ඉන්ධන මිල වැඩිවීම හමුවේ බස් ගාස්තු සහ ත්‍රීරෝද රථ ගාස්තු වැඩි වෙයිද? – තීරණය මෙන්න !

ඩීසල් ලීටරයක් රුපියල් 10කින් වැඩිවුවත් බස් ගාස්තු සංශෝධනයක් කිරීමට එය ප්‍රමාණවත් නොවන බව පෞද්ගලික බස් රථ හිමියන්ගේ සංගමයේ සභාපති, ගැමුණු විජේරත්න පවසයි.

බස් ගාස්තු වැඩිකිරීමට ඩීසල් මිල 4%කින් පමණ වැඩිවිය යුතු බව පවසන ඔහු ඊයේ ඩීසල් මිල වැඩිකර ඇත්තේ 2%කින් පමණක් බව පැවසීය.

“මේ ඩීසල් වැඩිවීම අනිවාර්යයෙන්ම ඉදිරියටත් සිදුවෙමින් තියෙනවා. යම් ආකාරයකින් ලබන සැරේ අපිට බස් ගාස්තු සංශෝධනයකට යන්න ඉඩ තියෙනවා.”

මේ අතර ඉන්ධන මිල වෙනස් වීම හමුවේ ත්‍රීරෝද රථ ගාස්තු සංශෝධනයක් සිදුනොවන බවට ද තීරණය කර තිබේ.

සමස්ත ලංකා ත්‍රීරෝද රථ රියදුරන්ගේ වෘත්තීය සමිතියේ සභාපති, ලලිත ධර්මසේකර මාධ්‍ය වෙත අදහස් දක්වමින් මේ බව සඳහන් කළේය.

“මේ ආකාරයට මාසයෙන් මාසයට ගාස්තුව එහා මෙහා වෙද්දි විශේෂයෙන් ත්‍රීරෝද රථ ගාස්තුව එහා මෙහා කරන්න පුළුවන්කමක් නෑ…”

සිපෙට්කෝ සහ ලංකා ඉන්දියන් ඔයිල් සමාගම සිය ඉන්ධන මිල ගණන් ඊයේ (01) මධ්‍යම රාත්‍රීයේ සිට ක්‍රියාත්මක වන පරිදි ඉහළ නංවනු ලැබීය.

ඒ අනුව ඔක්ටේන් 92 පෙට්‍රල් ලීටරයක් රුපියල් 4කින් ඉහළ දමා ඇති අතර එහි නව මිල රුපියල් 365කි. ඔක්ටේන් 95 වර්ගයේ පෙට්‍රල් ලීටරයක් රුපියල් 3කින් ඉහළ දමා ඇති අතර එහි නව මිල දැක්වෙන්නේ රුපියල් 420ක් ලෙසය.

මේ අතර ඔටෝ ඩීසල් ලීටරයක් රුපියල් 10කින් ඉහළ දමා ඇති අතර එහි නව මිල රුපියල් 351ක් බව ලංකා ඛනිජ තෙල් නීතිගත සංස්ථාව සඳහන් කළේය.

ලංකා සුපිරි ඩීසල් ලීටරයක් රුපියල් 62කින් ඉහළ දමා ඇති අතර එහි නව මිල රුපියල් 421ක් වේ. භූමිතෙල් ලීටරයක් රුපියල් 11කින් ඉහළ දමා ඇති ඇති අතර එහි නව මිල රුපියල් 242කි.

මේ අතර සයිනොපෙක් චීන තෙල් සමාගම ද සිය ඉන්ධන මිල ගණන් ඊයේ පස්වරුවේ සිට සංශෝධනය කර තිබේ. මේ අනුව ඔක්ටේන් 95 වර්ගයේ පෙට්‍රල් ලීටරයක මිල රුපියල් 414 සිට 420 දක්වා රුපියල් 6 කින්ද, සුපර් ඩීසල් ලීටරයක මිල රුපියල් 356 සිට 417 දක්වා රුපියල් 61කින්ද ,ඔටෝ ඩීසල් ලීටර් 1ක මිල රුපියල් 338 සිට 348 දක්වා රුපියල් 10 කින්ද ඉහළ දැමීමට පියවර ගෙන ඇති බව එම සමාගම පැවසුවේය. කෙසේ වෙතත් ඔක්ටේන් 92 වර්ගයේ පෙට්‍රල් මිල ගණන් සංශෝධනය නොකළ බව සයිනොපෙක් සමාගම ප්‍රකාශ කළේය.

කෙසේ වෙතත් ජනතාව පැවසුවේ දිනෙන් දින ආණ්ඩුව ගන්නා මෙම මිල ඉහළ දැමීම් හමුවේ තමන් දැඩි අසීරුතාවට පත්වන බවය.