දුම්රියේ දමා ගිය මිලියන 5කට වඩා වටිනා රන් භාණ්ඩ මල්ල අයිතිකරුවන්ට භාර දෙයි !

දුම්රියක අමතකව ගොස් තිබූ මිලියන 5කට වඩා වටිනා ස්වර්ණාභරණ සහිත බෑගයක් දුම්රිය ආරක්ෂක නිලධාරීන් අයිතිකරුවන්ට භාර දී තිබේ.

මෙම රන් භාණ්ඩ සහිත බෑගය මාතර සිට කොළඹ කොටුව බලා ධාවනය වූ දුම්රියක දමා ගොස් ඇත.

මාලිගාවත්ත දුම්රිය අංගනයට පැමිණි දුම්රිය ගමනාගමනය අවසන් කර පරීක්ෂා කිරීමේදී දුම්රිය ආරක්ෂක නිලධාරීන් බෑගය සොයාගෙන තිබේ.

මහනුවර ප්‍රදේශයේ පදිංචි මෙම අඹුසැමි යුවළ ගමන් මලු කිහිපයක් රැගෙන ගමන් කර ඇති අතර ආසනය යට තබා තිබූ නිසා ස්වර්ණාභරණ සහිත බෑගය අමතකව ගොස් තිබේ.

ස්වර්ණාභරණවලට අමතරව ඇපල් අයිෆෝන් එකක්, රුපියල් ලක්ෂ 35ක ඉතුරුම් සහතිකයක්, බැංකු පොත්, මෝටර් රථ යතුරක් සහ හැඳුනුම්පත් ලේඛන එම බෑගයේ තිබී ඇත.