කරුණා ‘අම්මාන් බලකාය’ පිහිටුවයි – ජනාධිපතිවරණයේදී රනිල්ට සහාය දෙන බවත් කියයි !

හිටපු නියෝජ්‍ය ඇමැති විනයගමූර්ති මුරලිදරන් නොහොත් කරුණා අම්මාන්, හිටපු එල්.ටී.ටී.ඊ සාමාජිකයින් සහ තවත් අයගෙන් සමන්විත ‘අම්මාන් බලකාය’ නමින් නව සංවිධානයක් පිහිටුවන බව නිවේදනය කර තිබේ.

දෙමළ එක්සත් නිදහස් පෙරමුණේ (TUFF) නායකයා ලෙස කටයුතු කරන විනයගමූර්ති මුරලිදරන් ඉදිරි ජනාධිපතිවරණ සටනේදී ජනාධිපති රනිල් වික්‍රමසිංහට තම සහාය ප්‍රකාශ කර ඇත.

ජනමාධ්‍ය වෙත අදහස් දක්වමින් මුරලිදරන්, හිටපු ජනාධිපති ගෝඨාභය රාජපක්ෂ යටතේ පැවති පාලනය විවේචනය කර ඇති අතර, එම කාලසීමාව තුළ රට පසුබෑමට ලක්වූ බව පෙන්වාදී තිබේ.

රට දියුණුව කරා ගෙනයෑමට රනිල් වික්‍රමසිංහ ගන්නා උත්සාහය පිළිගන්නා ඔහු, රට නගාසිටුවීමට ලක්වූයේ වත්මන් නායකත්වය යටතේ බව සඳහන් කර තිබේ.

ඉදිරි දේශපාලන කටයුතු සඳහා සහයෝගී ප්‍රවේශයක් ගැන ඉඟි කරමින් මුරලිදරන්, වික්‍රමසිංහ ජනාධිපතිවරණයට ඉදිරිපත්වීමට තීරණය කළහොත් ඔහුට සහාය දැක්වීමට තම පක්ෂයේ සූදානම තහවුරු කර ඇත.

මුරලිදරන් විසින් ‘අම්මාන් බලකාය’ නමින් අලුතින් පිහිටුවන ලද සංවිධානයක් හඳුන්වාදී ඇත්තේ, විශේෂයෙන්ම හිටපු සටන්කාමීන්ට ආධාර සැපයීමේ අරමුණින් ය.