ශ්‍රී ලංකන් ගුවන් සමාගමේ ගුවන් යානයකට පාකිස්ථානයේ ලාහෝර් ගුවන්තොටුපොළේදී මීයෙකු රිංගා තිබෙනවා.
මේ හේතුවෙන් යානය පියාසර කිරීමට නොහැකිව දින හතරක් නවතා දමා තිබෙන බව ශ්‍රී ලංකා ගුවන් සමාගමේ ඉංජිනේරු අංශ ප්‍රධානී අර්ජුන කපුගීකියන මහතා ඊයේ (26) ප්‍රකාශ කළා.
එම යානය ලාහෝර් ගුවන්තොටුපොලේ නවතා දමා තිබෙන විට එම සත්වයා මගියෙකුගේ බෑගයකින් යානයට ඇතුල් වී ඇති බවට සැක පළ කරනවා.
එම සත්වයා ඉවත් කිරීම සම්බන්ධයෙන් විවිධ පාර්ශවයන්ගෙන් උපදෙස් ලබා ගැනීමට සිදු වූ බවත් ගුවන් යානය තුළ ද්‍රව්‍යයක් යොදා මීයා ඉවත් කිරීමට දින තුනක් පමණ ගතවූ බවත් ඔහු කියා සිටියා.
ඒ අනුව, ඉකුත් 25 වැනි දා මීයා අල්ලා ගැනීමට හැකි වූ බව එම සාකච්ඡාවේ දී ශ්‍රී ලංකා ගුවන් සමාගමේ නිලධාරීහු කියා සිටියා.
කෙසේවෙතත් ගුවන් යානයට එම සත්ත්වයාගෙන් හානියක් සිදු වී ඇත්දැයි සොයා බැලීමට තාක්ෂණ ශිල්පීන් මේ වන විට පරීක්ෂණ කරමින් සිටින බවට තොරතුරු වාර්තා වනවා.
ශ්‍රී ලංකා ගුවන් සේවයේ ගුවන් ගමන් ප්‍රමාදවීම සහ අවලංගුවීම සම්බන්ධයෙන් වරාය, නාවික හා ගුවන් සේවා අමාත්‍යාංශයේ ඊයේ (26) පැවැති මාධ්‍ය හමුවේ දී යි මෙම තොරතුරු අනාවරණය වුණේ.
එම මාධ්‍ය හමුවේ දී අමාත්‍යවරයා සහ නිලධාරියෙකු අතර වූ සංවාදය ජාතික පුවත්පතක් දක්වා තිබුණේ මේ ආකාරයට යි.
ඇමැති නිමල් සිරිපාල ද සිල්වා:
ගුවන් යානයකට පැය ගානකට කලින් මීයෙක් රිංගුවා කිව්වා. කවුද මීයෙක් රිංගනවා දැක්කේ.
ශ්‍රී ලංකා ගුවන් සමාගමේ නිලධාරියෙක්:
ගුවන් මගියෙක් දැක්කේ.
ඇමැති:
ඉතිං. උගුලක් දාලා මීයා ඇල්ලුවා නම් ඉවරයිනේ. ඇයි මීයොන්ට ඒ පැත්තට එන්න දෙන්නේ.
නිලධාරියා:
සර්, මේක පාකිස්තානයේ ලාහෝර්වලදී සිදුවෙලා තියෙන්නේ. බෑග් එකකින් වැටුණා කියලා තමයි හිතන්නේ. සාමාන්‍යයෙන් ඔයවගේ දේවල් වෙනවා. කැරපොත්තෝ එහෙම ඉන්න අවස්ථාත් තිබෙනවා.
ඇමැති:
ලාහෝර්වලදී මීයෙක් වැටුන හින්දා ඒ ගුවන් යානය ලාහෝර්වල ඉඳන් ආවනේ කරදරයක් නැතිව.
නිලධාරියා:
මීයා ඉන්න නිසා අපිට ගුවන් යානය නිදහස් කරන්න බෑනේ. මොකද මීයා වයර් කපලා යම් හානියක් කරන්න පුළුවන් නිසා.
ඇමැති:
මීයා අල්ලාගන්න කොච්චර වේලාවක් ගියාද. බෙහෙත් ගහන්න. නිර්වින්දනය කරන්න ක්‍රමවේද තියෙනවානේ. මීයෝ අල්ලාගන්න තාක්ෂණය තියෙනවානේ.
නිලධාරියා:
පහසු ම, බෙහෙත් තියලා අල්ලාගන්න එක.
ඇමැති:
මීයා ඇල්ලුවාද. අල්ලන්න කොපමණ වේලාවක් ගියාද.
නිලධාරියා:
ගුවන් යානය ආවේ ඉකුත් 22 වැනිදා. 25 වැනිදා උදේ තමයි මීයා ඇල්ලුවේ.
ඇමැති:
25 වැනිදා වනතුරුම ඒ ගුවන් යානය කොහේවත් ගියේ නැද්ද.
නිලධාරියා:
නෑ. දුවන්න බෑ. ගුවන් යානයට කෙමිකල් එක ගහලා දවසක් වහලා තියන්න ඕනේ මීයා මැරෙන්න. ඊට පස්සේ වයර් පද්ධතිය පරීක්ෂා කරන්න ඕනේ.
මීමුරේ කරඹකැටිය ප්‍රදේශයේ අද සවස වෑන් රථයක් පෙරළීමෙන් සිදුවූ අනතුරින් පුද්ගලයන් තිදෙනෙකු මියගොස් ඇති බව…
රාජ්‍ය බුද්ධි සේවයේ හිටපු අධ්‍යක්ෂ ජ්‍යෙෂ්ඨ නියෝජ්‍ය පොලිස්පති නිලන්ත ජයවර්ධන පොලිස් සේවයෙන් පහ කිරීමට ජාතික…
තලවතුගොඩ ප්‍රදේශයේ සමාජ ශාලාවක් අසල අද (19) අලුයම සිදුකළ වෙඩි තැබීමේ සිද්ධිය සම්බන්ධයෙන් අත්අඩංගුවට ගත්…
කෙතරම් විරෝධතා සහ බාධක පැමිණිය ද වැව් රක්ෂිතවල අනවසර ඉදිකිරීම් සියල්ල ඉවත් කරන බව කෘෂිකර්ම,…
යූකැලිප්ටිස් වර්ගයේ ගසක අත්තක් හිස මතට කඩා වැටීමෙන් (19) දින උදෑසන 10:00ට පමණ පුද්ගලයෙකු එම…
කටුනායක ගුවන්තොටුපොළ කලාපය තුළ සරුංගල් යැවීමෙන් වළකින ලෙස ගුවන්තොටුපොළ කළමනාකරණ අංශ ප්‍රධානී අරුණ රාජපක්ෂ ජනතාවගෙන්…