World Cup 2023 – ලෝක කුසලානයේ ආරම්භයට පැය 24ක් තිබියදී සමාරම්භක උළෙල අවලංගු කරයි !

ලෝක කුසලාන ක්‍රිකට් තරගාවලිය (World Cup 2023) ආරම්භයට පෙර පවත්වන සමාරම්භක උළෙල ඊයේ (04) පස්වරු 7.00ට අහමදාබාද් නරේන්ද්‍ර මෝදි ක්‍රීඩාංගණයේදී පැවැත්වීමට නියමිතව තිබුණද ඊට පැය 24ක් තිබියදී එය හදිසියේම අවලංගු කිරීමට ඉන්දීය ක්‍රිකට් පාලක මණ්ඩලය තීරණය කළා.

මෙම තීරණයට හේතුව මෙතෙක් අනාවරණය වී නොමැති අතර, ලෝක කුසලාන ක්‍රිකට් තරගාවලි ඉතිහාසයේ නිල සමාරම්භක උත්සවයක් නොපැවැත්වෙන පළමු අවස්ථාව මෙය වීම විශේෂත්වයකි.

ගිනිකෙළි සහ ලේසර් සංදර්ශන ඇතුළත්ව අතිඋත්කර්ෂවත් ලෙස පැවැත්වීමට සූදානම්ව තිබූ මෙම සමාරම්භක උත්සවයට ආශා බෝස්ලේ, රන්වීර් සිං, ආර්ජිට් සිං, ශ්‍රෙයා ඝෝෂාල් ඇතුළු බොලිවුඩයේ ජනප්‍රිය තරු රැසක් සහභාගීවීමට සිටි හෙයින් විශාල පිරිසක් සමාරම්භක උලෙළ නැරැඹීමේ අපේක්ෂාවෙන් සිටි බව ඉන්දීය මාධ්‍ය වාර්තා කර තිබුණා.

කෙසේ වුවද ලෝක කුසලාන ක්‍රිකට් තරගාවලියට සහභාගිවන ක්‍රිකට් නායකයින් නරේන්ද්‍ර මෝදි ක්‍රීඩාංගණයේදී මාධ්‍ය ඉදිරියේ අදහස් දැක්වීම සිදු කිරීමට මෙදින කටයුතු යොදා තිබේ.

එය ක්‍රිකට් තරගාවලියේ ‘නායකයින්ගේ දිනය‘ ලෙසින් නම් කොට ඇත. ‘නායකයින්ගේ දින‘ කටයුතු සැලසුම් කළ පරිදි සිදු වෙද්දී සමාරම්භක උත්සවය අවලංගු කිරීම සම්බන්ධයෙන් විධිමත් ප්‍රකාශයක් නොකිරීම පිළිබඳ බොහෝ දෙනා විමතිය පළ කරනවා.

මෙම දැවැන්තම ක්‍රිකට් තරගාවලියේ සාම්ප්‍රදායිකව පවත්වනු ලබන සමාරම්භක උත්සවය වෙනුවට මේ 14 වැනිදා අහමදාබාද් නරේන්ද්‍ර මෝදි ක්‍රීඩාංගණයේ පැවැත්වෙන ඉන්දියාව සහ පාකිස්ථානය අතර ගැටුමට පෙර විශේෂ උත්සවයක් සංවිධාන කිරීමට ඉන්දීය ක්‍රිකට් ආයතනය සූදානම් වනවා.

කෙසේ වුවද ආරක්ෂක හේතුන් මත ලෝක කුසලාන ක්‍රිකට් තරගාවලියේ සිදු වන බොහෝ කටයුතු සම්බන්ධයෙන් පූර්ව ප්‍රචාරයන් සිදු නොකිරීමට සංවිධායක මණ්ඩලය තීරණයක් ගෙන තිබෙනවා.