Asia Cup 2023 – ලෝක වාර්තාවක් සමඟ ඇෆ්ගනිස්තානයට එරෙහිව ලකුණු දෙකක තියුණු ජයක් ලැබූ ශ්‍රී ලංකා කණ්ඩායම ආසියානු කුසලානයේ සුපිරි හතර අතරට සුදුසුකම් ලබයි (PHOTOS)

මෙවර ආසියානු කුසලාන එක්දින ක්‍රිකට් තරගාවලියේ (Asia Cup 2023) 6 වැනි තරගයෙන් ඇෆ්ගනිස්තානය පරදා ලකුණු දෙකක තියුණු ජයක් ලබමින් තරගාවලියේ සුපිරි 4 වටයට සුදුසුකම් ලබා ගැනීමට ශ්‍රී ලංකාව අද (5) සිදු වුණා.

පාකිස්තානයේ ලාහෝර් නුවර පැවැති මෙම තරගයේ කාසි‌යේ වාසිය දිනා පළමුව පන්දුවට පහරදුන් ශ්‍රී ලංකා කණ්ඩායම නියමිත පන්දුවාර 50 අවසානයේ කඩුලු 8ක් දැවී ලකුණු 291 ක් රැස් කළා.

තරගාවලියේ සුපිරි 4 වටයට සුදුසුකම් ලබා ගැනීමටනම් ඇෆ්ගනිස්තාන කණ්ඩායමට මෙම තරගයේ ජය පමණක් ප්‍රමාණවත් නොවූ අතර, ඒ සදහා ඔවුන් ලකුණු 292 ක ඉලක්කය පන්දුවාර 37.1 ක් තුළ හඹා යාම අවශ්‍ය වුුුණා.

කෙසේ වෙතත්, ඇෆ්ගනිස්තාන කණ්ඩායමට පන්දුවාර 37.4 ක් තුළ සියලු දෙනා දැවී ලබා ගත හැකි වූයේ ලකුණු 289 ක් පමණයි.

ඇෆ්ඝනිස්තාන ඉනිමේ පළමු කඩුලු 3 ලකුණු 50 ක් තුළ බිද වැටුණා. රහ්මනුල්ලාහ් ගුර්බාස් ලකුණු 4කටත්, ඊබ්‍රහීම් සඩ්‍රාන් ලකුණු 7කටත් දැවී ගිය අතර, ගුල්බදීන් නයිබ් ලකුණු 22 යි. අනතුරුව රහ්මට් ශාහ් හා නායක හෂ්මතුල්ලාහ් ශහීඩි සිව්වැනි කඩුල්ල සදහා පන්දු 63කින් ලකුණු 71ක සම්බන්ධතාවයක් ගොඩ නැගුවා.

රහ්මට් ලකුණු පන්දු 40ක් තුල 45කට දැවී යාමෙන් පසුව පිටියට පිවිසි මොහමඩ් නබී පන්දු 32 කින් හයේ පහර 5 ක් හා හතරේ පහර 6 ක් සමගින් ලකුණු 65 ක් රැස් කරමින් සිය කණ්ඩායමට ඉහළ බලාපොරොත්තුවක් ගෙන ඒ සමත් වුණා.

නබී හා හෂ්මතුල්ලාහ් අතර 5 වැනි කඩුල්ල සදහා පන්දු 47කින් වේගවත් ලකුණු 80ක සම්බන්ධතාවයක් ගොඩ නැගුණා. කරීම් ජනට් පන්දු 13ක් තුල ලකුණු 22ක් හා නායක හෂ්මතුල්ලාහ් පන්දු 66කින් ලකුණු 59ක් ලබා සිටියදී දවා ගැනීමට අවශ්‍යම මොහොතේ දුනිත් වෙල්ලාලගේ සමත් වුණා.

කෙසේ වෙතත්, රෂීඩ් ඛාන් හා නජිබුල්ලාහ් සඩ්‍රාන් යළි ඇෆ්ගනිස්තාන පිල සටනට අවතීර්ණ කළේ 8 වැනි කඩුල්ලට පන්දු 23කින් ලකුණු 39ක සම්බන්ධතාවයක් ගොඩ නගමින්. ඇෆ්ගනිස්තානයට ජයග්‍රහණය පන්දුවාර 37.1 පෙර ලබා ගැනීමේ අවකාශය තිබු මොහොතක දී පන්දු 15කින් ලකුණු 23ක් ලබා සිටි සඩ්‍රාන් ලකුණු දැවී ගියා. රෂීඩ් ඛාන් පන්දු 16කින් නොදැවී ලකුණු 27ක් ලබා ගත් නමුත් එය ජයග්‍රහනය සදහා ප්‍රමාණවත් වූයේ නැහැ.

