World Cup 2023 – ඇන්ජලෝ මැතිව්ස් සහ දුෂ්මන්ත චමීරව ශ්‍රී ලංකා සංචිතයට කැඳවයි !

ඉන්දියාවේ පැවැත්වෙන ලෝක කුසලාන ක්‍රිකට් තරගාවලියේ (World Cup 2023) ශ්‍රී ලංකා සංචිතයේ අතිරේක ක්‍රීඩකයින් ලෙස සුපිරි තුන් ඉරියව් ක්‍රීඩක ඇන්ජලෝ මැතිව්ස් සහ වේග පන්දු යවන දුෂ්මන්ත චමීරව කැඳවීමට තීරණය කොට තිබෙන බව ජාතික තේරීම් කමිටුව තීරණය කොට තිබේ.

මින් පෙර ප්‍රමෝද් මධුෂාන් සංචිතයේ අතිරේක ක්‍රීඩකයෙක් ලෙස කැඳවීමට සුදානමින් සිටි නමුත් දුෂ්මන්ත චමීරගේ අබාධ තත්ත්වය සම්පූර්ණයෙන්ම සුවය ලැබීමත් සමඟ ශ්‍රී ලංකා කණ්ඩායමේ දුර්වල පන්දු යැවීමේ අංශය ශක්තිමත් කිරීම සඳහා අත්දැකීම් සහිත චමිරව කණ්ඩායමට ඇතුළත් කිරීමට තේරීම් කමිටුව තීරණය කර ඇත.

මතීෂ පතිරණගේ පන්දු යැවීමේ අතෙහි ඇතිවී තිබෙන ආබාධයක් හේතුවෙන් අවම වශයෙන් දින දහයකටවත් පිටියෙන් ඉවත්ව සිටින අතර, මතීෂ හෝ වෙනත් ක්‍රීඩකයෙකු ආබාධ මත ඉවත් කළහොත් අතිරේකව කැඳවනු ලබන දුෂ්මන්ත චමීරව 15 දෙනෙකුගෙන් යුත් සංචිතයට ගෙන ඒමට කණ්ඩායම් කළමනාකාරීත්වයට අවස්ථාවක් ලැබෙනු ඇත.

ශ්‍රී ලංකා කණ්ඩායමේ මැද පෙළ පිතිකරුවන් දිගින් දිගටම අසාර්ථක වනවිටත් කණ්ඩායමට කැඳවීමක් නොලැබූ ඇන්ජලෝ මැතිව්ස්, 2021 වර්ෂයේ තේරීම් කමිටුව විසින් නවක තරුණ ක්‍රීඩකයින් පදනම් කරගත් ප්‍රතිපත්තියක් හඳුන්වා දීමත් සමඟ සුදු පන්දු සංචිත (එක්දින සහ විස්සයි විස්ස) සඳහා සලකා බැලුවේ නැත.

පසුගිය මාර්තු මාසයේදී ශ්‍රී ලංකා කණ්ඩායමේ නවසීලන්ත සංචාරයේ දී මැතිව්ස්ව කණ්ඩායමට කැඳවූ අතර, එහිදී සාර්ථක ලකුණු ලබාගැනීමක නිරත වීමට ඔහුට නොහැකි විය. නවසීලන්තයට සහ ඇෆ්ගනිස්තානය සමඟ ඔහු අවසන් වරට ක්‍රීඩාකළ එක්දින ඉනිම හිදී ලබාගත්තේ පිලිවෙලින් ලකුණු 18, 0 සහ 12 ක් පමණයි. ඉන්පසුව ඔහුව නැවත සංචිතය සඳහා කැඳවීමක් සිදු කලේ නැත. ඔහුගේ අවසන් ජාත්‍යන්තර දස්කම් එසේ වුවත් නිමාවූ LPL තරගාවලියේදී සිය කණ්ඩායම ශුරතාවය සඳහා කැඳවා යමින් විශිෂ්ට ඉනිම් කිහිපයක්ම මෙන්ම දක්ෂ පන්දු යැවීමක නිරත වීමට ද මැතිව්ස්ට හැකියාව ලැබුණි. එමෙන්ම ලෝක කුසලානය පැවැත්වෙන ඉන්දියාව තුල දී මැතිව්ස් ගේ එක්දින පිතිකරණ සාමාන්‍යය 121.60 වැනි ඉතා ඉහල අගයක් ද ගනී.

කෙසේ වෙතත්, ලෝක කුසලානයේ නිමාවූ ශ්‍රී ලංකාව මුහුණ දුන් අවසන් තරගයේදී ඕස්ට්‍රේලියාව හමුවේ කඩුලු 5 කින් පරාජයට පත් වූ අතර, පළමු කඩුල්ලට ලකුණු 157ක් කුසල් ජනිත් පෙරේරා සහ පැතුම් නිශ්ශංක වාර්තා කල පසු ඉතිරි කඩුලු 9 දැවී යද්දිත් ශ්‍රී ලංකාවට ලබාගත හැකිවුයේ ලකුණු 209ක් පමණී. කෙසේ නමුත් සංචිතයේ අතිරේක ක්‍රීඩකයෙක් ලෙස කැඳවනු ලබන ඇන්ජලෝ මැතිව්ස්ට අවසන් 15 දෙනාගේ සංචිතයට එක්වීමට නම්, දැනට ක්‍රීඩා කරන ක්‍රීඩකයෙකු ආබාධයකට ලක්වී ඒ සඳහා තාක්ෂණික කමිටුවේ අනුමැතිය ද ලැබිය යුතුයි.

මේ අතර, දුෂ්මන්ත චමීර අවසන් වරට ශ්‍රී ලංකාව වෙනුවෙන් පසුගිය ජුනි මාසයේදී ඇෆ්ගනිස්ථානයට එරෙහිව සහ ලෝක කුසලාන සුදුසුකම් ලැබීමේ පෙරහුරු තරගවල දී ක්‍රීඩා කළේය.

– ශාෂිංක විදුසර හපුආරච්චි –