වෙඩි වැදී ප්‍රතිකාර ලබමින් සිටි අග්බෝට ආයිත් වෙඩි තියලා – තත්ත්වය බරපතළයි !

පාදයකට වෙඩි වැදී තුවාල ලබා ප්‍රතිකාර ලබමින් සිටි අග්බෝ හස්තියාට කිසියම් පුද්ගලයෙකු විසින් නැවත වෙඩි තබා තිබෙනවා.

ඒ, තිරප්පනේ වන්නම් මඩුව වැව් ඉස්මත්තේදී.

පශු වෛද්‍යවරුන් ප්‍රකාශ කරන්නේ අග්බෝ හස්තියාගේ තත්ත්වය බරපතළ බවයි.

පසුගිය ජූනි මාසයේදී බඳින තුවක්කුවකට හසුවීමෙන් අග්බෝ හස්තියාගේ ඉදිරිපස වම් පාදය දැඩි ලෙස හානි වී තිබුණා.

තුවාල සහිත හස්තියා අනුරාධපුර තිරප්පනේ රක්ෂිතයේ සිටියදී වනජීවී නිලධාරීන් විසින් සොයාගනු ලැබුවේ පසුගිය ජූනි මස 12 වැනිදායි.

විශාල ප්‍රමාණයේ දිගු දළ යුගලක් සහිත අඩි 10 ක් උසැති අග්බෝ හස්තියා පශු වෛද්‍යවරුන් හා වනජීවී නිලධාරීන් දිවා රෑ නොබලා සිදුකළ ප්‍රතිකාර හමුවේ ක්‍රමයෙන් සුවය ලබමින් සිටියා.

නමුත් පාදයේ අස්ථි බිඳීමක් සිදුව තිබූ බැවින් අග්බෝ හස්තියා සම්පූර්ණ සුවය ලැබීමට කල් ගතවනු ඇති බවයි වෛද්‍යවරුන් ප්‍රකාශ කළේ.

මෙලෙස ප්‍රතිකාර ලබමින් සිටි අග්බෝ හස්තියාට කිසියම් පුද්ගලයෙකු විසින් නැවත වෙඩි තබා තිබෙනවා.

මේ වන විට අග්බෝ හස්තියාගේ තත්ත්වය බරපතළ බවයි වෛද්‍යවරුන් ප්‍රකාශ කළේ.