පන්දු යැවීමේ දී කසුන් රාජිත ලකුණු 79 කට කඩුලු 4 ක් දවා ගත්තා. දුනිත් වෙල්ලාලගේ හා ධනංජය ද සිල්වා කඩුලු 2 බැගින් බිද හෙලුවා.

පළමුව පන්දුවට පහරදුන් ශ්‍රී ලංකා කණ්ඩායමේ වැඩිම ලකුණුලාභියා වූ අංක 3 පිතිකරු කුසල් මෙන්ඩිස් පන්දු 84 කින් ලකුණු 92 ක් රැස් කළා. ඔහුගේ ඉනිමට හයේ පහර 3 ක් හා හතරේ පහර 6 ක් ඇතුළත්. පැතුම් නිස්සංක ලකුණු 41 ක් හා දිමුත් කරුණාරත්න ලකුණු 32 ක් රැස් කරමින් මුල් පෙල ශක්තිමත් කළා. ඔවුන් දෙදෙනා පළමු කඩුල්ලට ගොඩ සම්බන්ධතාවය ලකුණු 63 ක්. චරිත් අසලංක ලකුණු 36 යි. චරිත් හා මෙන්ඩිස් අතර සිව්වැනි කඩුල්ලට පන්දු 99කින් ලකුණු 102ක සම්බන්ධතාවයක් ගොඩ නැගුණා.

ඉනිමේ 7 වැනි කඩුල්ල ලෙස දසුන් ශානක ලකුණු 5කට දැවී යාමෙන් පසුව (227/7) 8 වැනි කඩුල්ල සදහා දුනිත් වෙල්ලාලගේ හා මහීෂ් තීක්ෂණ පන්දු 63කින් ලකුණු 64ක සම්බන්ධතාවයක් ගොඩ නැගීමට සමත් වුණා.

දුනිත් වෙල්ලාලගේ පන්දු 39කින් නොදැවී ලකුණු 33යි. තීක්ෂණ ඉනිමේ අවසන් පන්දුවේ දී දැවී ගියේ පන්දු 24කින් ලකුණු 28ක් ලබා සිටියදීයි.

පන්දු යැවීමේ දී ගුල්බදීන් නයිබ් ලකුණු 60 කට කඩුලු 4 ක් දවා ගත්තා. රෂීඩ් ඛාන් කඩුලු 2 ක් දවා ගත්තේ ලකුණු 63 ක් ලබා දෙමින්.

තරගය පුරා කණ්ඩායම් දෙකේ ඉනිම් වලදී හතරේ පහර 53ක් වාර්තා වී තිබීමත් විශේෂත්වයක්.

ඉතාම තියුණු අවසානයක් මෙන්ම ඇෆ්ගනිස්තානයට අවාසනාවන්ත පරාජයක් උරුම වූ මෙම තරගයේ වීරයා බවට පත්වුයේ, ශ්‍රී ලංකා ඉනිමේ නැංගුරම බවට පත්වෙමින් වේගවත් ලකුණු 92ක් රැස් කල කුසල් මෙන්ඩිස්.

එමෙන්ම නොකඩවා වැඩිම එක්දින තරඟ සංඛ්‍යාවක දී කණ්ඩායමක කඩුලු දහයම දවාගැනීමේ වාර්තාව නැවතත් යාවත්කාලීන කිරීමට දසුන් ශානක ප්‍රමුඛ ශ්‍රී ලංකා කණ්ඩායම අද සමත් වුණා.

පසුගිය දා නිමාවූ ශ්‍රී ලංකා බංගලාදේශ තරඟයේ දී බංගලාදේශ කඩුලු දහයම දවාගනිමින් පිට පිට 11 වතාවක් ප්‍රතිවාදීන් ගේ කඩුලු දහයම දවාගත් එකම කණ්ඩායම බවට පත්වීමට ශ්‍රී ලංකා කණ්ඩායම සමත් වූ අතර, අද තරඟයේ ප්‍රතිපලයත් සමඟ එම ලෝක වාර්තාව ද යාවත්කාලීන වුනා.