LPL 2023 – ආබාධ, දක්ෂතා, අත්දැකීම් මැද B-Love Kandy සිය පළමු LPL කිරුළ ජයග්‍රහණය කරයි !

LPL 2023 තරඟාවලියේ ආරම්භයේ දී දක්ෂතා අතර නොසිට, තරගාවලි කාලසටහෙන් කාර්යබහුලම තරග කිහිපයකට මුහුණ දෙමින් ආබාධ රැසක් සහිතව ක්‍රීඩා කරමින් මෙවර LPL කිරුළ ජයග්‍රහණය කිරීමට වනිඳු හසරංග ප්‍රමුඛ B-Love Kandy කණ්ඩායම අද (20) සමත් වුණා.

කමිඳු මෙන්ඩිස්ගේ වේගවත් ආරම්භය හා ඇන්ජෙලෝ මැතිව්ස්ගේ සටන්කාමී ඉනිම හමුවේ 2023 ලංකා ප්‍රිමියර් ලීග් ක්‍රිකට් තරගාවලියේ අවසන් මහා තරගයෙන් දඹුල්ල අවුරා කණ්ඩායම (Dambulla Aura) කඩුලු 5 කින් පරාජයට පත් කරමින් මෙලෙස ශූරතාවය දිනා ගැනීමට බී-ලව් කැන්ඩි කණ්ඩායමට (B-Love Kandy) හැකියාව ලැබුනා.

අවසන් මහා තරගය ජය ගනිමින් සිව්වැනි අදියරේ ශූරතාවය දිනා ගැනීම සදහා B-Love Kandy කණ්ඩායමට ලකුණු 148 ක ඉලක්කයක් ලබා දීමට තරගයේ කාසියේ වාසිය දිනා පළමුව පන්දුවට පහරදුන් දඹුල්ල අවුරා කණ්ඩායම සමත් වූ නමුත්, B-Love Kandy කණ්ඩායම ඉනිම නිමා වීමට එක් පන්දුවක් ඉතිරිව තිබියදී කඩුලු 5 ක් දැවී ජයග්‍රාහී ඉලක්කය පසු කර ගියා.

අවසන් වටයේ තෙවැනි තරගයේ දී සිදු වූ පාදයක ආබාධය හේතුවෙන් අවසන් තරගය සදහා B-Love Kandy පිලේ නිත්‍ය නායක වනිදු හසරංග ක්‍රීඩා කළේ නැහැ.

ඔහු වෙනුවට කණ්ඩායමේ වැඩබලන නායකයා ලෙස කටයුතු කළේ ඇන්ජෙලෝ මැතිව්ස්.

B-Love Kandy ඉනිමේ පළමු කඩුල්ල ලෙස හයේ පහරක් හා හතරේ පහර 3ක් සමගින් පන්දු 22කින් ලකුණු 26 ක් ලබා සිටි මොහමඩ් හැරිස් දවා ගැනීමට නූර් අහ්මඩ් සමත් වුණා. ඔහු දැවී ගියේ පළමු කඩුල්ලට කමිදු මෙන්ඩිස් සමග ලකුණු 49 ක සම්බන්ධතාවයක් පිහිටුවීමෙන් අනතුරුවයි.

කමිදු ලකුණු 44 ක් පන්දු 37කින් රැස් කළා. හයේ පහරක් හා හතරේ පහර 3 ක් ඔහුගේ ඉනිමට ද ඇතුළත්. එම කඩුල්ලේ හිමිකරු බවට පත් වූයේ ද නූර් අහ්මඩ්.

බිනුර ප්‍රනාන්දු විසින්පන්දු 22කින් ලකුණු 24ක් ලබා සිටි දිනේෂ් චන්දිමාල්ව දවා ගත් අතර, චතුරංග ද සිල්වා ලකුණු නොලබා සිටියදී දැවී ගියේ ද නූර් අහ්මඩ්ගේ පන්දුවක් හමුවේයි.

අසිෆ් අලී පන්දු 10 කින් ලකුණු 19 ක් ලබා ගත්තා. ඒ, හයේ පහරක් හා හතරේ 2 ක් සමගින්. ඔහු දැවී ගියේ බිනුරගේ පන්දුවක් හමුවේ කුසල් පෙරේරා රැක ගත් සුපිරි උඩ පන්දුවක් හමුවේයි.

