බංග්ලාදේශ එක්දින ක්‍රිකට් කණ්ඩායමට නව නායකයෙක් පත් කෙරේ !

බංග්ලාදේශ එක්දින ක්‍රිකට් කණ්ඩායමේ නව නායකයා ලෙස තුන් ඉරියව් ක්‍රීඩක ශකිබ් අල් හසන් පත් කර තිබෙනවා.

එළඹෙන ආසියානු කුසලාන එක්දින ක්‍රිකට් තරගාවලිය සහ 2023 ලෝක කුසලාන එක්දින ක්‍රිකට් තරගාවලිය සදහා මෙම පත් කිරීම සිදු කර ඇති බවයි බංග්ලාදේශ ක්‍රිකට් ආයතනයේ සභාපති නස්මුල් හසාන් සදහන් කළේ.

ආසියානු කුසලාන තරගාවලිය සදහා හා ලෝක කුසලාන තරගාවලිය සදහා වන බංග්ලාදේශ සංචිතය ද හෙට (12) දිනයේ දී නිවේදනය කරන බව නස්මුල් හසාන් කියා සිටියා.

“තේරීම් කමිටු නිළධාරීන් ක්‍රීඩකයින් 17 දෙනෙකුගෙන් යුත් සංචිතයක් තෝරා ගනීවි.” යනුවෙන් සභාපතිවරයා මාධ්‍ය හමුවේ සදහන් කළා.

බංග්ලාදේශ එක්දින කණ්ඩායමට නව නායකයෙකු පත් කිරීමට සිදු වුණේ තමිම් ඉක්බාල් එම ධූරයෙන් ඉවත් වීමට පසුගියදා ගත් තීරණය හේතුවෙන්.

ආබාධයක් හේතුවෙන් තමිම් ඉක්බාල්ට ආසියානු කුසලාන තරගාවලිය ද අහිමි වී ඇති නමුත්, නවසීලන්තයට එරෙහිව පැවැත්වීමට නියමිත එක්දින තරගාවලිය සදහා හා ලෝක කුසලාන ක්‍රිකට් තරගාවලිය සදහා ඔහුට ක්‍රීඩා කිරීමට හැකි වනු ඇති බවට අපේක්ෂා කෙරෙනවා.

ලිටොන් දාස් හා මෙහෙදී හසාන් මිරාස් ද නව නායකත්ව තනතුර සදහා සලකා බැලුණු නමුත්, අවසානයේ දී තීරණය කර ඇත්තේ ශකිබ් අල් හසන් එම තනතුරට යළි පත් කිරීමටයි.

ඔහු එරට ටෙස්ට් හා 20යි 20 කණ්ඩායම්වලද නායකයා ලෙස කටයුතු කරනවා.