පාර්ලිමේන්තුවේ ලිංගික හිංසන පිලිබඳ චෝදනා එල්ල වූ ලොක්කෙකුගේ වැඩ තහනම් කරයි – සාක්ෂි දීම වැළැක්වීමට සේවිකාවන්ට තර්ජන !

පාර්ලිමේන්තු ගෘහ පාලන අංශයේ සේවයේ නියුතු ඇතැම් සේවිකාවන්ට ලිංගික හිංසනය සහ අඩත්තේට්ටම් සිදු කිරීමේ සිද්ධිය සම්බන්ධයෙන් එහි සහකාර ගෘහ පාලකවරයාගේ වැඩ තහනම් කර තිබෙනවා.

පාර්ලිමේන්තු මහ ලේකම් කුෂානි රෝහණධීර මහත්මිය විසින් මෙම සිද්ධිය සම්බන්ධයෙන් මෙතෙක් ඉදිරිපත්ව ඇති තොරතුරු සැළකිල්ලට ගෙන ඊයේ (11) සිට ක්‍රියාත්මක වන පරිදි මෙම වැඩ තහනම් කිරීම සිදුකර ඇති බවට වාර්තා වනවා.

පාර්ලිමේන්තුවේ ගෘහපාලන අංශයේ සේවිකාවන්ට ලිංගික හිංසන සහ අඩන්තේට්ටම් සිදුවන බවට තොරතුරු අනාවරණ වීමෙන් පසු පාර්ලිමේන්තු මහ ලේකම්වරිය විසින් මේ සම්බන්ධයෙන් කරුණු සොයා බැලීමට ත්‍රිපුද්ගල කමිටුවක් පසුගියදා පත් කරනු ලැබුවා.

එම කමිටුව හමුවේ සේවිකාවන් පිරිසක් ස්වේච්ඡාවෙන් පෙනී සිට තමන්ට සිදුව ඇති හිංසන සම්බන්ධයෙන් තොරතුරු රැසක් අනාවරණ කර ඇති බවයි වාර්තාවන්නේ.

මෙම සිද්ධියට සම්බන්ධ තවත් නිලධාරීන් කිහිපදෙනෙකු ගැනද තොරතුරු අනාවරණ කරගෙන ඇති අතර, ඔවුන් සම්බන්ධයෙන්ද ඉදිරියේදී ක්‍රියාමාර්ග ගැනීමට නියමිතයි.

මේ අතර අදාල සිද්ධිය සම්බන්ධයෙන් සාක්ෂි දීම වැළැක්වීමට නිලධාරීන් සහ සේවකයන් පිරිසක් එම සේවිකාවන්ට විවිධාකාරයෙන් තර්ජන එල්ල කිරීමේ සිද්ධීන් කිහිපයක් පිළිබඳවද පාර්ලිමේන්තු ප්‍රධානීන්ට තොරතුරු වාර්තාවී තිබෙනවා.