Israel-Hamas War – හමාස් සංවිධානය ප්‍රාණ ඇපයේ සිටි ඊශ්‍රයාල ජාතික වියපත් මාතාවන් දෙදෙනෙක් නිදහස් කරයි !

දකුණු ඊශ්‍රායලයේ ඔක්තෝබර් 7 වන දින ප්‍රාණ ඇපයට ගත් 200කට අධික ප්‍රාණ ඇපකරුවන් අතර සිටි ඊශ්‍රායල කාන්තාවන් දෙදෙනෙකු නිදහස් කළ බව හමාස් සංවිධානය නිවේදනය කළේය.

පලස්තීන හමාස් සටන්කාමී කණ්ඩායමේ සන්නද්ධ අංශයේ ප්‍රකාශක අබු උබයිඩා Telegram පණිවඩියක් මගින් දන්වා තිබුණේ මානුෂීය සහ දුර්වල සෞඛ්‍ය හේතුන් මත ඔවුන් නිදහස් කිරීමට තීරණය කළ බවය.

79 හැවිරිදි Nurit Cooper සහ 85 හැවිරිදි Yocheved Lifshitz නැමැති මෙම කාන්තාවන් දෙපළ ඊශ්‍රායල හමුදාවට භාර දුන් පසු ඔවුන් වෛද්‍ය මධ්‍යස්ථානයකට ගෙන යන බව ඊශ්‍රායල අගමැති කාර්යාලය උපුටා දක්වමින් රොයිටර් පුවත් සේවය වාර්තා කර ඇත.

කෙසේ වෙතත් මෙම වියපත් කාන්තාවන්ගේ ස්වාමිපුරුෂයින් හමාස් සංවිධානය විසින් තවමත් රඳවාගෙන සිටින බව විදෙස් මාධ්‍ය කියයි.

ගාසා දේශසීමා ආසන්නයේ කිබුට්ස් නිර් ඕස් ප්‍රදේශයෙන් මෙම කාන්තාවන් දෙදෙනාත් සමග ඔවුන්ගේ ස්වාමි පුරුෂයින් හමාස් සටන් කරුවන් විසින් පැහැරගෙන ගොස් තිබිණි.

සිකුරාදා ඇමරිකානු කාන්තාවක් සහ ඇගේ දියණිය නිදහස් කිරීමෙන් පසු හමාස් සටන් කරුවන් මෙම ප්‍රාණ ඇපකරුවන් දෙදෙනා නිදහස් කළේය.

ඊශ්‍රයාලය වෙනුවෙන් පෙනී සිටියත් හමාස් සංවිධානය ඇමරිකානු ජාතික ප්‍රාණ ඇපකරුවන් දෙදෙනෙක් පසුගිය සිකුරාදා නිදහස් කිරීමත් සමග ප්‍රාණ ඇපකරුවන් නිදහස් කරගැනීම සඳහා වඩාත් සංවාදශීලී ප්‍රවේශයකට පැමිණෙන ලෙස පෙන්ටගනය, ධවල මන්දිරය, සහ රාජ්‍ය දෙපාර්තමේන්තුව ඊශ්‍රයාලයෙන් පුද්ගලික ඉල්ලීම් වැඩි වශයෙන් සිදුකර ඇති බව රොයිටර් වාර්තා කරයි.