පරිසර ඇමතිට මන්ත්‍රී ධුරයත් අහිමි වන ලකුණු – නසීර් අහමඩ් වෙනුවට අලිසාහීර් මවුලානා මැතිසබයට එවන්න මුස්ලිම් කොංග්‍රසය සැරසේ !

අමාත්‍ය නසීර් අහමඩ්ගේ පක්ෂ සාමාජිකත්වය අහිමි කිරීමට ශ්‍රී ලංකා මුස්ලිම් කොංග්‍රසය ගත් තීරණය නීත්‍යානුනුකූල බවට ශ්‍රේෂ්ඨාධිකරණය ලබා දුන් තීන්දුවත් සමඟ ඔහුගේ මන්ත්‍රී ධුරය ව්‍යවස්ථානුකූලව අහෝසි වන බව ශ්‍රී ලංකා මුස්ලිම් කොංග්‍රසයේ මහ ලේකම් නිසාම් කාරියප්පර් පවසනවා.

2022 වසර සඳහා වන විසර්ජන පනත් කෙටුම්පත දෙවැනි වර කියැවීමේ විවාදයේදී එම පක්ෂයේ මන්ත්‍රීවරු ඊට පක්ෂව ඡන්දය ලබා නොදීමට තීරණය කර තිබුණා.

එහෙත් නසීර් අහමඩ් මන්ත්‍රීවරයා පක්ෂයේ උත්තරීතර මණ්ඩලයේ තීන්දුවට එරෙහි වෙමින් විසර්ජන පනත් කෙටුම්පතට පක්ෂවයි ඡන්දය ප්‍රකාශ කළේ.

අමාත්‍ය නසීර් අහමඩ් පක්ෂයේ විනය කඩ කර ඇති බව පවසමින් ඊට කරුණු විමසා පක්ෂ මහලේකම්වරයා විසින් 2022 වසරේ අප්‍රේල් මස 23 වන දා පෙත්සම්කරුට ලිපියක් යොමු කරමින් දැනුම් දී තිබුණේ ඔහු පක්ෂ සාමාජිකත්වයෙන් නෙරපන බවටයි.

කෙසේවෙතත් ඊට එරෙහිව නසීර් අහමඩ් ශ්‍රේෂ්ඨාධිකරණය හමු වේ පෙත්සමක් ගොනු කළේ සාධාරණ පරීක්ෂණයකින් තොරව සිය පක්ෂ සාමාජිකත්වය අහිමි කිරීමට ශ්‍රී ලංකා මුස්ලිම් කොංග්‍රසය ගත් තීරණය නීතියට පටහැනි බවට තීන්දුවක් ලබාදෙන ලෙස ඉල්ලමින්. දීර්ඝ පෙත්සම් විභාගයකින් අනතුරුව අද එහි තීන්දුව ලබා දුන් ප්‍රීති පද්මන් සූරසේන එස්.තුරෛයි රාජා සහ මහින්ද සමයවර්ධන යන ත්‍රිපුද්ගල විනිසුරු මඩුල්ල සඳහන් කළේ පක්ෂයේ උත්තරීතර මණ්ඩලය විසින් ගනු ලැබූ තීන්දු වලට පටහැනිව ක්‍රියා කිරීම තුළින් පෙත්සම්කරු එම ප්‍රතිඥාව උල්ලංඝනය කර ඇති බවයි.

ඉදිරිපත් වූ කරුණු සලකා බලා පෙත්සම්කරුගේ ඉල්ලීම නිෂ්ප්‍රභ කළ විනිසුරු මඩුල්ල අමාත්‍ය නසීර් අහමඩ්ගේ පක්ෂ සාමාජිකත්වය අහිමි කිරීමට ශ්‍රී ලංකා මුස්ලිම් කොංග්‍රසය ගත් තීරණය නීත්‍යනුකූල බව තීන්දු කළා.

අදාළ නඩු තීන්දුවෙන් අනතුරුව අදහස් දැක්වූ ශ්‍රී ලංකා මුස්ලිම් කොන්ග්‍රසයේ මහ ලේකම් නිසාම් කාරියප්පර් සඳහන් කළේ පුරප්පාඩු වන මන්ත්‍රී ධුරය සඳහා මනාප ලැයිස්තුවේ මීලගට සිටින අලි සාහීර් මවුලානා පත්වන බවයි.