Dambulla Thunders වෙනස් වෙයි – නව හිමිකාරිත්වය සහ කණ්ඩායම මෙන්න !

2024 පැවැත්වීමට නියමිත LPL ක්‍රිකට් තරගාවලිය සඳහා දඹුල්ල කණ්ඩායමට (Dambulla Thunders) නව හිමිකාරිත්වයක් හිමිවී තිබෙනවා.

ඒ අනුව දඹුල්ල කණ්ඩායම දඹුල්ල සික්සර්ස් (Dambulla Sixers) ලෙස නම් කර තිබෙනවා.

මෙලෙස දඹුල්ල කණ්ඩායමේ නව හිමිකාරිත්වය ගෙන ඇත්තේ, ලොස් ඇන්ජලීස් හි පිහිටි ප්‍රමුඛ පෙළේ සිවිල් ඉංජිනේරු උපදේශන සමාගමක් වන Sequoia Consultants, Inc සමාගම වන අතර විශේෂයෙන් පිහිටුවා ඇති ද සිල්වා හෝල්ඩිංග්ස් යටතේ කණ්ඩායම ක්‍රියාත්මක වනු ඇත.

Sequoia Consultants හි බහුතර කොටස් හිමිකාරීත්වය දරන්නේ Sequoia Consultants, Inc හි ප්‍රධාන විධායක නිලධාරී සහ
සභාපතිවරයා වන වරලත් සිවිල් ඉංජිනේරුවරයෙකු වන ප්‍රියංග ද සිල්වා මහතාටය.

LPLහි තරඟාවලි අධ්‍යක්ෂක, සමන්ත දොඩන්වෙල මේ පිළිබඳ අදහස් දක්වමින් පැවසුවේ,

නව හිමිකරු දඹුල්ල භාර ගැනීම ගැන අපි අතිශයින් සතුටු වන අතර, ද සිල්වා මහතා හිටපු පළමු පෙළ
ක්‍රිකට් ක්‍රීඩකයෙකු ලෙසින් අප ජාතියේ ක්‍රිකට් ස්පන්දනය තේරුම් ගෙන ඇති නිසා ඔහුගේ
පසුබිම නිසැකවම මෙම හිමිකමට වටිනාකමක් එක් කරන බවයි.

පස්වැනි ලංකා ප්‍රිමියර් ලීග් තරගාවලිය ජූලි 1 වැනිදා ආරම්භ වීමට නියමිත අතර එය මහනුවර, දඹුල්ල
සහ කොළඹ යන නගර තුනකදී පැවැත්වීමට නියමිතය.

මින් පෙර දඹුල්ල තන්ඩර්ස් කණ්ඩායමේ හිමිකාරිත්වය දැරූ, බ්‍රිතාන්‍ය පුරවැසි බංග්ලාදේශ ජාතික තමීම් රහ්මාන් ලබන 07 දක්වා යලි රක්ෂිත බන්ධනාගාරගත කිරීමට මේ වන විට නියෝග කර තිබෙනවා.

සැකකරු තරඟ පාවාදීම සම්බන්ධයෙන් සාකච්ඡා කළ සම්පූර්ණ දුරකථන සංවාදය අධිකරණයට ඉදිරිපත් කරන ලෙසද එහිදී නියෝග කර තිබෙන අතර, ක්‍රීඩා වැරදි වැළැක්වීමේ විශේෂ පොලිස් විමර්ශන ඒකකය මගින් අධිකරණ නියෝග පරිදි කටුනායක බණ්ඩාරනායක ජාත්‍යන්තර ගුවන්තොටුපොළ හරහා විදේශගත වීමට තැත් කිරීමේදී ඔහු​ව අත්අඩංගුවට ගෙන අධිකරණයට ඉදිරිපත් කලේ පසුගිය 22 වැනිදායි.