පාස්කු ඉරු දින ත්‍රස්ත ප්‍රහාර සිද්ධියෙන් පසුව ජනාධිපතිවරයාගේ නියෝග මත ත්‍රස්තවදය වැළැක්වීමේ පනත යටතේ පොලීසිය භාරයට ගනු ලැබූ දෙහිවල සහ බේරුවල ප්‍රදේශවල පිහිටි සුඛෝපභෝගී නිවාස දෙක අල් කයිඩා සහ ජාතික තව්හීද් ජමාත් සංවිධානයේ ත්‍රස්ත ක්‍රියාකාරකම් සඳහා යොදාගෙන ඇති බවට කරුණු අනාවරණය වී ඇතැයි නීතිපතිවරයා විසින් ශ්‍රේෂ්ඨාධිකරණයට දැනුම් දී තිබේ.
මීට අදාළව ජ්‍යේෂ්ඨ රජයේ නීතිඥ ශමින්ද වික්‍රම මහතා විසින් ඉදිරිපත් කළ කරුණු සලකා බැලූ ප්‍රීති පද්මන් සූරසේන, ශිරාන් ගුණරත්න සහ මහින්ද සමයවර්ධන යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ලක් විසින් අදාළ නිවාස පවරා ගැනීමට ජනාධිපතිවරයා විසින් ගනු ලැබූ තීරණය බලරහිත කිරීමේ නියෝග නිකුත් කරන මෙන් ඉල්ලා එම නිවාසවල හිමිකරුවන් විසින් ගොනුකරනු ලැබූ මූලික අයිතිවාසිකම් පෙත්සම් දෙකක් නිෂ්ප්‍රභ කිරීමටද තින්දු කළේය.
මෙම පෙත්සම් ඊයේ (26) සලකා බැලීම සඳහා කැඳවනු ලැබූ අවස්ථාවේදී නීතිපතිවරයා වෙනුවෙන් පෙනී සිටි ජ්‍යේෂ්ඨ රජයේ නීතිඥ ශමින්ද වික්‍රම මහතා අධිකරණය හමුවේ කරුණු දක්වමින් පාස්කු ඉරු දින එල්ල කෙරුණු ත්‍රස්ත ප්‍රහාර සිද්ධියෙන් පසුව අනාවරණය වූ තොරතුරු මත මෙම නඩුවට පාදකවන ප්‍රශ්නගත නිවාස දෙක සම්බන්ධයෙන් පොලීසිය විසින් විමර්ශන සිදුකළ බව සඳහන් කර තිබේ.
ත්‍රස්ත ක්‍රියාකාරකම්වලට සම්බන්ධ ලුක්මාන් තාලිෆ් නමැත්තෙකු මෙම නිවාසවල හිමිකරුවන් සමග සමීප සම්බන්ධතා පවත්වා තිබෙන බවට විමර්ශනවලදී කරුණු අනාවරණය වී ඇතැයි කියා සිටි ජ්‍යේෂ්ඨ රජයේ නීතිඥවරයා අදාළ නිවස ජාතික තවුහීද් ජමාත් සංවිධානයේ හා අල් කයිඩා සංවිධානයේ ත්‍රස්ත ක්‍රියාකාරකම් සඳහා යොදාගෙන ඇති බවට කරුණු අනාවරණය වී තිබේ.
එසේම අදාළ නිවාස අන්තවාදී ක්‍රියාකාරකම්වලට සම්බන්ධ පන්ති පැවැත්වීම සඳහා යොදාගෙන තිබෙන බවට විමර්ශනවලදී කරුණු හෙළිදරව් වී තිබෙන බවඳ ජ්‍යේෂ්ඨ රජයේ නීතිඥවරයා පෙන්වා දුන්නේය.
