දිලිත්ගේ මව්බිම ජනතා පක්ෂය සමග එක්වී යළි දේශපාලනයට එන්න ගෝඨා සූදානමින් !

පසුගිය වසරේ ජූලි මාසයේදී ජනතා විරෝධය මැද ඉල්ලා අස්වීමෙන් පසු දැඩි නිශ්ශබ්දතාවයක් රකින හිටපු ජනාධිපති ගෝඨාභය රාජපක්ෂ ඊයේ සිය දේශපාලන ප්‍රවේශය පිළිබඳ නිවේදනය කළ දිලිත් ජයවීරගේ මව්බිම ජනතා පක්ෂය සමග සක්‍රීයව එක්වී යළි දේශපාලන කරලියට පැමිණීමට සැරසෙන බව ඩේලි මිරර් වාර්තා කරයි.

දිලිත් ජයවීර විසින් මව්බිම ලංකා පක්ෂය මිලදී ගෙන පක්ෂය භාරගත් පසු පක්ෂයේ ව්‍යවස්ථාව වෙනස් කර නව නිලධාරී මණ්ඩලය තෝරා ගැනීමෙන් අනතුරුව මේ වනවිට නව සාමාජිකත්වය පිළිගැනිමට විවෘතව ඇතැයි වාර්තා වේ.

තවද ගෝඨාභය රාජපක්ෂගේ වියත්මග වැනි උත්සාහයක් සහිතව උගත් සහ විද්වත් පිරිස් පක්ෂයට එක් කරගැනීමේ මෙහෙයුමක් දිලිත් ජයවීර විසින් දියත් කර ඇති බව ද ඩේලි මිරර් වාර්තාවේ දැක්වේ.

එම වාර්තාවේ දැක්වෙන්නේ ලබන වසරේ පැවැත්වෙන ජනාධිපතිවරණයට රට සූදානම් වෙද්දී දිලිත් ජයවීරගේ නායකත්වයෙන් යුත් මව්බිම ජනතා පක්ෂයට ගෝඨාභය රාජපක්ෂ සිය ආශිර්වාදය සහ පූර්ණ සහාය පළ කරනු ඇති බවය.

දිලිත් ජයවීරගේ “අරමුණ” සංවිධානය ඉදිරි මැතිවරණවලට මව්බිම ජනතා පක්‍ෂය ලෙස තරග කිරීමට එක් වූ බවත් ඒ සඳහා එක්ව කටයුතු කරන බවත් මවුබිම ජනතා පක්‍ෂයේ ජ්‍යෙෂ්ඨ නායක හේමකුමාර නානායක්කාර පවසා ඇත.

හේමකුමාර නානායක්කාර පවසන්නේ ඔවුන් ඉදිරි ජනාධිපතිවරණයට ද ඉදිරිපත් වන බවය.