ශ්‍රී ලංකා ක්‍රිකට් තහනම් කරවාගන්න ශම්මි තවත් ලිපි තුනක් අයි.සී.සියට යවලා – ලිපි තුන ම හා සම්පූර්ණ විස්තරය මෙන්න !

ජාත්‍යන්තර ක්‍රිකට් කවුන්සිලය විසින් ශ්‍රී ලංකාවට ක්‍රිකට් තහනමක් ක්‍රියාත්මක කරවීමට මග පෑදීම සඳහා ශ්‍රී ලංකා ක්‍රිකට් ආයතනයේ සභාපති ශම්මි සිල්වා විසින් ජාත්‍යන්තර ක්‍රිකට් කවුන්සිලය වෙත යවන ලද ලිපියක් විපක්ෂ නායක සජිත් ප්‍රේමදාස මහතා විසින් ඊයේ (18) පාර්ලිමේන්තුවේ සභා ගත කළා.

Contents

නොවැම්බර් 6 ලියුම!නොවැම්බර් 7 ලියුම!නොවැම්බර් 9 ලියුම!

ඉකුත් අගෝස්තු 28 වැනි දා ජාත්‍යන්තර ක්‍රිකට් කවුන්සිලයේ සභාපති ග්‍රෙග් බාර්ක්ලේ වෙත ශ්‍රී ලංකා ආයතනය විසින් අතිරේක කරුණක් සහිත ව බරපතල චෝදනා පහක් ඇතුළත් කරමින් යවා ඇති ලිපිය සභාගත කළ පසු ඇති වූ ආන්දෝලනාත්මක තත්ත්වය යටතේ ශ්‍රී ලංකා ක්‍රිකට් ආයතනය කරුණු දැක්වීමක් කරමින් කියා සිටියේ, විපක්ෂ නායකවරයා විසින් කරන ලද චෝදනා ප්‍රතික්ෂේප කරන බවත්, නොයෙකුත් අනතුරු ඇඟවීම් නොතකා ක්‍රීඩා අමාත්‍ය රොෂාන් රණසිංහගේ අඛණ්ඩ මැදිහත්වීම් හේතුවෙන් ශ්‍රී ලංකා ක්‍රිකට් ආයතනය අත්හිටුවීම සිදු ව ඇති බවයි.

නමුත් එම කරුණු දැක්වීමෙන් අනතුරුව ශ්‍රී ලංකාවේ විපක්ෂ නායකවරයා අද (19) විශේෂ අනාවරණයක් කරමින් සඳහන් කළේ, ශ්‍රී ලංකාවට ක්‍රිකට් තහනමක් පැනවීමට මග පෑදූ එක ම ලිපිය ශ්‍රී ලංකා ක්‍රිකට් ආයතනය විසින් යොමු කරන ලද 2023.08.23 වැනි දිනැති ලිපිය පමණක් නොව තවත් ලිපි තුනක් මග පාදා ඇති බවයි.

ඒ අනුව විපක්ෂ නායකවරයා විසින් කරන විශේෂ අනාවරණයෙන් සඳහන් කරන්නේ, ඉකුත් නොවැම්බර් 6, 7 හා 9 යන දිනවල දී ශ්‍රී ලංකා ක්‍රිකට් සභාපති ශම්මි සිල්වාගේ අත්සනින් යුතුව ජාත්‍යන්තර ක්‍රිකට් කවුන්සිලයේ සභාපති ග්‍රෙග් බාර්ක්ලේ වෙත යවා ඇති ලිපි පරිශීලනය කිරීම තුළින් ශ්‍රී ලංකාවේ ක්‍රිකට් තහනම් වූ ආකාරය අවබෝධ කර ගත හැකි බවයි.

