දෙනෝ දාහක් බලා සිටියදී කාන්තාවක් නිරුවත් කර පාරේ ඇවිද්දවයි – කණුවක ගැටගහයි!

කාන්තාවන් නිරුවත් කර පාරවල් දිගේ ඇවිද්දවීම ඉන්දියාවෙන් නිතර වාර්තාවන තත්ත්වයක් බවට පත්ව තිබේ.

මේ පිළිබඳව කාන්තා සංවිධාන ඇතුළු බොහෝ පාර්ශ්වවල අවධානය වැඩි වැඩියෙන් යොමු වෙමින් තිබෙනු දැකිය හැකිය. මෙයට දින කිහිපයකට පෙරද මෙවැනි සිද්ධියක් එරට කර්ණාටක ප්‍රාන්තයෙන් වාර්තා වී තිබිණි.

හොසා වන්තමුරි ගම්මානයේ සිදුවීම

හොසා වන්තමුරි නමැති ගම්මානයේ පදිංචිකාරියක වූ කාන්තාවක් එදින දහවල් සිය නිවසේ සිටියදී දහ දෙනෙකුගෙන් පමණ සමන්විත කණ්ඩායමක් ඇගේ නිවසට කඩා වැදී තිබිණි. එයින් පසු එම පිරිස ඇය නිවසින් පිටතට ඇදගෙන ගොස් ඇඳුම් උනා දමා, පාරවල් දිගේ ඇවිද්දවා පසුව හන්දියක කණුවක ගැට ගසා පහර දී ඇත. ඇය වයස අවුරුදු 42ක කාන්තාවකි.

ඉහත කී පිරිස ඇයට මේ ආකාරයෙන් දඬුවම් කර තිබුණේ ඇයගේ 24 හැවිරිදි පුත්‍රයා එම පිරිසට අයත් කෙනෙකුගේ දියණියක සමග රහසින් පලා යෑම නිසාය. එම දියණිය වෙනත් කෙනෙකුට විවාහ කර දීමට සැලසුම් කර තිබී ඇති බව ද වාර්තා වේ. ඇයගේ පවුලේ අය ඉහත කී කාන්තාව නිරුවත් කර ඇවිද්දවා තිබුණේ ඇයගේ පුත්‍රයා ඔහුගේ පෙම්වතිය සමග සැඟවී සිටින තැනක් දැන ගැනීමටය. සිද්ධිය ගැන සැලවීමෙන් පසු පොලිසිය එහි පැමිණ කාන්තාව බේරාගෙන රෝහල් ගත කර තිබිණි. ඇය දැඩි මානසික කම්පනයකට පත්ව සිටින බව වාර්තා වේ. කාන්තාවගේ සැමියා පවසා තිබුණේ තම පුත්‍රයා ඉහත කී ආකාරයේ ප්‍රේම සම්බන්ධයක් පැවැත් වූ බව තමාවත්, බිරිඳවත් නොදැන සිටි බවයි.

කාන්තාවන්ට දැඩි ලෙස නිගා දෙන, ඔවුන් දරුණු ලෙස ලජ්ජාවට පත් කරන මෙවැනි සිදුවීම් සුළභ වෙමින් තිබීම කාන්තාවන්ගේ මෙන්ම බලධාරීන්ගේ ද අවධානයට ලක් වෙමින් තිබේ. ගැබිනි කාන්තාවක් මේ ආකාරයෙන් නිරුවත් කර ඇවිද්දවීමේ සිද්ධියක් ද මෙයට මාස කිහිපයකට පෙර විශාල ආන්දෝලනයක් ඇති කළේය.

රාජස්ථාන් සහ ගුජරාට් සිදුවීම්

රාජස්ථාන් ප්‍රාන්තයේ සිදු වූ මෙම කනගාටුදායක සිද්ධියට මුහුණ දී තිබුණේ 20 හැවිරිදි වියේ කාන්තාවකි. ඇය මේ ආකාරයෙන් නිරුවත් කර තිබුණේ ඇගේම සැමියා සහ ඔහුගේ පවුලේ අයයි. එයට හේතු වී තිබුණේ මෙම තරුණිය සැමියා අත්හැර වෙනත් පිරිමියකු සමග පලා යෑමය. මෙයට ටික කලකට පෙර ගුජරාත් ප්‍රාන්තයෙන් ද මෙවැනිම සිද්ධියක් ගැන වාර්තා වූ අතර ඊට ද හේතු වී තිබුණේ අදාළ කාන්තාව සිය සැමියා අත්හැර යෑමය. සැමියන් අත්හැර යන කාන්තාවන් මෙවැනි දඬුවම්වලට ලක් වුවත් බිරියන් අතහැර යන පිරිමින්ට එවැනි දඬුවම් ලැබෙන්නේ නැත. ජාතිවාදී, වර්ගවාදී පළිගැනීම් ලෙස ද සමහර අවස්ථාවල මෙවැනි දඬුවම් ක්‍රියාත්මක වෙයි.

