කිලිනොච්චියේ ක්ලෙමෝ බෝම්බ නිශ්පාදන කම්හලක් වටලයි – සකස් කළ බෝම්බ 13ක් සමග පුද්ගලයින් 02ක් අත් අඩංගුවට !

ක්ලේමෝ බෝම්බ සකසමින් සිටි හිටපු කොටි සාමාජිකයෙකු හා තවත් අයෙකු කිළිනොච්චිය නාච්චිකුඩා ප්‍රදේශයේදී පොලිස් ත්‍රස්ත මර්ධන ඒකකය විසින් ක්ලේමෝ බෝම්බ තොගයක් සමග ඊයේ (10) අත් අඩංගුවට ගෙන තිබේ.

ඔවුන් දෙදෙනා විසින් නිපදවන ලද විශාල ප්‍රමාණයේ අධි බලැති ක්ලේමෝ බෝම්බ 13 ක් හා තවත් ක්ලේමෝ බෝම්බ කවර හා බෝම්බ කොටස් 18 ක් සොයා ගනීමට පොලිස් ත්‍රස්ත මර්දන ඒකකය සමත් වී තිබේ.

මෙම කොටි සාමාජිකයා රජයේ පුනරුත්ථාපන වැඩ සටහනට යොමු කොට නිදහස් කිරීමෙන් පසුව ඔහු මුලතිව් සිවිල් ආරක්ෂක බලකායට බැඳී සේවය කොට තිබේ.

හිටපු කොටි සාමාජිකයා මන්නාරම වේලාන්කුලම ප්‍රදේශයේ පදිංචිකරුවෙක් වන අතර ඔහුගේ මිතුරා කිළිනොච්චිය නාච්චිකුඩා ගම්මානයේ පදිංචිකරුවෙකි.

මිතුරාගේ නිවස පිහිටි නාච්චිකුඩා ගම්මානයේ බෝට්ටු කොටස් අලුත්වැඩියා කිරීමේ හා මල්පෝච්චි සකසන ෆයිබර් වැඩ පලක් ඔවුන් දෙදෙනා විසින් පවත්වා ගෙන ගොස් තිබේ.

ඒ අතරවාරයේ හිටපු කොටි සාමාජිකයා හා ඔහුගේ මිතුරා ක්ලේමෝ බෝම්බ නිෂ්පාදනය කිරීමේ කටයුතු වල ද නිරත වී ඇත.

පොලිස් ත්‍රස්ත මර්දන ඒකකයේ නිලධාරීන්ට ලබුණු තොරතුරක් මත නිලධාරීන් පිරිසක් නාච්චිකුඩා ප්‍රදේශයට ගොස් ඔහුගේ වැඩපල පරීක්ෂාවට ලක් කිරීමේ දී ක්ලෙමෝ බෝම්බ තැනීම සඳහා යොදා ගන්නා පිට කවර කීපයක් නිපදවා ඇති ආකාරය දැක ඔවුන් දෙදෙනාගෙන් ප්‍රශ්න කොට තිබේ.

ඒ අනුව ඔවුන් විසින් නිපදවා සගවා තිබූ ක්ලේමෝ බෝම්බ හා බෝම්බ කොටස් සොයා ගැනීමට පොලිස් නිලධාරීන්ට හැකි වී තිබේ.

අත් අඩංගුවට ගත් දෙදෙනාගෙන් හිටපු කොටි සාමාජිකයා කොළඹ ත්‍රස්ත මර්දන ඒකකය වෙත රැගෙන ගොස් ඇති අතර අනෙක් තැනැත්තාව කිළිනොච්චිය පොලීසියේ ත්‍රස්ත මර්දන ඒකකයේ රඳවා ගෙන ප්‍රශ්න කරගෙන යයි.

හිටපු කොටි සාමාජිකයා විසින් මෙවර මහවිරු දිනය නිමිත්තෙන් නාච්චිකුඩා ප්‍රදේශයේ විශාල උත්සවයක් සංවිධානය කළ අයෙකු බවට ද තොරතුරු හෙළි වී තිබේ.

පොලිස් ත්‍රස්ත මර්දන ඒකකය මෙම සිද්ධිය සම්බන්ධයෙන් වැඩිදුර පරීක්ෂණ සිදු කරගෙන යයි.