ෆේස්බුක් එකෙන් හඳුනාගත් සිසුවියව සිව්දෙනෙක් දූෂණය කරයි !

මුහුණු පොත ඔස්සේ හදුනාගත් දාහතර හැවිරිදි පාසල් සිසුවියක දූෂණය කළේ යැයි කියන අයියා මලෝ දෙදෙනකු ඇතුළු තරුණයන් හතරදෙනකු අත්අඩංගුවට ගැනීමට ඇඹිලිපිටිය මූලස්ථාන පොලිසියේ ළමා හා කාන්තා කාර්යාංශයේ නිලධාරීහු කණ්ඩායමක් පුළුල් පරීක්ෂණ පවත්වති.

අධ්‍යාපන කටයුතු සිදුකරගෙන යෑම සඳහා මව්පියන් විසින් ලබාදෙනු ලැබූ ජංගම දුරකථනය සිසුවිය පෙම්වතුන් සමග කතාකිරීමට යොදාගෙන ඇති බව කියති.

සැකකරුවන් ඇඹිලිපිටිය ප්‍රදේශයේ වැව්තාවුල්ලක් අසලදී ලැගුම්හලක දී මෙම සිසුවිය දූෂණය කර ඇති අතර, තවත් එක් අවස්ථාවක දී ඇය ඉගෙනුම ලබන පාසලේ ක්‍රිකට් තරගයක් පැවැති අවස්ථාවක දී පාසල් වැසිකිළිය තුළදී ඇය ආදි සිසුවකු වන එක් තරුණයකු විසින් බරපතළ ලිංගික අපයෝජනයකට ලක්කර තිබෙන බව පරීක්ෂණ වලින් හෙළිවී ඇතැයි පොලිසිය සඳහන් කරයි.

මෙම ආදි සිසුවා හඳුනාගෙන ඇතැයි ද කියන්නේ මුහුණු පොතෙනි.

මෙම බාලවයස්කාර සිසුවියගේ පියා කොළඹ ප්‍රදේශයේ රැකියාවක නිරතව සිටින අතර ඔහු වරින්වර බැංකුවට එවන මුදල් රැගෙන ඒමට මව පිටව යන අවස්ථා කල්තියා දැනගෙන ඒ බව මුහුණු පොතෙන් හඳුනාගත් පෙම්වතුන්ට දැනුම් දී නිවෙසට ගෙන්වා ගෙන තිබෙන බවට ද තොරතුරු අනාවරණය වී ඇතැයි පොලිසිය කියයි.

මෙම සිසුවිය දූෂණය කළේ යැයි කියන එක් අයෙක් ඇඹිලිපිටිය මුලස්ථාන පොලිසියේ ළමා හා කාන්තා කාර්යාංශයේ නිලධාරීන් කණ්ඩායමක් විසින් මීට පෙර සැකපිට අත්අඩංගුවට ගෙන මේ වන විට රිමාන්ඩ් භාරයට පත්කරනු ලැබ සිටී.

මෙම සිසුවිය වෛද්‍ය පරීක්ෂණයක් සඳහා ඇඹිලිපිටිය රෝහලේ අධිකරණ වෛද්‍ය විශේෂඥවරයා හමුවට ඉදිරිපත් කරනු ලැබ ඇත.

මෙම බාලවයස්කාර සිසුවිය තවත් කිහිපදෙනකු අතින්ම දූෂණය වී ඇති බවට අධිකරණ වෛද්‍ය විශේෂඥවරයා විසින් හෙළිකරගෙන ඒ බව ඇඹිලිපිටිය මූලස්ථාන පොලිසියට දැනුම්දුන් බව උසස් පොලිස් නිලධාරියෙක් පවසා ඇත.

ඉන් පසුව මෙම සිද්ධීන්වලට අදාළව දීර්ඝ ලෙස ප්‍රශ්න කර ප්‍රකාශ ලබාගෙන ඇය දූෂණයට ලක්කළ බව කියන තරුණයන් තිදෙනකු සහ බරපතළ ලිංගික අපයෝජනයකට ලක්කළ බව කියන තරුණයකු අත්අඩංගුවට ගැනීමට පරීක්ෂණ ආරම්භ කර තිබේ