ලොව පුරා විශාල විරෝධයක් ඇතිකළ මනිපූර් සිදුවීම

පසුගිය ජුලි මාසයේ මනිපූර් ප්‍රාන්තයෙන් එවැනි සිදුවීමක් ගැන වාර්තා වූ අතර එය ලොව පුරා විශාල විරෝධයක් ඇති කළ සිදුවීමක් බවට පත් විය. මනිපූර් ප්‍රාන්තයේ වෙසෙන කුකි සහ මේතෙයි යන ජනවර්ග දෙක අතර දැන් කාලයක සිටම ගැටුම් පවතී. මෙම ගැටුම්වලට මැදි වන කාන්තාවන් නිතර විවිධ හිංසනයන්ට ගොදුරු වනු දක්නට ලැබේ. ඉහත කී සිද්ධියට මුහුණ දී තිබුණේ කුකි නමැති ජන වර්ගයට අයත් කාන්තාවන් දෙදෙනෙකි. මේතෙයි ජන වර්ගයට අයත් පිරිමින් පිරිසක් ඔවුන් දෙදෙනා නිරුවත් කර පාරවල් දිගේ අවිද්දවන ආකාරය දැක්වෙන වීඩියෝවක් ද මාධ්‍ය තුළ සංසරණය විය. මෙම කාන්තාවන්ගෙන් එක් අයෙකු සමූහ දූෂණයට ලක් කර තිබූ බවට ද චෝදනා එල්ල විය. කුල ප්‍රශ්න නිසා ද කාන්තාවෝ මෙවැනි ලජ්ජා සහගත සිද්ධීන්ට ගොදුරු වෙති. ටික කලකට පෙර දාලිත් නමැති කුලයේ කාන්තාවන් පස් දෙනෙකු නිරුවත් කර ඇවිද්දවීමේ සිද්ධියක් විශාල අවධානයක් දිනා ගත්තේය. ඔවුන්ට මෙම දඬුවම ලබා දී තිබුණේ ඔවුන් ජීවත් වූ උත්තර් ප්‍රදේශ් ප්‍රාන්තයේ උසස් යයි පිළිගත් කුලයකට අයත් පවුලකි. එම පවුලේ දියණියක දාලිත් තරුණයකු සමග පලා යෑම මෙම සිද්ධියට පසුබිම් වී තිබිණි.

කාන්තා ක්‍රියාකාරිනියන් සහ කාන්තා සංවිධාන පෙන්වා දෙන්නේ මෙවැනි බොහෝ සිදුවීම් නිසි ආකාරයෙන් වාර්තා නොවන තත්ත්වයක් ද පවතින බවයි. මේ ආකාරයේ සිදුවීම් ගැන පැමිණිලි කළ විට එයින් ද අපහසුතාවට පත්වන්නේ කාන්තාවන් සහ ඔවුන්ගේ සමීපතමයන් වීම ඊට එක් හේතුවක් වී තිබේ.

පොලිස් ස්ථානවල දී සහ උසාවිවල දී මෙම කාන්තාවන්ගෙන් ප්‍රශ්න කරන්නේ ඉතා අසංවේදී ආකාරයෙන් බවත්, එයින් ඔවුන් තවත් ලජ්ජාවට, අපහසුතාවට පත්වන බවත් කාන්තා ක්‍රියාකාරිනියෝ පෙන්වා දෙති. කාන්තාවන්ට සිදුවන මෙම අසාධාරණ නතර කිරීම සඳහා ගතහැකි පියවර සම්බන්ධයෙන් විවිධ පාර්ශ්වවල දැඩි අවධානයක් යොමු වෙයි.

සමාජය තුළ ආකල්ප අතින් වෙනසක් ඇති කිරීම එහි දී ප්‍රධාන සහ වැදගත් පියවරකි. කාන්තාවන්ට ගෞරවයෙන් සැලකීමට යොමු කරන අධ්‍යාපනයක් ලබාදීම අතිශයින් වැදගත් බව බොහෝ පාර්ශ්ව පෙන්වා දෙති. කාන්තාවන් මේ ආකාරයෙන් ලජ්ජාවට පත් කිරීම සම්බන්ධයෙන් ලබා දෙන දඬුවම් ප්‍රමාණවත් නොවන බවටද අදහස් පළ වේ.

මෙවැනි වරදකරුවන්ට බොහෝ විට ලැබෙන්නේ වසර තුනක පමණ සිර දඬුවමක් බව සඳහන් වේ. මෙය කිසිසේත් ප්‍රමාණවත් නොවන බව නීතිවේදීහු ද, කාන්තා ක්‍රියාකාරිනියෝ ද පෙන්වා දෙති. කාන්තාවන් නිරුවත් කර පාරවල ඇවිද්දවද්දී බොහෝ දෙනෙකු බලා සිටින මුත් එම ක්‍රියා වැළැක්වීම සඳහා බොහෝ විට කිසිවකු ඉදිරිපත් නොවීම කනගාටුදායක කාරණයක් වී තිබේ.

මේ සම්බන්ධයෙන් ද යම් ක්‍රියාමාර්ගයක් ගත යුතුව ඇති බව ඉහත කී පාර්ශ්වවල අදහසයි. මෙවැනි සිදුවීම්වලට මෙම “නරඹන්නන්ද” වගකිව යුත්තන් බවට පත් කිරීමේ ක්‍රමවේදයක් සකස් වියයුතු බව ඔවුහු පෙන්වා දෙති.