මෙම නිවාස ත්‍රස්තවාදය වැළැක්වීමේ පනත යටතේ පොලීසිය භාරයට ගැනීමට අදාළ නියෝගය ජනාධිපතිවරයා විසින් නිකුත් කළේ ඔහුට ඉදිරිපත් වූ සෑහීමකට පත්විය හැකි තොරතුරු පදනම් කරගෙන බැවින් මෙම නියෝගය තුළින් පෙත්සම්කරුවන්ගේ මූලික මිනිස් අයිතිවාසිකම් උල්ලංඝනය වීමක් සිදුනොවන බව ජ්‍යේෂ්ඨ රජයේ නීතිඥවරයා සඳහන් කර තිබේ.
ඒ අනුව අදාළ පෙත්සම් නිෂ්ප්‍රභ කරන ලෙස ඔහු අධිකරණයෙන් වැඩිදුරටත් ඉල්ලා සිටියේ.
එහෙත් එම චෝදනා සියල්ල ප්‍රතික්ෂේප කරමින් කරුණු දැක්වූ පෙත්සම්කාර පාර්ශවය වෙනුවෙන් පෙනී සිටී ජනාධිපති නීතිඥ ෆයිස් මුස්තාපා මහතා කියා සිටියේ අදාළ නිවාස දෙක ත්‍රස්තවාදය වැළැක්වීමේ පනත යටතේ පොලීසිය භාරයට ගැනීමට කෙරුණු විධානය සම්පූර්ණයෙන්ම නීතියට පටහැනි බවය.
රජයේ නීතිඥවරයා සඳහන් කරන ආකාරයේ තොරතුරු විමර්ශනවලදී අනාවරණය වී නොමැති බව මෙහිදී ජනාධිපති නීතිඥවරයා සඳහන් කර සිටියේය.
ඉදිරිපත් වූ කරුණු දීර්ඝ ලෙස සලකා බැලූ ත්‍රිපුද්ගල විනිසුරු මඩුල්ල අනතුරුව අදාළ පෙත්සම් විභාගයට නොගෙන නිෂ්ප්‍රභ කිරීමට තීන්දු කළේය.
අදාළ නිවාස දෙකේ හිමිකරුවන් වූ මොහොමඩ් හියතුල්ලා සහ මොහොමඩ් හසිම් විසින් පෙත්සම් ඉදිරිපත් කර තිබූ අතර එහි වගඋත්තරකරුවන් ලෙස නීතිපතිවරයා, පොලිස්පතිවරයා, ත්‍රස්ත විමර්ශන කාර්යාංශයේ නිලධාරීන් ඇතුළු පිරිසක් නම් කර තිබිණි.
කලවාන ප්‍රාදේශීය සභා නව මන්ත්‍රී සුජීව පුෂ්පකුමාර අද (ජුනි 2) විදුලි සැර වැදී මිය ගොස්…
ලොව පුරා පැතිර යන නව කොවිඩ් වෛරසය සම්බන්ධව වර්තමාන තත්ත්වය පැහැදිලි කරමින් සෞඛ්‍ය හා ජනමාධ්‍ය…
හිටපු මුදල් අමාත්‍ය රවී කරුණානායක ගොනු කළ පෙත්සමක්, ශ්‍රේෂ්ඨාධිකරණය විසින් ප්‍රතික්ෂේප කර තිබෙන බව වාර්තා…
දූෂණ චෝදනා මත අල්ලස් කොමිසම විසින් අත්අඩංගුවට ගන්නා ලද තලවකැලේ ලිඳුල නගර සභාවේ හිටපු සභාපති…
පසුගිය වසරේ ජනවාරි 10 වන දින ගලබොඩවත්ත කොරොතොට ප්‍රදේශයේදී පුද්ගලයෙකු වෙඩි තබා ඝාතනය කිරීමේ සිද්ධියේ…
උසාවියට අපහාස කරන කළැයි කියමින් පුත්තලම මහාධිකරණයෙන් රිමාන්ඩ් බාරයට පත් කිරීමෙන් පසු අභියාචනාධිකරණ විසින් නොපමාව…