රයිකර්ස් කණ්ඩායම තවමත් ලබාගෙන ඇත්තේ එක් ජයග්‍රහණයක් පමණයි.

කාසියේ වාසිය දිනාගැනීමට කලම්බූ ස්ට්‍රයිකර්ස් කණ්ඩායම සමත් වූ අතර ඔවුන් පළමුවෙන් පන්දුවට පහරදීම සඳහා දඹුල්ල අවුරා කණ්ඩායම ආරාධනා කළේය. ඒ අනුව, පළමුවෙන් පන්දුවට පහරදුන් දඹුල්ල අවුරා කණ්ඩායම නියමිත පන්දුවාර 20 අවසානයේ කඩුලු 6ක් දැවී ලකුණු 192ක් රැස් කළා.

දඹුල්ල අවුරා කණ්ඩායම වෙනුවෙන් නායක කුසල් මෙන්ඩිස් පන්දු 46කින් වේගවත් ලකුණු 87ක් රැස්කළ අතර ඔහුට අනගි සහයක් ලබාදෙමින් සධීර සමරවික්‍රම පන්දු 35කින් ලකුණු 59ක් රැස්කලා. කුසල් මෙන්ඩිස් ගේ ඉනිමට හයේ පහරවල් 8ක් ඇතුලත් වූ අතර, සදිර සමරවික්‍රම එක් හයේ පහරක් වාර්තා කරනු ලැබුවා. කුසල් සහ සදිර අතර දෙවන කඩුල්ල වෙනුවෙන් ලකුණු 120ක සම්බන්දතාවයක් ගොඩ නගනු ලැබුවා. එය පන්දුවාර 20 අවසානයේ ලකුණු 192ක් ලබාගැනීමට ප්‍රබල හේතුවක් බවට පත්වූවා.

අවුරා කණ්ඩායමේ අවසන් පන්දුවාර කිහිපය එතරම් සාර්ථක නොවූ අතර පිලිවෙලින් කුසල් පෙරේරා ලකුණු 9ක්, ධනංජය ද සිල්වා නොදැවී ලකුණු 15ක් ලබාගත්තා, ඇලෙක්ස් රෝස් ලකුණු 4කට සහ හේඩන් කර් ලකුණු නොලබා දැවීගියේ කලම්බු ස්ට්‍රයිකර්ස් වේග පන්දු යවන්නන් අවුරා ඉනිම අවසානයේ දියත් කල විශිෂ්ට පන්දු යැවීම හමුවෙයි.

පන්දු යැවීමේදී කලම්බූ ස්ට්‍රයිකර්ස් කණ්ඩායම වෙනුවෙන් මතීෂ පතිරණ සිය පන්දුවාර 4තුල ලකුණු 31 ලබාදෙමින් කඩුලු 3ක් දවාගනු ලැබුවා. නසීම් ශා කඩුලු දෙකයි.

ඒ අනුව ලකුණු 193ක ජයග්‍රාහී ඉලක්කයක් හඹායෑම සඳහා පිටියට පිවිසි කලම්බූ ස්ට්‍රයිකර්ස් කණ්ඩායම නියමිත පන්දුවාර 20 අවසානයේ රැස්කර ගත හැකි වූයේ ලකුණු 182ක් පමනයි.

බාබර් අසාම් සහ නිරෝෂන් දික්වැල්ල වේගවත් ආරම්භයක් ලබාගත්තත් ලකුණු 16කදි නිරෝෂන් දික්වල්ලගේ ඉනිම අවසන් වුයේ මුළු ලකුණු සංඛ්‍යාව 17ක්ව තිබියදී, බාබර් අසාම් පන්දු 24කින් ලකුණු 41 ලබාගත්තා. පැතුම් නිස්සංක ලබාගත්තේ ලකුණු 22ක් පමණයි. වේගවත් ඉනිමක් ක්‍රීඩා කල නුවනිඳු ප්‍රනාන්දු නොදැවී ලකුණු 56ක් වාර්තා කලේ පන්දු 39කට පමණක් මුහුණ දෙමින්. ඔහුගේ ඉනිමට හයේ පහර හතරක් වාර්තා වුනා. ධනංජය ලක්ෂාන් ලකුණු 18යි. වේගවත් අවසානයක් ලබාගත චාමික කරුණාරත්න පන්දු 7කට පමණක් මුහුණ දෙමින් නොදැවී ලකුණු 21 වාර්තා කළා.

පන්දු යැවීමේ දී අවුරා කණ්ඩායම වෙනුවෙන් නූර් අහ්මඩ් ලකුණු 34 කට කඩුලු 2 ක් දවා ගත්තා.

තරගයේ අවසන් පන්දුවාරය අතරතුර දී Dambulla Aura කණ්ඩායමේ නායක කුසල් මෙන්ඩිස් සහ චාමික කරුණාරත්න අතර උණුසුම් වචන හුවමාරුවක් ද සිදුවනු දක්නට ලැබුනා. (දර්ශන පහතින්)

තරඟයේ වීරයා බවට පත්වුයේ වේගවත් ලකුණු 87ක් රැස්කළ Dambulla Aura කණ්ඩායමේ නායක කුසල් මෙන්ඩිස්.

මෙම තරගයේ ප්‍රතිපලයත් සමඟ ලකුණු සටහනේ තෙවන ස්ථානයට පත්වීමට අවුරා කණ්ඩායම සමත්වූ අතර සිව්වන ස්ථානයේ සිටින්නේ Colombo Strikers කණ්ඩායමයි. (ලකුණු සටහන පහතින්)