දුම්රිය සේවකයාගේ ඝාතනයේ සුලමුල හෙළිවෙයි !

ශ්‍රී ලංකා දුම්රිය තාක්ෂණ ශිල්පී සංගමයේ, ප්‍රධාන යාන්ත්‍රික ඉංජිනේරු උප දෙපාර්තමේන්තු ශාඛා කාර්යාලය තුළ දී එහි සේවකයෙක් ඝාතනයට ලක්වු හේතුව අනාවරණය වී තිබේ.

අප වාර්තාකරු පැවසුවේ ඝාතනයට ලක්වු පුද්ගලයා සහ ඝාතනය සිදුකළ පුද්ගලයා හොඳම මිතුරන් බවය.

ඝාතනයට ලක්වූ පුද්ගලයා සිය හොඳම මිතුරාගේ බිරිඳ සමග දොරගුළු ලා රැඳී සිටීම මුල්කරගෙන ඇති වු ආරවුලක් මත මෙම ඝාතනය සිදුව තිබේ.

මෙම පුද්ගලයින් දෙදෙනාම දුම්රිය දෙපාර්තමේන්තුවේ සංස්ථා තාක්ෂණ ශිල්පී තනතුරේ සේවය කර ඇති බව අනාවරණය වී ඇත.

ඝාතනයට ලක්ව ඇත්තේ, මාතර, දීයගහ ප්‍රදේශයේ පදිංචි කේ.ඉන්දික හේමන්ත නැමති 41 හැවිරිදි අයෙකි.

ඔහු තාවකාලිකව දුම්රිය නිවාස සංකීර්ණයේ ශ්‍රී ලංකා දුම්රිය තාක්ෂණ ශිල්පී සංගම් කාර්යාලයේ නැවතී සිට ඇත.

ඊයේ (12) පස්වරු 2.20ට පමණ මෙම ඝාතනය සිදුව ඇති අතර, පිහිඇනුම සිදුකළ පුද්ගලයාගේ බිරිඳ සමග ඝාතනයට ලක්වූ පුද්ගලයා අනියම් සම්බන්ධතාවයක් පවත්වා ඇති බවට අනාවරණය වී තිබේ.

බිරිඳ සහ මිතුරා නිවස තුළ සිටින බවට ලද තොරතුරක් මත දුම්රිය සේවකයා විසින් බිරිඳගේ පියාව ද එම ස්ථානයට කැඳවා ගෙනවිත් ඇත.

නිවසේ දොර විවෘත නොකිරීම හේතුවෙන් එය කඩා ඇතුළු වී ඇති දුම්රිය සේවකයා මිතුරාට පුටුවකින් පහරදී ඇති අතර, පසුව පිහියකින් පපු ප්‍රදේශයට ප්‍රහාර දෙකක් එල්ල කර තිබේ.

පසුව එම ස්ථානයේ සිටි ත්‍රිරෝද රථ රියදුරෙක් විසින් ගිලන්රථයකින් තුවාලකරුව දකුණු කොළඹ ශික්ෂණ රෝහල වෙත ඇතුළත් කර ඇති අතර ඒ වන විටත් ඔහු මියගොස් සිටි බව පොලීසිය පැවසීය.

පොලීසිය විසින් සැකකරු හා ඝාතනයට යොදාගත් පිහිය ද පොලිස් භාරයට ගෙන ඇත.