සමලිංගික යුවලවලට ආශිර්වාද කිරීමට පාප් වහන්සේ පූජකවරුන්ට අවසර ලබාදෙයි!

ෆ්‍රැන්සිස් පාප් වහන්සේ සමලිංගික යුවලවලට ආශිර්වාද කිරීමට පූජකවරුන්ට අවසර දී තිබෙනවා.

එය සමලිංගික ප්‍රජාව වෙනුවෙන් රෝමානු කතෝලික පල්ලිය ගත් සාදනීය පිවරක් ලෙස සඳහන්. රෝමානු කතෝලික පල්ලියේ නායක, පාප් වහන්සේ කියා සිටියේ යම් යම් තත්වයන් යටතේ සමලිංගික සහ “අක්‍රමවත්” ලෙස සමාජය විසින් හඳුනා ගන්නා යුවලවලට ආශිර්වාද කිරීමට පූජකයන්ට අවසර දිය යුතු බවයි.

නමුත් වතිකානුව පැවසුවේ මෙලෙස කෙරෙන ආශීර්වාද නිතිපතා පල්ලියේ චාරිත්‍රවල කොටසක් හෝ විවාහ මංගල්‍යවලට සම්බන්ධ නොවිය යුතු බවයි.

විවාහය ස්ත්‍රියක් සහ පුරුෂයෙකු අතර සිදු විය යුත්තක් ලෙස සලකන බවයි එහි වැඩිදුරටත් සඳහන් වන්නේ. ෆ්‍රැන්සිස් පාප් වහන්සේ සඳුදා මෙම නව වෙනස ප්‍රකාශයට පත් කරමින් වතිකානුව නිකුත් කළ ලේඛනය අනුමත කළ අතර, වතිකානුව කියා සිටියේ එම තීරණය “දෙවියන් වහන්සේ සියල්ලන්ම සාදරයෙන් පිළිගනී” යන්නට ලකුණක් විය යුතු බවයි.

නමුත් පූජකයන්ට එක් එක් සිද්ධිය අනුව තීරණය කළ හැකි බවත් එහි දක්වා තිබෙනවා. මෙම නව ප්‍රකාශය “විවාහය පිළිබඳ පල්ලියේ සාම්ප්‍රදායික මූලධර්මය මත ස්ථිරව” පවතින බව පල්ලියේ ප්‍රධානියා වන කාදිනල් වික්ටර් මැනුවෙල් ෆර්නැන්ඩස් පවසා තිබෙනවා.