ඒ අනුව,

නොවැම්බර් 6 වැනි දා ශ්‍රී ලංකා ක්‍රිකට් සභාපති ශම්මි සිල්වාගේ අත්සනින් යුතුව යවන ලද ලිපියෙන්, අන්තර් වාර කමිටුව විවේචනයට ලක් කර දේශපාලන ඇගිලි ගැසිමි සිදුවන බව පවසා ඇති බවත්, ඇමතිවරයාට බලපෑම් කරන ලෙසත් ඉල්ලා තිබෙන බවත්,
නොවැම්බර් 07 දිනැති ලිපියෙන් අන්තර් වාර කමිටුව ක්‍රිඩා පනත උල්ලංඝනය කර ඇති බවත්, එය ICC ව්‍යවස්ථාවට පටහැනි බවත්, යම් හෙයකින් අන්තර් වාර කමිටුවක් පත් කළහොත් ක්‍රිකට් තහනම් කිරීමට සිදුවන බව පවසන ලෙසත් එම ලිපිවල සඳහන් ව තිබෙනවා.
නොවැම්බර් 07 වැනි දා ශ්‍රී ලංකා ක්‍රිකට් සභාපති ශම්මි සිල්වාගේ අත්සනින් යුතුව ජාත්‍යන්තර ක්‍රිකට් කවුන්සිලය වෙත යවන ලද ලිපියයේන් ඉල්ලා සිටින්නේ, එළඹෙන ජනවාරියේ මෙරට සත්කාරකත්වය යටතේ පැවැත් වීමට නියමිත වයස අවුරුදු 19න් පහළ ලෝක කුසලානය පැවැත්වීම, 2024 ICC ජාත්‍යන්තර සම්මේලනය, 2026 වසරේ පැවැත් වීමට නියමිත විස්සයි විස්ස (පිරිමි) ලෝක කුසලාන තරගාවලිය, 2027 වසරේ පැවැත් වීමට නියමිත විස්සයි විස්ස (කාන්තා) ලෝක ශූරතා තරගාවලිය ආදී මෙරට සත්කාරකත්වය යටතේ පැවැත්වීමට නියමිත ක්‍රියාකාරකම් වෙනත් රටට පවත්වනවා යැයි බලපෑම් කරන ලෙස යි.
තවද 3 වැනි ලිපිය හෙවත් නොවැම්බර් 09 වැනි දිනැති ලිපිය මගින් ශ්‍රී ලංකා ක්‍රිකට් ආයතනය ජාත්‍යන්තර ක්‍රිකට් ආයතනය වෙත දන්වා සිටින්නේ, ශ්‍රී ලංකා ක්‍රිකට් අර්බුදය සම්බන්ධයෙන් ඉකුත් දා පාර්ලිමේන්තුවේ පැවති විවාදය ක්‍රීඩා ඇමතිගේ මුල පිරීම මත සිදු කළ බවත්, ශ්‍රී ලංකා ක්‍රිකට්හි සාමාජිකයන් ඉවත් කර ස්වාධීනත්වයට බලපැම් කර ඇති බවයි. එසේ ම ක්‍රිකට් ව්‍යවස්ථාව වෙනස් කිරීමට කටයුතු කරන බවත් එය ICC ව්‍යවස්ථාව පටහැනි බවත් ශ්‍රී ලංකා ක්‍රිකට් ලබන ආදායමෙන් සියයට 20ක් ක්‍රීඩා අමාත්‍යාංශයට ඉල්ලා සිටින බවත් එම ලිපියේ වැඩිදුරටත් සඳහන්.

මෙම ලිපි පෙළ ප්‍රසිද්ධ කරමින් විශේෂ ප්‍රකාශයක් කළ විපක්ෂ නායක සජිත් ප්‍රේමදාස මහතා වැඩිදුරටත් සඳහන් කළේ, මෙම ලිපිවල අන්තර්ගත තොරතුරු සාවද්‍ය බවත් මෙහි දී කිිසිදු දේශපාලන ඇගිලි ගැසිමක් නොවු බවත් මෙය ගජමිතුරු ක්‍රීඩාවක් නොවන බවත්, මෙය මෙරට සමස්ත ජනතාවගේ ම ක්‍රීඩා අයිතිය උල්ලංඝනය කිරීමක් බවයි.

මේ අතර අද මාධ්‍ය සාකච්ඡාවක් පවත්වමින් ක්‍රීඩා අමාත්‍ය රොෂාන් රණසිංහ මහතා අවධාරණය කළේ, මොනරා ඉහත දී විස්තර කළ නොවැම්බර් 07 වැනි දිනැති ලිපිය මගින් ශ්‍රී ලංකා ක්‍රිකට් ආයතනය විසින් ශ්‍රී ලංකා ක්‍රිකට් තහනම් කරන ලෙස ජාත්‍යන්තර ක්‍රිකට් කවුන්සිලයෙන් ඉල්ලා ඇති බව යි.

අදාළ ලිපි තුන පහතින්