සිය අත්දැකීම් සහ නායකත්ව ලක්ෂණ මනාව පෙන්වමින් සටන්කාමී ඉනිමක් ක්‍රීඩා කරමින් සිය කණ්ඩායම ජයග්‍රහනය කරා රැගෙන ගිය ඇන්ජෙලෝ මැතිව්ස් පන්දු 21 කින් නොදැවී ලකුණු 25 ක් ලබා ගත්තා. හතරේ පහර 3ක් ඔහුගේ ඉනිමට ඇතුළත්. ලහිරු මදුෂංක නොදැවී ලකුණු 5යි.

පන්දු යැවිමේ දී නූර් අහ්මඩ් කඩුලු 3 ක් හා බිනුර ප්‍රනාන්දු කඩුලු 2 ක් බිද හෙලුවා. කොළඹ ආර්. ප්‍රේමදාස ක්‍රීඩාංගනයේ පැවැති තරගයේ පළමුව පන්දුවට පහරදුන් දඹුල්ල කණ්ඩායම නියමිත පන්දුවාර 20 තුළ ලකුණු 147 ක් ලබා ගත්තේ කඩුලු 4 ක් දැවී සිටියදීයි. අවිශ්ක ප්‍රනාන්දු ලකුණු 5කට දැවී ගිය අතර, කුසල් මෙන්ඩිස් ලකුණු 22යි. සධීර සමරවික්‍රම පන්දු 30කින් ලකුණු 36යි. හතරේ පහර 5ක් ඔහුගේ ඉනිමට ඇතුළත්. ධනංජය ද සිල්වා ලකුණු 40 ක් රැස් කළේ පන්දු 29 කින් හයේ පහර 3ක් ද සමගින්. කුසල් පෙරේරා නොදැවී පන්දු 25ක් තුල ලකුණු 31ක් ලබා ගත්තා. හයේ පහරක් හා හතරේ පහර 2ක් එල්ල කරමිනුයි ඔහු සිය කණ්ඩායම සටන්කාමී ලකුණු සංඛ්‍යාවක් කරා රැගෙන යාමට දායකත්වය ලබා දුන්නේ.

පන්දු යැවීමේ දී චතුරංග ද සිල්වා කඩුලු 2 ක් දවා ගත් අතර, නුවන් ප්‍රදීප් හා මොහමඩ් හස්නයින් කඩුල්ල බැගින් බිද හෙලුවා.

පිත්තෙන් මෙන්ම පන්දුවෙන් ද තරඟාවලිය පුරා දක්ෂතා දැක්වූ B-Love Kandy කණ්ඩායමේ නායක වනිඳු හසරංග, තුන් ඉරියව් ක්‍රීඩක ඉසුරු උදාන, වේග පන්දු යවන දුෂ්මන්ත චමීර යන ප්‍රධාන ක්‍රීඩකයින් තිදෙනාම ආබාධ හේතුවෙන් අවසන් මහා තරඟයට ක්‍රීඩා නොකිරීම ද විශේෂත්වයක්.

අවසන් මහා තරඟයේ වීරයා බවට පත්වුයේ සිය අත්දැකීම් සහ නායකත්ව ලක්ෂණ පෙන්වමින් B-Love Kandy කණ්ඩායම අවසන් මහා තරඟයේ දී ජයග්‍රහණය සඳහා මෙහෙයවූ ඇන්ජලෝ මැතිව්ස්.

තරඟාවලියේ වැඩිම ලකුණු ලාභියා, වැඩිම කඩුලුලාභියා මෙන්ම, වැඩිම හයේ පහර සංඛ්‍යාවක් එල්ල කරමින් තරඟාවලියේ වීරයා බවට පත්වුයේ B-Love Kandy කණ්ඩායම් නායක වනිඳු හසරංගයි.

තරඟාවලියේ නැගී එන ක්‍රීඩකයාට හිමි සම්මානය දිනාගත්තේ Galle Titans කණ්ඩායමේ ආරම්භක පිතිකරු ලසිත් කෘස්පුල්ලේ.